Ezekelo 47 - Amazwi Yakwe Leza 2013

Luzi lukukonkoloka ukufuma mu Ng'anda ikulu yakwe Leza

¹ Nupya umuntu wilya ambwezya ne Ezekelo ku mulyango wa Ng'anda ikulu yakwe Leza, papo apafumanga amanzi pa mulyango wa ng'anda yi pepo, nu kukonkolokela lwa ku ufumondaka kuno Ng'anda ikulu yakwe Leza yalozizye mulyango. Amanzi yakonkolokelanga mu Ng'anda ikulu yakwe Leza mwisika, ku kayeya ki lunji lya kavuwa.

² Amfumizya pa mpongolo yaku katutu nu kunzingulusya ukunzi, mpaka nu ku mpongolo ya kunzi yaku ufumondaka, apafumilanga amanzi lwaku kayeya.

³ Alino umuntu wiyo uwali nu mwando wakupimilako umu minwe yakwe, apima na mamita imyanda isano kutentemukila kuno kaluzi kakonkolokonga. Ali pakundamvya uluzi na manzi yamfika mu tunkulungu.

⁴ Apima amamita nayauze imyanda isano nu kundamvya uluzi, na manzi yamfika mu makokola. Nupya apima na mamita yauze imyanda isano nu kundamvya na manzi yamfika mu musana.

⁵ Nupya apima na mamita yauze, awe lyene iluya uluzi luno ntangendambe, pasi pano uluzi lwasambela, amanzi yavulisya, yasi yakulamba suka sile ukowa.

⁶ Nawe ali pakunguzya ati, “We mwana wa muntu uzye walola cintu cii?” Alino ansenda answilizya nupya ku cituntu ca luzi.

⁷ Lino nawela indola imiti iingi iyali pa cituntu ca luzi imbali zyoili.

⁸ Anena ati, “Amanzi yaa yaya ku mpanga yaku ufumondaka, yatentemukila ku Alaba, nu kuyaingila kuli yemba. Na pakuponela muli yemba yamusangula amanzi asuma.

⁹ Na konsi kuno uluzi lwala lwapita, viumbwa vyaumi vyonsi visenya mwenemo vilakwata umi. Inswi zilasanda, pasi pano konsi ukulafika amanzi yayo yalaleta umutende, na konsi kulapita uluzi luu kulaya umi wampomvu.

¹⁰ Apa cituntu palazanwa yakavuwa nu kuteya imikwau yao ukufuma ku Engedi mpaka nu ku Enegilaimu. Inswi zilaya zya misango yonsi nu kuvulisya wa nswi zya muli Yemba wa Adiliya.

¹¹ Lelo amanzi yamu nyika nu muvilambe yatalaya amanzi asuma. Yalasyala amanzi amusilya.

¹² Apa cituntu ca luzi imbali zyonsi ziili palamela imiti ya viseekwa vya misango yonsi, na mafwa yakweyo yatalatala yaonze ni viseekwa vyakweyo vitalatala visile foo. Cila mwezi imiti iyo ilaaseeka iviseekwa vipya, pasi pano amanzi yayo yafuma ku ncende ipolelelwe. Iviseekwa pasi pausuma ukuvilya na mafwa ayako umulembo wakupozya.”

Yanande ya mpanga

¹³ Yawe Simwandalali anena ati, “Yanande yaa avyalo vyakwankanyizizya imitundu ya ina Izlaeli ikumi na iili. Yosefu alapoka ivipande viili.

¹⁴ Mulapoka mwensi ivipande ivilingane, pano ali vino nalavile ivikolwe vinu nu mulapo po inti, ‘Ndamupeela impanga, ilaya icuma cinu caupyanyi.’

¹⁵ “Ni mipaka ya mpanga aeyi: lwaku katutu umupaka ulatandikila kuli Yemba wa Adiliya nu kulondela umuseo waku Hetiloni, ukulungama ku wingililo waku Lebo Hamati, ukulungama ku Zedadi,

¹⁶ Belota na Sibilaimi (uwaya pakasi ka mpanga ya Damasiko ni mpanga ya Hamati) alino kulungama ku Hazeli Hatikoni, uwaya pa mupaka wa Haulani.

¹⁷ Ali vino umupaka ulafuma kuli Yemba wa Adiliya nu kufika ku Hazali Enani, kufika ku mupaka waku Damasiko ku kututu nu ku mupaka wa Hamati lwaku katutu. Uu, uli mupaka waku katutu.

¹⁸ Ku ufumondaka mupaka ulapita pakasi ka Damasiko na Haulani, pakasi ka Gileadi ni mpanga ya ina Izlaeli, Yodani ali mupaka ukufika kuli yemba waku ufumondaka mpaka nu ku Tamala. Uo ulaya ali mupaka waku ufumondaka.

¹⁹ Ku kayeya umupaka ulafuma ku Tamala nu kulungama ku kayeya ku manzi yaku Meliba, ku Kadesyi, ukufika ku Luzi lwa Eguputo na kuli Yemba wa Adiliya. Uo ulaya ali mupaka waku kayeya.

²⁰ “Ku uwondaka ali kuno Yemba wa Adiliya alaya umupaka, ukufika apa lungatana nu wingililo waku Hamati. Uo ulaya ali mupaka waku uwondaka.

²¹ “Mulankana impanga ii kulingana ni mitundu ya ina Izlaeli.

²² Mulayankana kukuya icuma cinu caupyanyi pamwi na enyi alikala kuno muli, avyala na ana kuno muli, pano mulinzile kuyacitila wa akaya ya ina Izlaeli. Yali nu kwankanyiziwa ca upyanyi cao pamwi namwe mu mitundu yakwe Izlaeli.

²³ Muce mukapeele umwenyi impanga yakwe mu mutundu uno akaikalamo.” Ivyalanda Yawe Simwandalali.