Ezekelo 42 - Amazwi Yakwe Leza 2013

Amang'anda yaili yakwe yasimapepo

¹ Lyene umuntu wilya antungulula ku musolo wa kunzi lwaku katutu, nga anjingizya mu ng'anda yuze iyalozya ku musolo wa Ng'anda ikulu yakwe Leza ni ng'anda yuze ukunzi lwaku katutu.

² Ing'anda iyo yalozya mulyango ku katutu mu utali yali amamita 50, nu mu kusalala yali amamita 25.

³ Ku lusansa longa yalozizye cinso ku ncende iyali amamita amakumi yatatu na yani lwa mu mbali ya Ng'anda ikulu yakwe Leza. Nga ku lusansa luze nako yalozizye icinso ku museo waku musolo wakunzi. Yene yakuzilwe umu vintunti vitatu, na cila cintunti icali cisila, calusile icali uku nkolelo.

⁴ Uku nkolelo ya miputule iyo kwali incende yamukasi yakupitamo, ino mu kusalala yali amamita yasano, nu mu utali yali amamita amakumi yasano. Imilyango yakweyo yalozizye uku katutu.

⁵ Imiputule yapapela yali ifyenkane ukuluta iyo iyali pakasi ni ya pisika, pamulandu wakuti yene yali apafuntuke ukuluta.

⁶ Imiputule iyamu ntunti yakwe citatu yamu nkungu, nupya itatungililwe ni ncesi wa mang'anda yauze yonsi, yano yali mu musolo wa mwilinga lya kunzi.

⁷ Kwali kweneko lung'umba lwa kunzi ulwapisile ku musolo wa kunzi, pa nkolelo ya miputule nu kulungatana nayo. Lwene mu utali lwali amamita 25.

⁸ Miputule ilya yatalimpile ku lusansa lwa musolo wakunzi amamita 25. Lelo iyali ku Ng'anda ikulu yakwe Leza yene yatalimfile amamita 50.

⁹ Alino miputule ya pisika nayo yakweti uwingililo ukufuma ku lusansa lwaku ufumondaka, ukutandikila ku musolo wakunzi kuno lung'umba lwa musolo ulya lwatandikila.

¹⁰ Ukulondela mu lung'umba lwa musolo, lwaku ufumondaka, ulunga nu musolo wa ng'anda, nako kwene kwali imiputule.

¹¹ Pa nkolelo yakweyo pali apakupita, wa kamuputule akayelile kwimani. Utali wakweyo nu wipi, imikuulile pamwi ni milyango yakweyo yakufumilamo nu kwingilamo, vyonsi vyali icili conga kwene wa milyango yaku katutu.

¹² Mu ng'anda mwali imilyango yayelile kwikasa lilungi, ku lusansa lwaku ufumondaka, ukwatandikile akalilinga.

¹³ Alino umuntu wiyo anena ati, “Amang'anda yaa yaili, yaya amuzilo. Yasimapepo, akapalamila kuli Yawe, ali muno yakaliila impolelwa izitaicindamila. Pamulandu wakuti imiputule iyo yaya yamuzilo, fwandi ali muno yasimapepo yalasungila ivintu vicindamisye, ivili wa mawila ya ngano, ni mpolelwa izikatuulilwa pa kulipa amaifyo, napa viipe.

¹⁴ Lino yasimapepo yamala ukuomba mu Ng'anda ikulu yakwe Leza, nga yalonda kufumila mu musolo wa mwi linga lya kunzi, yali nu kutala yasya mu miputule kwene iyo vyakuzwala vyamuzilo vino yali yazwite lino yakuombela Yawe. Alino nupya yali nu kuzwala insalu zyuze pakuya ku ncende kuno antu yakolongine.”

Ivipimo vya ncende ya Ng'anda ikulu yakwe Leza

¹⁵ Umuntu wiyo walanga wamala sile ukupima incende ya mukasi ki linga lya kunzi, alino amfumya ne Ezekelo pa mpongolo yaku ufumondaka, atandika nu kupima ilinga lya kunzi.

¹⁶ Atola itete, apima ulusansa lyaku ufumondaka, azana nu kuti patalimfile manye yamita 250.

¹⁷ Alino apima ni tete lyakupimilako. Apima lwaku katutu azana nu kuti patalimfile manye amamita 250.

¹⁸ Nupya apima lwaku kayeya. Azana nu kuti patalimfile manye amamita 250.

¹⁹ Alino apima lwaku uwondaka ni tete lyakwe. Azana nu kuti patalimfile manye amamita 250.

²⁰ Lyene ali pakupima lung'umba ulwacingilila imbali zyonsi ukuzinguluka, azana nu kuti muli amamita 250 mu wipi. Icali cakupatukanya vyamuzilo ni vyasilesile.