Ezekelo 6 - Amazwi Yakwe Leza 2013

Yawe watipwila upefi wa tuluwi

¹ Yawe avwanga kunondi ati,

² “We mwana wa muntu, lolekesya pa twamba twamu Izlaeli, kayanene ni landwe lyane.

³ Yanga ukanene myamba yamu Izlaeli pakuti yuvwe izwi lyane, ne Yawe Leza, yuvwe vino nkuinena, navino nkunena utwamba ni mikonko, na manyika, ukuti nemo ndiza nu lupanga ku konona incende zino antu yakapepelamo utuluwi.

⁴ Utuvuwa twa viimbili tulaongololwa na tuno yakaocelapo ubani tulatamolwa.

⁵ Ndasumba ivyala vya ina Izlaeli ntangali ntangali, ndasalanganya na mafupa yao umu mbali zyonsi zya tuvuwa twao.

⁶ Imisumba yonsi yamu Izlaeli ilasanguka vitalang'anda, ni ncende muno yakapepela utuluwi zilononeka, utuvuwa nato tulononeka kumwi nu tuluwi kwene. Tuvuwa twakocelapo ubani tulasandoka na vyonsi vino yapanga navyo vilononekelela kumwi.

⁷ Antu yalafwa ntangali ntangali, na alasyalapo alino yalasininkizya ukuti fwandi nene indi Yawe.

⁸ “Yamwi ndaleka yakapusukepo, nu kusansantikila mu mitundu yuze.

⁹ Mumo ali muno yalaikala uzya nu kunjiusya ali kuno yalanjiusizya nu kumanya ukuti anene nayafulwile nu kuyalenga insonyi. Pasi pano yamfumizyeko amano, yali nu lwiswa lwa tuluwi, nemo yansuuzile. Ukuya kwene yalaisuula aeneco pamulandu wa viipe ni vyawinyi vino yacitanga.

¹⁰ Yalamanya ukuti nene indi Yawe Leza, nu kuti vino nayasokanga vitali vyanseko foo.”

¹¹ Yawe Simwandalali akuti, “Komelini inkufi, muinyanyantile, nupya losyini muti, ‘Kalanda kasikolo!’ Pa viipe vyonsi ni vyawinyi vyonsi vino mwacita mwe ina Izlaeli. Antu yalafwa ku nkondo, ku cipowe nu ku mpungo.

¹² Akutali yalafwa ku mpungo, amupipi yalafwa ku nkondo. Asyalapo nayo yalafwa ku cipowe. Yalasininkizya vino icipyu cane cikapezya antu.

¹³ Ivyala vyao vilaya sile ntangali ntangali, kumwi nu tuluwi twao kwene. Vilaya sile monsi monsi umu mbali ya tuvuwa twao, vilaya ntangali ntangali pa twamba tonsi ututali, na papela ya myamba yonsi, nu mwisika lya miti yonsi itambilile, nu mwisika lya miti yonsi ilembe, kuli kuti apali ponsi sile pano yakatuulila utuluwi impolelwa zyakoca. Nga alino yonsi yalasinkizya ukuti fwandi nene indi Yawe.

¹⁴ Endi, cacumi nemo ndayatitikizya, ndonona ni mpanga yao. Ndaisangula ulwanga, ukutandikila sile ku lwanga lwaku kayeya ukuyafika nu ku musumba wa Dibula, mupipi nu ku kayeya. Ntalasya nanti ponga pano aina Izlaeli yikala. Lyene yalamanya ukuti nene indi Yawe.”