Ezekelo 40 - Amazwi Yakwe Leza 2013

ICILOLWA CA NG'ANDA IKULU YAKWE LEZA ILI NU KWIZA ( 40:1–48:35 ) Ezekelo wasendwa ku Yelusalemu

¹ Umu mwaka walenga makumi yaili na isano ya uzya witu, cali apakutandika kwa mwaka, pa wanda walenga ikumi mu mwezi, umu mwaka walenga ikumi na iini pacisila ca kuwa kwa musumba, umu wanda kwene ulya ikasa lyakwe Yawe lyamfyambite nu kuntwala uku Yelusalemu.

² Kwati uku tulo sile, wansenzile nu kuntwaka uku mpanga ya Izlaeli nu kuntonkomalika apapela ya mwamba uutali ku lusansa lwa kukatutu ki lunji, apali icalolekanga wa musumba ukuulwe.

³ Ampalamika umu pipi, nga indola umuntu uwayengesanga wa mukuwa. Umu minwe yakwe mwali umwando upyatwe nu usavu wakwe katani ni ntuwa ya kupimilako, ala aimilile na pa mpongolo.

⁴ Alino umuntu wiyo anena ati, “We mwana wa muntu, lolekesya ningo nu kukutika ningo, uteke nu mwenzo kuli consi cino namakulanga pano ali cino yakuletile kuno apakuti nkulangilile. Nupya ali vino uli nu kumanyisya ang'anda yakwe Izlaeli vyonsi vino umalola.”

Impongolo yaku ufumondaka

⁵ Naweni iciumba icazingulwike umusolo onsi pyu uwa Ng'anda yakwe Leza. Umuntu nawe ala alemile intuwa yakupimilako umu minwe yakwe ino yali amamita yatatu umu utali, apima ni ciumba. Iciumba cali amamita yatatu ukuya papela na mamita yatatu umu kusalala.

⁶ Nga alino nupya alungama uku mpongolo yaku ufumondaka. Atampula intampulo ukuya apapela nu kupima umulyango wa mpongolo, uno wali amamita yatatu ukuzika.

⁷ Ukwingila lwa kasi, mwali utumiputule twakwe yakalinda tutatu. Na cila konga kakweti amakona yani alingane, amamita yatatu umu mbali zyonsi, nu kutikama kwa viumba pakasi kaviko kwali amamita yaili na citika. Ukupitilila patumiputule twakwe yakalinda, pali akafyototi akatalimfile amamita yatatu ukutungulula uku wingililo wa muputule uwalolenkine ni Ng'anda yakwe Leza.

⁸ Alino apima nu muputule wa kwingililamo, uno uli amamita yani. Ali uno wali umuputule wakusyalikizyapo, uno wapalamisye uku Ng'anda ikulu yakwe Leza.

⁹ Alino uku mpela ya muputule kwene uo kwali iviumba vino vyatikime citika wakwe mita wenga.

¹⁰ Imiputule iyo yakwe yakalinda, ino yali konsikonsi umu mbali ya kafyototi, yonsi yali ilingane ukukula, nu kutikama kwa viumba nako kwene walingine sile navyo.

¹¹ Nupya umuntu wiya apima akafyototi umu kusalala. Azana nu kuti kakula amamita mutanda na citika, apa wingililo pano yayalanga impongolo napo pakula amamita ukulingana na yasano.

¹² Apa miputule yonsi yakwe yakalinda, lwa pankolelo pali utu viimbili utwipi, utwali citika wakwe mita umu utali, nu kutikama kwa tuko nako kwene kwali citika wakwe mita. Imiputule iyo yakwe yakalinda, uukulu wakweyo yakweti amamita yatatu monsimonsi.

¹³ Alino umuntu wilya apima vino patalimfile ukufuma ukucisila ca muputule onga ukufika nu kumuputule uze ukucilinganya akafyototi aka kupitilamo, wazana nu kuti patalunkana amamita ikumi na yaili.

¹⁴ Umuputule uno wali uku mpelelekezyo, uwakusyalikizya lino tukuya umu musolo wa mwilinga lya kunzi, nao aupima, azana nu kuti ukweti yamita ukulingana ni ikumi umu kusalala.

¹⁵ Ukutandikila lwa panzi apa mpongolo ya kwingililamo, ukuyafika napa mpela ya muputule wakusyalikizya, paali amamita amakumi yaili na yani.

¹⁶ Umu ng'umba zya miputule yonsi, mwali inzota lwa kunzi na lwa mukasi kwene. Apa ng'umba zya mukasi izyalozyanyizye amanso, pakalawilwe ni vilengwe vya miti ya ncindo.

¹⁷ Lyene andeta ku musolo wakunzi. Kuku akuno ndola imiputule imwi nga nu museo wa mawe ukuzinguluka umusolo onsi ulya. Imiputule yonsi pamwi yali amakumi yatatu nga yalolenkine nu museo ulya.

¹⁸ Umuseo ulya wapisile umu mbali ya wingililo wa mpongolo zizi nga mu kusalala wali cili conga nu mu utali. Umuseo ulya wali uwa mwisika.

¹⁹ Lyene apima intampulo ukufuma umukasi ka wingililo wa mpongolo ya mwisika mpaka nu ku musolo wa mukasi lwa kunzi. Zyali amamita amakumi yasano monsi monsi, lwaku ufumondaka nu ku katutu kwene.

