Ezekelo 41 - Amazwi Yakwe Leza 2013

¹ Lyene umuntu wilya antwala mu muputule wapakasi nankasi. Lyene atandika nu kupima wingililo wauko, nao wali amamita yatatu mu utali,

² nu muwipi namo yamita yasano, nu mutika wa viumba vyakweo konsikonsi wali yamita yaili na citika. Nupya apima nu muputule kwene, mu utali wali yamita amakumi yaili.

³ Nupya aya mu muputule wakusyalikizya, atandika nu kupima mulyango wauko, incesi zyene zyali mita wenga mu kuzika, nu mu wipi namo wali yamita yatatu, nu mutika wa viumba konsikonsi wali yamita yatatu na citika.

⁴ Apima nu muputule kwene, monsi monsi wali yamita ikumi lyonga. Alino umuntu wiyo anena ati, “Uu, uli Muputule Wamuzilo kuluta.”

Imiputule yasintilile ku viumba vya Ng'anda ikulu yakwe Leza

⁵ Nupya umuntu wiyo wapimile umutika wa ciumba ca kunzi ya Ng'anda ikulu yakwe Leza, naco cali yamita yatatu. Alino kulondela ciumba kwene cico consi ca Ng'anda ikulu yakwe Leza kwaliko tumitande twa miputule tunono utwasintilileko, ukulu wakweto wali manye amamita yaili.

⁶ Utumiputule tuto twatuntikine twiili twiili. Intunti zyonsi yonga yonga zyali ni miputule amakumi yatatu yatatu. Umutika wa ciumba ca Ng'anda ikulu yakwe Leza wacepileko lwa pansi apa kusintilila tumiputule, ukwaula kusuntinkana ni ciumba.

⁷ Kwaliko ni mipanda ikulu kunzi yatumiputule utwatuntinkine konsikonsi mu Ng'anda ikulu yakwe Leza. Fwandi iviumba vya Ng'anda ikulu yakwe Leza, vyalolekanga kwati vikweti sile umutika onga, ukuyafika na papela ya tumiputule kwene tuto. Umuntu ndi wafuma mu ntunti ya pansi, apita mu ntunti yapakasi, afika na pa ntunti yapapela.

⁸ Nemo naweniko ni ciumba icazingulwike Ng'anda ikulu yakwe Leza. Catumpwike yamita yatatu ukuluta umusolo, nu kulingana na pano yakuulile utumiputule umu mbali ya Ng'anda ikulu yakwe Leza.

⁹ Ciumba ca miputule ya mumbali ca kunzi catikime amamita yaili na citika. Pasiile apakupita lwa kunzi ya miputule yazingulwike Ng'anda ikulu yakwe Leza.

¹⁰ Pa nkolelo ya miputule pali incende ukulinga amamita yaili na citika ukuzinguluka Ng'anda ikulu yakwe Leza.

¹¹ Pakufuma mu miputule yamu mbali nu kwiza pa ciumba cazingulwike Ng'anda ikulu yakwe Leza, pali umulyango onga ku katutu nauze ku kayeya, ni ciumba cakupitapo catikime amamita yaili na citika monsi monsi.

Ing'anda yaku uwondaka

¹² Kwali kweneko ni ng'anda lwaku uwondaka ukulungatana ni Ng'anda ikulu yakwe Leza. Ing'anda iyo mu utali yali amamita 50 nu mu wipi namo amamita 36. Ukuzinguluka monsi monsi amalung'umba yakweyo yali amamita 3 umu kutikama.

Ivipimo vyonsi ivya Ng'anda yakwe Leza

¹³ Lyene umuntu wilya apima Ng'anda ikulu yakwe Leza. Umu utali yali amamita amakumi yasano. Umusolo wa ng'anda iyo nga ni cikulwa kumwi ni viumba vyakweco navyo kwene vyali amamita amakumi yasano.

¹⁴ Uku nkolelo ya Ng'anda ikulu yakwe Leza lwa ku ufumondaka wa musolo ulya mu kusalala kwaiko mwali amamita amakumi yasano.

¹⁵ Lyene apima nu utali wa ng'anda ilya ukulozya lwa ku musolo lwa ku nsizi ya Ng'anda ikulu yakwe Leza, ukwikapo ni nzila zya mukasi uku lusansa ululi lonsi. Vyonsi vyali amamita amakumi yasano. Umuputule wa wingililo wa Ng'anda ikulu yakwe Leza, Ncende Yamuzilo, ni Ncende Yamuzilo kuluta,

Ulondolozi umalilike wa Ng'anda ikulu yakwe Leza

¹⁶ vyene vyonsi vyapampamilwemo imbao pansi, nu ku n'gumba, ukuyafika sile na pa mawindo.

¹⁷ Pa lung'umba lwa mukasi ka Ng'anda ikulu yakwe leza, palenzilwe ivintu vimwi ukuzinguluka sile ulung'umba lonsi, ukutandikila sile lwa mwisika ukuyafika na pafisile imilyango.

¹⁸ Yakelubi pamwi nu tuncindu ali vino vyalenzilwe penepo. Akancindu konga pakasi kakwe yakelubi yaili, nga na cila kelubi ala ali ni vinso viili.

¹⁹ Icinso ca muntu ala cisenukile uku kancindu konga, ni cinso cakwe cisama ala cisenukile uku kauze. Fwandi vivyo kwene ali vino vyalenzilwe ukuzinguluka ulung'umba lonsi ulwa Ng'anda yakwe Leza.

²⁰ Vyatandikile sile umwisika, ukufika sile na papelelile imilyango.

²¹ Amaingwe yani avisaasa vya Muputule Wamuzilo Ukuluta, yali alingane yonsi yani.

²² Apa wingililo wa Muputule Wamuzilo Ukuluta, pali penepo icintu cimwi icalolekanga wa luvuwa lwa mbao. Nalo lwatalimfile mita wenga na citika, nu mu kusalala namo mita wenga. Yaupangile ni mbao zitupu ukutandika sile uku matungi, apapela nu mu mbali kwene. Nga alino umuntu wilya atandika ukunena ati, “Lii ali tebulo ilyaya apa cinso cakwe Yawe.”

²³ Paali penepo icisaasa conga ica kwingililapo apa kuya mu Muputule Wamuzilo Ukuluta, nupya penepo ni cisaasa nacuze kwene naco ica kwingililapo apakuya uku muputule kwene, Muputule Wamuzilo Ukuluta.

²⁴ Cila mulyango wali uwa mankumbili, nu kuyulika wayulikilanga konsikonsi.

²⁵ Apa mulyango wa mankumbili kwene, palenzilwe penepo ya kelubi nu tuncindu, ndivino cali apa ng'umba. Alino ukunzi kwali kweneko ipaala lya mbao apa mulyango wa kwingililapo umu muputule.

²⁶ Umu mbali ya muputule uo, mwalimo ama windo, ni ng'umba zya uko zyalenzilwepo utuncindu.