Ezekelo 45 - Amazwi Yakwe Leza 2013

Icipande ca mpanga yakwe Leza

¹ Lino mwaca mumaankanya impanga mu vipande pakupendola, mukapaatwile Yawe icipande camuzilo mu mpanga. Mu utali cice cikatalimpe amakilomita 12 na citika, alino mukusalala namo amakilomita ikumi. Ni cipande cico cilaya camuzilo consi sile pano capelela.

² Umu citungu cico muli nu kuya mwene incende imwi ilingane mu ukulu monsi monsi kulingana na yamita imyanda iili na makumi yani na yani. Iyo ilaya Ng'anda yane ikulu. Alino umu mbali yakweyo monsi monsi muce musyale umusolo ungavunguluka amamita amakumi 25.

³ Ukufuma pa ncende iyo kulapimwa incende imwi, mu utali ilaya amakilomita 12 na citika, nu mu kusalala namo amakilomita yasano. Mumo umulaya Ng'anda yane ikulu ilaya incende yamuzilo kuluta.

⁴ Mu mpanga ii ali citungu icilaya camuzilo, icilapaatwilwa yasimapepo alambombela ne Yawe mu Ng'anda yane ikulu. Umulaya amang'anda yao, nupya ilaya incende yamuzilo umulayamo Ng'anda yane ikulu.

⁵ Nupya mulaya incende nayuze, nayo kwene ilaya amakilomita 12 na citika, nu mu kusalala namo amakilomita yasano. Incende iyo ilaya ya ina Levi alaomba imilimo mu Ng'anda yane ikulu, kuli kuti umulaya imisumba yao muno yalaikalamo.

⁶ Nupya kulaya icitungu nacuze icakukuulamo umusumba, naco mu utali cili nu kuya amakilomita 12 na citika mu utali, nu mu kusalala namo amakilomita yatatu. Icitungu cico cili nu kuyela ku lusansa lwa citungu camuzilo, ni citungu cico cilaya ali ca ina Izlaeli yonsi.

Citungu ca mwene

⁷ Kuli nu kuya kweneko icitungu cino intunguluzi ikuteeka ili nu kukwata. Cili nu kutandikila pakasi ka ncende yamuzilo nu musumba, alino cilungame kuli yemba wa Mediteleniani lwaku uwondaka, alino lwaku ufumondaka cili nu kupelela lwaku ufumondaka kwene. Ukutandikila ku ufumondaka ukuyafika ku uwondaka, cili nu kulingana sile ni vitungu vyuze ivilakwata imitundu ya ina Izlaeli.

⁸ Fwandi ali citungu cino intunguluzi ilaateeka ilakwatako nayo mu mpanga ya ina Izlaeli. Ali pakuti itakacuzya antu nupya ali pakuti ikaleke imitundu ya ina Izlaeli nayo ikaikwatile ivitungu mu mpanga.

Amasunde yano intunguluzi ikuuteeka ili nu kulondela.

⁹ Yawe Simwandalali avwanga ati, “Mwe ntunguluzi zya ina Izlaeli, awe mwaifya pavula! Tiini ukakasi winu nu mucuzya winu. Mwacita vyaulungami, muye nu mulungikila. Mutakaswilizye nupya ukuzinga antu yane mu mpanga yane. Ivyalanda ne Yawe Simwandalali.

¹⁰ Mwensi pyu mulinzile kuomvya ivipimilo ivili ningo, vino muli nu kupimilako.

¹¹ Itepe ali cipimo cakupimilako ivintu ivyume, nupya ali cipimo kwene cakupimilako ni vyamanzi manzi. Umungomo ali cipimo cakulisya pali vyonsi. Umungomo onga mwaya amatepe ikumi lyonga.

¹² Fwandi ivipimo viinu vili nu kuya vii: utuntu amakumi yaili pa lupi, nga mwatupima indupi amakumi mutanda, icili conga ni civiya conga cino yakazwilapo insima.

