Ezekelo 44 - Amazwi Yakwe Leza 2013

Ivyakuomvya impongolo yaku ufumondaka

¹ Alino umuntu wilya wanswilizye uku mpongolo ya kunzi, lwa kulusansa lwa ufumondaka ya Ng'anda ikulu yakwe Leza. Ni mpongolo iyo yali iiyalwe.

² Nga alino Yawe anena ati, “Impongolo ii, imasyalanga vikwene iiyalwe, italatala ikayulikwe foo. Patalatala pakingililepo umuntu nanti wenga, pasi pano ali pano ningililepo ne Yawe Leza wakwe Izlaeli. Icaleka imasyalanga vivyo kwene iyalikwe.

³ Lelo intunguluzi ino ikuteeka, yene ingiza ililepo icakulya pa cinso cane. Yene apakwingila na pakufuma kwene ingapitila penepo, nu kufumilapo umu muputule ukulu uno wayela lwa mukasi ka mpongolo.”

Amasunde akuzumiliziwa ukwingila umu Ng'anda ikulu yakwe Leza

⁴ Alino umuntu wilya ampisya umu mpongolo yaku katutu andeta ku nkolelo ya Ng'anda ikulu yakwe Leza. Nalolekesya nazana nu kuti ucindami wakwe Yawe wati uzula Ng'anda ikulu yakwe Leza, alino impona pansi mfupime.

⁵ Yawe ali pakunena ati, “We mwana wa muntu, teka umwenzo, lolekesya ningo, uvwikisye navino nkukulondolwela. Vyonsi ivya pa Ng'anda ikulu yalwe Leza na masunde akuwaka aevi. Uwalola ningo yano yalinzile kuzumiliziwa ukwingila mu Ng'anda ikulu yakwe Leza na yano yatange yazumiliziwe ukwingila umu Ncende yamuzilo.

⁶ “Nena atalami, ang'anda yakwe Izlaeli uti, Yawe Simwandalali akuvwanga ukuti, Mwe ina Izlaeli ala imicitile yinu iipisye yaticila umu cipimo.

⁷ Pasi pano lyene mwati muleka aenyi yano yatasilamulwa imipasi ni mili kumwi, yingile umu Ncende yamuzilo, nu kukowezya Ng'anda ikulu yakwe Leza, apa nsita ino mukutuula uwila wa vilyo na mafuta nu wazi, nu konona upangano wane uku micitile yinu iipisye yonsi.

⁸ Mu cifulo ca kuomba umulimo wane umu Ng'anda yane ikulu, mwemo mwikapo muze apa cifulo cinu awino amaomba imilimo iyo mwenemo.

⁹ “Yawe Simwandalali nawe wavwanga wati, umwenyi, atasilamulwa umupasi nu mwili, atalingila umu Ng'anda yane ikulu, nanti sile awenga apa enyi yonsi yano yikala umu ina Izlaeli.”

Aina Levi yayafumya pi umba lyakwe yasimapepo

¹⁰ Aina Levi amfutatile pamwi na ina Izlaeli yauze yamwi, nupya apepanga utuluwi, nayo kwene ukufulwilwa kumwi.

¹¹ Lelo kwene yangaomba umulimo uwamu Ng'anda yane ikulu uwakusunga impongolo nu kuombako imilimo yuze. Yangafyula inyama zino antu yakuleta apakuzituula impolelwa yakoca, ni zyakutuula impolelwa yakupapatila antu nupya yali nu kuya pa milimo yakuombela antu.

¹² Lelo pamulandu wakuti ali yano yatungulwilanga aina Izlaeli amapepo akupepa utuluwi, calola ukuti fwandi ali yano yayatwalanga mu kwifya. Caleka nani ne Yawe Leza nalapa ukuti yali nu kuvunukwa.

¹³ Yatalampalamila nupya pakumbombela umulimo wao wa usimapepo. Yatalapalama nanti sile ku vintu vyane vyamuzilo, nanti sile ukwingila mu muputule wamuzilo kuluta. Kuu kuli kuvunukwa kuno nayapeela pa vicitwa vyao viipisye.

¹⁴ Nemo namayatantikila imilimo yonsi ili nu kuombekwa umu Ng'anda yane ikulu.

