Ezekelo 48 - Amazwi Yakwe Leza 2013

Vino imitundu ili nu kwankayiziwa ivitungu

¹ Yaa ali mazina ya mitundu. Ku mpelelekezyo, ku katutu, ku nzila yafuma ku Hetiloni nu kulungama ku wingililo waku Hamati na Hazali Enoni, pa mupaka waku Damasiko, uwayela ku katutu, nu kusinta ku Hamati, impanga ilaya ukufuma ku mupaka waku ufumondaka kufika ku mupaka waku uwondaka, ilaya impanga yakwe Dani, ali cipande conga.

² Wino yapakana na Dani, alafumilila ku mupaka waku ufumondaka nu kufika ku mupaka waku uwondaka. Wiyo a Asyeli, alakwata cipande.

³ Uwalondelela pali Asyeli alatandikila ukufuma ku mupaka waku ufumondaka kufika nu kumupaka waku uwondaka. Wiyo nawe a Nafutali, alakwata cipande conga.

⁴ Alapakana na Nafutali, ukutandikila ku mupaka waku ufumondaka ukufika ku mupaka waku uwondaka. Wiyo nawe a Manase, alakwata cipande conga.

⁵ Alalondelela Manase, ukutandikila ku mupaka waku ufumondaka mpaka nu kufika ku mupaka waku uwondaka. Wiyo nawe a Efulemu, alakwata cipande conga.

⁶ Alapakana na Efulemu, ukutandikila ku mupaka waku ufumondaka ukufika ku mupaka waku uwondaka. Wiyo nawe alaya a Lubeni.

⁷ Alapakana na Lubeni, ukutandikila ku mupaka waku ufumondaka ukufika ku mupaka waku uwondaka. Wiyo alaya a Yuda, alakwata cipande conga.

⁸ Ukusuntikana na Yuda, ukutandikila ku mupaka waku ufumondaka nu kufika ku mupaka waku uwondaka, cilaya icipande cipaatulwe. Umu utali cilaya amakilomita ikumi na yaili, nu kusalala kuli kumwi kwene ukutandika ku ufumondaka ukufika nu ku uwondaka kwene. Ng'anda ikulu yakwe Leza ilaya mukasi.

⁹ Icipande cino mulapaatwila Yawe cilaya amakilomita ikumi na yaili mu utali nu mu kusalala amakilomita ikumi.

¹⁰ Ni cipande cico camuzilo cilaya cakwe yasimapepo. Kufuma ku ufumondaka kufika ku uwondaka cilaya amakilomita ikumi na yaili, ukufuma ku katutu kufika ku kayeya cilaya amakilomita yasano. Ng'anda ikulu yakwe Leza ilaya mukasi.

¹¹ Incende yamuzilo ilaya yakwe yasimapepo amu mupanda wakwe Zadoki aonsi, yayo antumikilanga nu kukana utalami uwakweti aina Izlaeli mu kucita ivitazifile, ndi vivi ivyacisile aina Levi.

¹² Ali vino cipande cao cilafuma ku cipande ca mpanga icitaicindamila, cico icilaya mupipi ni mpanga ya ina Levi.

¹³ Nga lelo aina Levi, pamwi ni mpanga yakwe yasimapepo, ilaya amakilomita ikumi na yaili ukufuma ku ufumondaka kufika ku uwondaka, ukufuma ku katutu kufika ku kayeya ilaya amakilomita yasano.

¹⁴ Yalesiwa kukazya nanti kukauzyamo icipande nanti conga. Cisi cakwezya ukusumba impanga iya, pasi pano catuulwa kuli Yawe.

¹⁵ Amamita ikumi na yaili mu utali na mamita yaili mu wipi asyala kweneko, ilaya impanga ya musumba ucindami, ilaya iyasilesile, umwakwikalamo nu kucemelamo viteekwa. Lelo umusumba wene ulaya mukasi kaiko.

¹⁶ Ilaya ilingane monsi monsi, ukulingana amamita 2,250.

¹⁷ Impanga yakucemelamo yamu musumba ilaya amamita 125 monsi monsi ukuzinguluka umusumba.

