Ezekelo 5 - Amazwi Yakwe Leza 2013

Ezekelo wapela ulukuzu

¹ Yawe wanenyile ati, “Mwana wa muntu, tola ulupanga ulunyoleke, aluno uomvye wa lwembe lwakwe kapela, uku kupela umutwe wako ni vilezu vyako. Nga alino utoole ivipimo nu kwankanya inyele mu mitumba itatu.

² Lino ukuzanzwa kwa musumba kwaya umukusila, tola akamutumba konga uye ukakocele pakasi ka musumba. Alino utoole akamutumba kakwe ciili, uye ufume ukukacentola nu lupanga lino ukuzinguluka umusumba. Akamutumba kakwe citatu, kene ukakanyunye umu muza, nga nani namafuma nkulondela apacisila nu lupanga.

³ Utoole inyele zimwi uzinyepe uku cisempe ca nsalu yako.

⁴ Alino nupya utolepo inyele zimwi, uzisumbile umu moto, uleke zipye. Kuku ukumafumilila umoto uno umasalanganila uku koca umutundu onsi pyu uwa ina Izlaeli.”

⁵ Yawe Simwandalali akuti, “Wii ali Yelusalemu wino niika pakasi ka mitundu, ni mpanga zyenyi zyamuzinguluka.

⁶ Lelo Yelusalemu wii, wene wakana ukulondela amasunde yane, waipisya ukuluta imitundu yuze, watalama ukuluta ni mpanga zyuze zino zyamuzinguluka. Yelusalemu wakana ukusunga vipope vyane na masunde yane.

⁷ Caleka ne Yawe Simwandalali nkuti, pamulandu wakuntalondela amasunde ni vipope vyane, wemo we Yelusalemu watuiletelela ukuluta imitundu ya antu yano yakuzinguluka. Nupya wemo ukalondela imisango ya antu ya mitundu yuze.

⁸ Caleka ne Yawe Simwandalali nkuti, nemwisikulu nakusangukila, we Yelusalemu, nupya ndakuputwila imilandu pa manso ya antu amitundu yonsi.

⁹ Ndakufulula wemo we Yelusalemu vino ntatala nakufulula, nupya ntalatala nswilizyepo ukukufulula ndi vino ndakufulula, pano ukacita ivintu vyonsi vino nemo nasoka.

¹⁰ Munuli wemo we Yelusalemu, ali muno akwasi yalaalya ana yao, nga na ana nayo yalaalya akwasi yao. Ala ndakufulula na alasyalapo apuma nayo ndayasansantila monsi.

¹¹ “Caleka ne Yawe Simwandalali ndakufulula, pasi pano wakowezya Ng'anda yane ikulu. Waikowezya ku vintu vyawinyi vino wemo wacita.

¹² Antu yonsi yalapaatukana patatu, iumba lyonga lilafwila mu musumba ku mpungo nu ku cipowe. Lyakwe cili nalyo lilafwila kunzi ya musumba ku lupanga. Lyakwe citatu nalyo ndalisalanganyizizya mu muza alino nkalilondele nu lupanga.

¹³ “Uluvwikisya apapela icipyu cane nu ukali wane ukufika sile na pano cilasilila. Lino vyonsi vivyo vilafikila, lyene mulasininkizya ukuti nemo ne Yawe navwanzile ukuti ndafulula ucisanguka wako.

¹⁴ Antu yonsi amitundu yakuzinguluka lino yakupita, yalakuwela sile.

¹⁵ “Lino nemo ndasoka nu kukufokela ukali ukali apakukufulula, antu amitundu yakuzinguluka yalalemwa ni ntete. Lino yalakulola, yalakusaalula nu kukuwela. Ivyalanda ne Yawe.

¹⁶ Ndakuletela icipowe pakuti ukacule ku nzala. Ulaauvwa ukali wa nzala kwati inceto zisongole ali zino zikukulasa pa kukukoma.

¹⁷ Ndakuletela cipowe, ndakutumila vilyanyi vyakukoma ana yako, ndakuletela impungo, ni mpanzela alino nu kukukatusizya inkondo pakuti yace yakukome. Ivyalanda ne Yawe.”