Ezekelo 46 - Amazwi Yakwe Leza 2013

Imilimo ya ntunguluzi apa manda auzevyo

¹ Yawe Simwandalali wavwanga wati, “Impongolo ya kwingililapo apa kuya mu musolo wa mwilinga lya mukasi ili nu kusyala iyalikwe apa manda mutanda amilimo yinu, ukutandikila apa wanda wi Sabata mpaka na pa wanda wa kuzevya Ndoleko ya Mwezi Upya, alino ice ikayulikwe.

² Intunguluzi alino ilingila nu kupita umu muputule wa kwingilila pa mpongolo ya kunzi. Alino ice ikimilile apa maingwe ya mpongolo. Yasimapepo nayo yalatuula impolelwa yao iyakoca ni ya utandano. Alino alapona pansi ufupime apa mulyango wa mpongolo, nga lino akafume. Impongolo isi nu kuyalwa mpaka na manguzi.

³ Pa Masabata na pa manda ya Ndoleko ya Mwezi Upya, antu yalamfukamila pansi nu kumpepa ne Yawe, apa mpongolo ii.

⁴ Apa wanda wi Sabata, intunguluzi ilatuula utwana twa mfwele mutanda utwaula indema, na suuku wenga uwaula ulema, wa mpolelwa ya koocela ne Yawe.

⁵ Alino alinzile alundepo itepe lyonga lya wila uwo papali suuku nu twana twa mfwele mutanda napo angalundapo icipimo ca usu pano atemilwe. Alundepo api tepe lyonga ilya usu, amafuta ya miolivi imisazi itatu.

⁶ Apa wanda wa Ndoleko ya Mwezi upya, intunguluzi ilatuula kacipambasi konga aka ng'ombe akaula ulema, nu twana twa mfwele mutanda utwaula ulema, na suuku wenga nawe kwene uwaula ulema.

⁷ Pali kacipambasi ka ng'ombe konga na patwana twa mfwele mutanda, na pali suuku wiya wenga, intunguluzi ili nu kulunda penepo itepe lyonga ilya uusu. Lelo apa twana twa mfwele mutanda, pene angalundapo icipimo ca usu pano atemilwe. Nupya api tepe lyonga ilya uusu, ali nu kulunda penepo amafuta ya miolivi ukulingana ni misazi itatu.

⁸ Intunguluzi ili nu kufumila ukunzi, ukupitila uku mpongolo iya kuiila umu muputule uukulu, nupya nu kwingilila apa mpongolo ili imwi kwene.

⁹ “Lino antu yalaiza ku manda ya uzevyo uku kumpepa, yayo alaingilila uku mpongolo yaku katutu, yalafumila uku mpongolo yaku kayeya lino yamala uku mpepa. Yano yalaingilila uku mpongolo yaku kayeya yalafumila lwaku katutu lino yamala ukumpepa. Kutakezye kukayeko umwi uwakufumila uku mpongolo ino wali aingilile penepo, yonsi yace yaleunkanya.

¹⁰ Intunguluzi ili nu kuya pamwi na antu, lilyo lyonsi lino yakwingila nalino yakufuma apanzi.

¹¹ Apa manda ya uzevyo na pa manda makulu yonsi asontwe, uwila wa vilyo, uli nu kuya icipimo ukulingana ni itepe lyonga, ali wakulundapo pali kacipambasi ka ng'ombe na pali kasuuku konga. Lelo apa kaana ka mfwele konga, pene intunguluzi ingalunda penepo icipimo ca usu pano umweneco atemilwe. Alino api tepe lyonga ilya usu pali nu kulundwapo imisazi ya mafuta ya miolivi itatu.