Yasimapepo

¹⁵ Lelo yasimapepo mu ina Levi, ana yakwe Zadoki, yano yaombanga umulimo wane mu Ng'anda yane ikulu, lino aina Izlaeli yamfutatile nu kuntaluka ukutali, ali yano yali nu kumpalamila pa kuntumikila. Yamaimililanga pa cinso cane nu kuntuula amafuta nu wazi.

¹⁶ Yene ali yano yamaingilanga mu Ng'anda yane ikulu nu kuomba umulimo wa pa kavuwa mu Ng'anda yane, nga nu kutungulula amapepo mu Ng'anda yane.

¹⁷ Lino yalaingila umu mpongolo pakuya mu musolo wa mwi linga lya mukasi umwaya Ng'anda yane ikulu, yali nu kuzwala insalu izitelepelele. Yasi nu kuzwala insalu zipikulwe, zya mavumbu ya mfwele apa nsita ino yakuomba imilimo mu musolo wa mwi linga lya mukasi, nanti mukasi ka Ng'anda yane ikulu.

¹⁸ Yali nu kuzwala ni visote vya nsalu zitelepelele, na yakaputula a nsalu zitelepelele, imisipi yene foo, pano limwi yangakailwa iyevu.

¹⁹ Pakufumila pa antu yano yali mu musolo wa mwi linga lyakunzi, yali nu kutala yazula ivyakuzwala vino yali yakuombelamo umulimo mu Ng'anda yane ikulu nu kuvisya mu mupute wamuzilo. Yali nu kuzwala insalu zyuze, ali pakukana letelela antu angakumya ku nsalu zizyo zyamuzilo.

²⁰ Yatakezye ukupela inkuuzu nanti kutengela inyele zyao. Yace yapela inyele zyao mu musango ulinge.

²¹ Simapepo wensi atalinzile kumwa waini uwanda uno wingila mu musolo wa mukasi.

²² Nupya simapepo atalinzile kutwala mukamfwilwa nanti umwanaci wino yata kuli iya. Lelo angatwala umwanaci umwina Izlaeli nanti mukamfwilwa wino iya wali a simapepo.

²³ Yasimapepo yace yasambilizya antu yane ukupusanya vintu vyamuzilo ni vyasilesile, yace yayalanga na vino ivikowele ni visi vikowele vyapusana.

²⁴ Ndi vikanza vyakatuka yace yaputula imilandu, yace yapingula kulingana nu upinguzi wane. Yace yawaka amasunde yane ni vipope vyane pa manda yane yonsi auzevyo, yace yacindika na Masabata yane yonsi amuzilo.

²⁵ Yatakezye kupalamila ku cala ca muntu, kuti yataikowezya. Suka sile ku cala cakwe yaisi, yanyina, na ana yao yakaci nanti yakalume, aina yao aonsi na yakaci yao atasakwa.

²⁶ Nga yaikowezya, yalinzile kusangululwa. Ndi yamala kusangululwa, palinzile papita amanda cinimbali,

²⁷ Alino lyene yaye mu musolo wa mwi linga lya mukasi umwaya Ng'anda yane ikulu, yatuule ni mpolelwa imwi yonga pamulandu wakufuta pa maifyo yao, awe lyene yangatwalilila kuomba imilimo nupya mu Ng'anda yane ikulu. Ivyalanda ne Yawe Simwandalali.

²⁸ Pa ina Izlaeli a yasimapepo atupu tupu sile ali yano yatalakwata impanga yakuya icuma cao caupyanyi. Ni mpanga ingaya icuma cao anene sile ne Leza. Yatakapelwe icuma cakuti yaikwatila, nemweneco kwene anene namayanga icuma cao caupyanyi.

²⁹ Amawila ya vyakulya, na mawila yakufuta amaifyo, na mawila akulipila pa milandu. Ivimayanga vyakulya vyakwe yasimapepo, nupya ali nu kutoola ivintu vyonsi vino antu yamampaatwilanga mu mpanga ya Izlaeli.

³⁰ Yasimapepo ali yano yamatolanga ivizao vyonsi vyankolelo ivisuma, ni vintu vyonsi ivimatuulwanga kunondi. Lyonsi sile lino antu yapanga imikate, yace yapelako yasimapepo umukate wankolelo, ali pakuti upolelelo wane waya umu mang'anda yao.

³¹ Yasimapepo yatakalye icunyi icaifwila, nanti inyama iyaifwila, nanti citeekwa icakomwa ku citeekwa cuze.