¹⁸ Impanga yasyala pacisila ca kukuula umusumba lwaku kayeya ka ncende yamuzilo, ilaya amakilomita yasano mu utali, na yaili na citika mu wipi. Ali muno mulafuma vyakulya vyakulisya aomvi amu musumba.

¹⁹ Fwandi aomvi amu musumba yalafuma mu mitundu yonsi ya ina Izlaeli.

²⁰ Icipande cicindame consi cilaya amakilomita ikumi na yaili monsi monsi, ukwikapo ni ncende ya musumba.

²¹ Icipande cilasyalako cilaya ca ntunguluzi, cili nu kuya imbali zyonsi ziili zya mpanga yasilesile ni ya musumba, iyo ilatandikila ku mupaka waku ufumonda kufika nu ku mupaka waku uwondaka, ilaya amakilomita ikumi na yaili mu utali, iyo ilaya iya ntunguluzi, nupya cilasintana ni vipande vya mitundu. Pakasi palaya cipande icituulwe ni ncende icindame ya Ng'anda ikulu yakwe Leza.

²² Fwandi ukutandikila ku cipande ca ina Levi ni mpanga ya musumba, vino vyaya mukasi ka cipande ca ntunguluzi, vyonsi ivyaya pakasi ka mupaka wa ina Yuda nu mupaka wa ina Benjamini vilaya vya ntunguluzi.

Ivipande vya mitundu yuze

²³ Imitundu ino yasyalako aeyi: Benjamini alakwata icipande conga. Cilaya ukutandikila ku mupaka waku ufumondaka nu kufika ku mupaka waku uwondaka.

²⁴ Alalondela Benjamini a Simeoni. Nawe alakwata cipande conga. Cilaya kutandikila ku mupaka waku ufumondaka nu kufika ku mupaka waku uwondaka.

²⁵ Alalondela Simeoni a Isakali. Nawe alakwata cipande conga. Cilaya kutandikila ku mupaka waku ufumondaka nu kufika ku mupaka waku uwondaka

²⁶ Alalondela Isakali a Zebuluni. Nawe alakwata cipande conga. Cilaya kutandikila ku mupaka waku ufumondaka nu kufika ku mupaka waku uwondaka

²⁷ Alalondela Zebuluni a Gadi. Nawe alakwata cipande conga. Cilaya kutandikila ku mupaka waku ufumondaka nu kufika ku mupaka waku uwondaka

²⁸ Ukusuntinkana na Gadi uku kayeya kilunji, uku kayela ilanzi ndi lyafika pakasi ka mutwe, mupaka uwafumilila ku Tamala nu kuya ku manzi aku Meliba ku Kadesyi, nupya uku luzi lwa Eguputo mpaka kuli yemba mukulu.

²⁹ “Iyo ilaya ili mpanga ya kupendwila mitundu ya ina Izlaeli ku kuya cuma cao caupyanyi. Vivyo ali vipande vyao.” Ivyalanda Yawe Simwandalali.

Impongolo zya musumba wa Yelusalemu

³⁰ Zii, zili nzila zyakufumila mu musumba, uo uwakwata amamita 2,250 mu utali lwaku katutu.

³¹ Impongolo zya musumba zilapelwa amazina ya mitundu ya ina Izlaeli. Impongolo zitatu zyaku katutu zilaya impongolo yakwe Lubeni, impongolo yakwe Yuda, nga ni mpongolo yakwe Levi.

³² Uku ufumondaka amamita 2, 250, impongolo nazyo zitatu: impongolo yakwe Yosefu, impongolo yakwe Benjamini nga ni mpongolo yakwe Dani.

³³ Uku kayeya kilunji nako kwene amamita 2, 250, nupya impongolo zitatu: impongolo yakwe Simeoni, impongolo yakwe Isakali, nga ni mpongolo yakwe Zebuluni.

³⁴ Nu ku uwondaka amamita 2, 250, nupya impongolo zitatu: impongolo yakwe Gadi, impongolo yakwe Asyeli, nga ni mpongolo yakwe Nafutali.

³⁵ Umusumba onsi kuzinguluka wali amamita 9,000 konsi konsi, nu kufuma wanda kwene ulya izina lya musumba lilaamwa ndi vino “Mwene ali Pano!”