¹² “Intunguluzi ino ili pakuteeka, lino ilaitemelwa iine yonga ukuntuula ne Yawe, uwila wakoca, nanti sile uwila wa utandano, yace yaiyulila impongolo yaku ufumondaka apa kwingila umu musolo wa mwilinga lya mukasi. Nayo alino ilatuula impolelwa yakweyo iyakooca nanti iya kuminkana ndi vino ikacita pee apa wanda wi Sabata. Alino lyene ilafumila apanzi, nga na pacisila impongolo ikayalikwe.”

Uwila wakutuula cila wanda

¹³ Nupya Yawe avwanga ati, “Amanda yonsi akatondo, mulinzile mwatuula akana ka mfwele konga akaula ulema, akakutuulila ne Yawe. Uwila uo ulinzile kutuulwa cila wanda.

¹⁴ Nupya icipimo ca wila wa usu ukulingana na yakilogalamu yaili, ali cino cili nu kutuulwa cila wanda, na mafuta ya miolivi ukulingana na lita wenga, akukandila usu. Isunde lya kutuula ne Yawe uwila uu, lili nu kulondelwa pee.

¹⁵ Akana ka mfwele, nu usu, na mafuta ya miolivi, vili nu kutuulwa cila katondo kuli ne Yawe.”

Intunguluzi ni citungu cakweyo

¹⁶ Yawe Simwandalali wapeela ilamulo ati, “Intunguluzi ino ikuteeka ndi yapeela penepo umwana wenga umonsi ciputulwa conga ca mpanga yakweyo, ala ciputulwa cico caya icuma ca mwanakwe kwene na akazi kakwe.

¹⁷ Lelo intunguluzi ino ikuteeka ndi yatoola ciputulwa conga cakweyo nu kupeelapo umuzya wakweyo wenga, lyene ala ciputulwa cili nu kuswiliziwa ku ntunguluzi kwene, umwaka wa kukululwamo ndi wafikila. Impanga iyo iyakwakwe, nga ilaya iyakwakwe wenga mpo na ana yakwe aonsi amanda pe.

¹⁸ Intunguluzi ikuteeka itakwata insambu yakupokolola icuma ca antu yauze. Umu mpanga sile yakweyo ali muno ilinzile kupeela ana yakweyo aonsi utuvitungu tuno nayo yangaikwatila, ali pakukana pokolola antu yane yamwi impanga yao.”

Imiputule ya kwelekelamo ya Ng'anga ikulu yakwe Leza

¹⁹ Nupya umuntu wilya ansenda ne Ezekelo antwala pa mulyango wa kwingilila mu miputule iyali ni mpongolo lwaku katutu ki lungi aka musolo wa mwi linga lya mukasi. Imiputule iyo yali imiputule yamuzilo yakwe yasimapepo. Alino umuntu wiyo atandiika kusonta incende yonga iyayelile ku muputule waku lusansa lwaku uwondaka.

²⁰ Atandika nu kuvwanga ati, “Kuno ali kuno yasimapepo yali nu kwelekela inyama ino yatuulwa wa mpolelwa yapa milandu nga ni yapa maifyo, nupya ali kuno yakaapangila mikate uku usu uno antu yatuuzile, ali pakuti pataloleka icintu nanti conga ca kupaatwila Leza, cakuti yatwala mu musolo wa mwi linga lya kunzi, pano cingaletelela antu pa kukumya ku vintu vyamuzilo.”

²¹ Nupya umuntu wiyo antwala ku musolo wa kunzi nu kumpisya mu matungi yonsi yani amu solo. Mu ntunga yonsi ya musolo mwali umusolo,

²² ali kuti mu ntunga zyonsi zya musolo mwali tumisolo tunono tuni, umu utali twali amamita ikumi na yasano.

²³ Tumisolo tonsi ikumi twazingulusiwe ni ciumba, na lwa mwisika lya lung'umba mwali amasoswa kuzinguluka.

²⁴ Alino anena ati, “Ii ili miputule yakwelekelamo muno aomvi amu Ng'anda ikulu yakwe Leza yalaelekelamo impolelwa zino antu yapeela.”