Ezekelo 43 - Amazwi Yakwe Leza 2013

Yawe waswilila mu Ng'anda yakwe

¹ Lyene umuntu wilya antwala ku mpongolo iyalozya icinso lwaku ufumondaka.

² Kuku kwene indola ucindami wakwe Leza wa ina Izlaeli ala ukufuma ku ufumondaka. Izwi lyakwe lyuvwikike wa cipoma, nga ni mpanga yayengise ku luswepo lwa ucindami wakwe.

³ Icilolwa cino naweni cali wa cilolwa cino naweni lino wene wizile ku konona umusumba wa Yelusalemu. Nupya cali wa cilolwa cino naweni pipi nu Luzi lwa Kebali. Lyene impona pansi, ala mfupime.

⁴ Ucindami wakwe Yawe iwingila mu Ng'anda yakwe ikulu, ukwingilila mu mpongolo yaku ufumondaka.

⁵ Umupasi wakwe Leza pali pakunkatusya nu kuntwala mu musolo wa mukasi, nga nu ucindami wakwe Yawe iuzula mu Ng'anda ikulu yakwe Leza.

⁶ Lino umuntu wilya acili aimi apipi nani, inuvwa umuntu umwi akuvwanga kunondi umukasi ka Ng'anda ikulu yakwe Leza.

⁷ Alanda ati, “We mwana wa muntu, ii ili ncende ya cilimba cane ca wene, nupya apano nkalyata ingazo zyane.

⁸ Lino yakuuzile viimbili vya milyango yao apipi ni ciimbili ca mulyango wane, na maingwe yao apipi na maingwe yane, yasya sile ulung'umba longa apakasi kao na kane, yene yasawisye izina lyane lyamuzilo uku vicitwa vyao vyawinyi. Acino nani nayononyile ku ukali wane.

⁹ Lyene ndakai kayale yazenzuke ku upefi wao wa tuluwi, nga yasisye ni viimbili vya tuluwi vyakwe yamwene yao. Lyene alino ndikala apakasi kao amanda pe.

¹⁰ “We mwana wa muntu, si londolola Ng'anda ikulu yakwe Leza ku ina Izlaeli. Si lekini yelenganye imilolekele yakweyo na vino yakuulwa, pakuti yuvwe insonyi pa maifyo yao.

¹¹ Nga ndi cakuti yuvwa insonyi pali vyonsi vino yacita, lyene uleke yamanye imilolekele ya Ng'anda ikulu yakwe Leza, impongolo zyaiko zyakwingililamo nu kufumilamo, ni milolekele yakweyo yonsi kumwi ni mikuulilwe. Uyalondolwele na masunde yakweyo yonsi kumwi na malamulo. Uyalembe apakuti yene yangalola utantiko wakwe vyonsi nu kulondela amalamulo yayo.

¹² Likwene lili lamulo lya Ng'anda ikulu yakwe Leza ino ilakuulwa papela ya mwamba. Incende yonsi apapela ya mwamba ukuzinguluka ing'anda iyo ilaya iyamuzilo kuluta. Likwene lili lamulo lya Ng'anda ikulu yakwe Leza.”

Kavuwa

¹³ Vii vili vipimo vya kavuwa, ukuomvya vipimo vili vimwi ni vya Ng'anda ikulu yakwe Leza. Ukuzinguluka apisika ya kavuwa utali wa kavuwa ukufuma pansi wali vii: apimikwe kavuwa konsi pasanzwike citika wakwe mita, mu ukulu namo mwali citika wakwe mita, alino ntupiko ya kuzinguluka pa milomo nayo yatikime amasentimita 25.

¹⁴ Ukutandikila pano kavuwa kimikwe, ukufika nu mu musana wa mwisika uno watikime citika wakwe mita, patalimfile mita wenga. Alino ukufuma mu musana wa mwisika, ukufika nu mu mutwe wa papela uwatikime nao citika wakwe mita, patalimfile yamita yaili.

¹⁵ Apapela apali iziko lino yocelangapo impolelwa, vyasanzwike yamita yaili. Na pi ziko kwene patumpwike impembe ziini, nazyo izyatalimfile citika wakwe mita.

¹⁶ Kavuwa ka papela akalingine, monsi monsi mwali yamita mutanda.

¹⁷ Incende ya pakasi nayo yalingine mu ukulu, monsi monsi mwali yamita cinimbali, mutika wakweyo wacefile kweneko citika wakwe mita. Apa sintilile kavuwa pali penepo incende ifoonke iyali citika wakwe mita mu ukulu. Iviimbili vyaku kwelela pa kavuwa vyayelile lusansa lwaku ufumondaka.

Yapaatwila Yawe kavuwa

¹⁸ Yawe Simwandalali anena ati, “We mwana wa muntu, uvwe ningo vino namakunena. Nga yamala uku kuula kavuwa, akakupaatwila kunondi, wemo uce ungocelepo impolelwa nu kukanyilapo uwazi wa nyama izilatuulilwa pa kavuwa.

¹⁹ Yasimapepo aina Levi, ana yakwe Zadoki, yali nu kwiza kunondi ku kumbombela. Ivyalanda ne Yawe Simwandalali. Wemo ukaayapela kapambasi konga akakupeela impolelwa pa kwifya kwao.

²⁰ Ukatole uwazi wakako nu kupaka ku mpembe ziini zya kavuwa na pa matungi yani ancende yapakasi, nu mu nsingo yonsi. Fwandi ali vino ulasangulula kavuwa konsi nu kukapaatwila kunondi.

²¹ Kacipambasi ka ng'ombe kano kalatuulilwa pa maifyo, ukakatole nu kukocela mu musolo wi linga lya kunzi pa ncende yaya mu pipi ni Ng'anda ikulu yakwe Leza, kunzi ya ncende yamuzilo.

²² Pa wanda walenga yaili ukatuule sawe, uwaula ulema, wa mpolelwa ya kwelela amaifyo. Ali vino ulasangulula kavuwa ndi vino wacisile apakutuula kacipambasi.

²³ Ndi wamala kusangulula, ukatuule cipambasi wa ng'ombe umutelepe, na kasuuku konga, nako kwene akaula ulema.

²⁴ Ukavilete vyonsi kuli ne Yawe na yasimapepo yace yakavisanse umusilya, yakavituulile ne Yawe impolelwa yakoca.

²⁵ Pa manda cinimbali, uce watuula cila wanda sawe wenga, kacipambasi ka ng'ombe konga na kasawe nako konga palwa kufuta kwa maifyo. Inyama zizyo zyonsi zili nu kuya izyaula ulema.

²⁶ Yasimapepo yali nu kumpaatwila kavuwa pa manda cinimbali, apakuteyanya ukuombelapo imilimo yakweo.

²⁷ Amanda yayo cinimbali ndi yasila, alino yasimapepo yali nu kutandika ukocelapo impolelwa zinu zyakoca apa kavuwa, nga ni mpolelwa zinu zyakulemana pamwi. Alino lyene nani ndamuzengela. Ivyalanda ne Yawe Simwandalali.”