¹³ “Uwila uno mulatuula auu: cila mingomo umwanda ya ngano pa mungomo onga wa ngano zinu zisokolwe muli nu kutuulapo icipimo conga. Apa mungomo onga wakwe baale, muli nu kutuulapo iciviya conga.

¹⁴ Pa mungomo onga wa mafuta inu amiolivi yano mwafena, muli nu kutuulapo amafuta mu maotolo yaili.

¹⁵ Pa mfwele zinu imyanda iili muli nu kutuulapo yonga. Muli nu kutuula uwila wa vyakulya, nu wa nyama zyakoca zya musuma, nu wila wa nyama izya mawila autandano pamwi, ali pakuti mwaelelwa uluse pa maifyo inu. Ivyalanda Yawe Simwandalali.

¹⁶ “Antu yonsi mu mpanga yali nu kutwala uwila uo ku ntunguluzi ino ikuteeka Izlaeli.

¹⁷ Alino intunguluzi nayo, ilaya nu mulimo uwakulolekesya apa nyama izilaocewa zya muntu musuma pakuzituula impolelwa, ali ino ilalola na pa mawila ya vyakulya ni vyakumwa, ivilatuulilwako umutundu onsi wa ina Izlaeli pa manda ya uzevyo yonsi, na pa uzevyo wa Ndoleko zya mwezi, na pa Masabata yonsi asontwe. Fwandi intunguluzi iyo iilalokesya pa mawila ya pa maifyo, na pa mawila ya vyakulya, na pa mawila yakoca, na pa lwa mawila a mpolelwa zyautandano, ali mawila yapa kufuta pa maifyo ya ina Izlaeli.”

Amanda yauzevyo

¹⁸ Nupya Yawe Simwandalali wavwanga wati, “Pa wanda wakutandikilapo uwamwezi wakutampa, muli nukutolapo ka cipambasi ka ng'ombe akaula ulema, nu kukatuula impolelwa ya kusangulwilako Incende ya muzilo.

¹⁹ Simapepo ace atoola uwazi umwi apa wazi wa nyama ino yatuulilwepo impolelwa yakwelela amaifyo, nu kuupaka uku maingwe ya Ng'anda yakwe Leza, nu ku matungi yonsi yani ayela papela ya kavuwa, nga nuku maingwe ya mpongolo yakuila mu musolo wa mwilinga lya mukasi.

²⁰ Uce ukacite icili conga kwene napa wanda walenga cinimbali uwa mwezi, apamulandu wa yantu yonsi yano yaluvyanyizye ukwaula ukumanya nanti kumufulo wao. Fwandi vivyo, ali vino mulasunga Ng'anda yane ikulu apakuti ikaye iya muzilo.

²¹ “Apa wanda uwalenga ikumi na yani uwa mwezi wakutandika kwene, ali pano mulatandikila uzevyo wa manda makulu a Cimulo ca Ucilo. Yonsi yace yalya imikate iyaulamo icitutumusi apa manda cinimbali.

²² Apa wanda kwene uo, intunguluzi ice ikafyule cipambasi wa ng'ombe, uwa mpolelwa ya kufuta pa maifyo, nga na pakuipapatila umweneco kwene na antu yonsi.

²³ Cila wanda apa manda cinimbali auzevyo, ali nu kufyula cila wanda yacipambasi cinimbali, yasuuku nayo cinimbali ivyaula ulema, wa mpolelwa yakocela Yawe, nga na sawe pakwelelwa kwa maifyo.

²⁴ Intunguluzi ice ikatuule ni citundu ca usu pali cila cipambasi ukulingana na ma galoni ikumi lyonga.

²⁵ “Apa wanda uwalenga ikumi na yasano, mu mwezi walenga cinimbali, umu uzevyo wa manda makulu a Nsakwe, intunguluzi ikacite icili conga kwene apa manda cinimbali apakutuula impolelwa yakufuta pa maifyo, impolelwa ya koca nga nu mutuulo wa vilyo na mafuta.”