Impongolo yaku katutu

²⁰ Lyene apima impongolo ya kwingilila mu musolo wa mukasi, ino yalozya ku katutu. Apima utali wakweyo nu kusalala kwaiko.

²¹ Imiputule itatu yakwe yakalinda, ino yali itatu cila lusansa, ni viumba ivyali pakasi kaiko, nga nu muputule wa wingililo wamukasi, vyonsi vii vyali cili conga na vivi vya muputule wankolelo. Umuputule wakwe yakalinda umu utali wali amamita 25 nga mu kusalala wali amamita 12 na citika.

²² Umuputule wa wingililo, inzota zyakweo, nu tuncindu utulengwe pa ciumba, vyonsi vyakweti icipimo icili conga kwene ni vyaku mpongolo yaku ufumondaka. Kwali nu ukwelelo uwakweti intampulo cinimbali, uwaku kwelela apakuya uku mpongolo, nu muputule ukulu uwayelile ukumpela ulunga nu musolo wa kwi linga lya kunzi.

²³ Ukufuma uku mulyango waku mpongolo yaku ufumondaka, alino ukucilinganya umusolo wakwi linga lyakunzi kwali umulyango umwi uwa mpongolo, uwakupitilapo apakuya uku musolo wakwilinga lyamukasi. Nu mulyango uo wali icili conga sile nu waku ufumondaka. Umuntu wilya, ali pakupima vino impongolo zizyo ziili zyatalukine. Wazana nu kuti pali amamita cinani na citika.

Impongolo yaku kayeya

²⁴ Nupya umuntu wiya antungulula uku lusansa lwa ku katutu, ukwa yelile impongolo nayuze. Awe aipima, azana nu kuti ilingine sile ni mpongolo zyuze uku ukulu.

²⁵ Umu miputule yapa mpongolo iyo, mwali inzota wakwe zizi kwene izyali mu miputule ya mpongolo zyuze.

²⁶ Palipo nu mupanda wa makwelelo intampulo cinimbali, uwakukwelelako apa kuya uku mpongolo, nu muputule onga ukalamba uwayelile uku mpela ulunga nu musolo wakwi linga lya kunzi. Nu tuncindu utwalenzilwe uku lung'umba lwa mukasi ukulozyanya ni inzila.

²⁷ Nako kwene kwaliko impongolo iyakupitilako apakuya mu musolo wa mwilinga lya mukasi. Awe mukwai umuntu wilya atandika ukupima vino patalimfile ukufuma ku mpongolo yonga, ukuyafika nu ku yuze. Wazana nu kuti patalimfile yamita amakumi cinani na citika.

Umusolo wa mwilinga lya mukasi, ni mpongolo yaku kayeya

²⁸ Nupya umuntu wilya wampisizye ne Ezekelo apa mpongolo yaku kayeya, anjingizya nu mu musolo wa mwilinga lya mukasi. Alino apima ni mpongolo, alola nu kuti ilingine sile ni zyuze uku ukulu.

²⁹ Utumiputule, incesi nu muputule wa kwingililapo, navyo kwene vyakweti ivipimo ivili vimwi kwene. Impongolo kwene nu muputule wakwingililamo vyakweti inzota ukuzinguluka. Nu kutalimpa vyatalimfile yamita amakumi yaili na yani, umukusalala namo yamita ikumi na yaili.

³⁰ Umuputule wakwingililamo, ukuzinguluka wali yamita amakumi yaili na yasano na mamita yasano ukuzika.

³¹ Kwali kweneko nu muputule umwi ukulu, uwalungatine nu musolo wa mwilinga lya kunzi. Palenzilwe penepo nu tuncindu apa viumba vya mukasi ukulolenkana ni nzila. Pali penepo nu ukwelelo uwa ntampulo cinani, uwa kukwelela apakuya ku mpongolo kwene iyo.

Umusolo wa mwilinga lya mukasi, ni mpongolo yaku ufumondaka

³² Nupya umuntu wilya wampisizye apa mpongolo yaku ufumondaka, wantwala nu mu musolo wa mwilinga lya mukasi. Atandika nu kupima impongolo. Wazana nu kuti ili sile icili conga kwene ni zyuze uku ukulu.

³³ Ni miputule yakwe yakalinda, umuputule ukalamba, ni viumba kwene ivya mukasi, vyonsi vyalingana sile ni vyampongolo zyuze. Kwali kweneko ni nzota konsi konsi, nu mu muputule ukalamba namo kwene amuno zyali. Ni nzila iyali pakasi yali amamita amakumi yaili na yani umu utali, mu kusalala namo yamita ikumi na yaili.

³⁴ Umuputule ukalamba walungatine nu musolo wa mwilinga lya kunzi. Palenzilwe penepo nu tuncindu pa viumba vya mukasi ivyalungatine ni nzila. Pali penepo nu ukwelelo, uwakweti intampulo cinani, uwakukwelelapo pakuya uku mpongolo kwene iyo.

Umusolo wa mwilinga lya mukasi, ni mpongolo yaku katutu

³⁵ Nupya kwene, umuntu wilya wansenzile, nu kuntwala uku mpongolo yaku katutu. Atandika nu kupima impongolo. Azana nu kuti ilingine sile ni mpongolo zyuze ukukula.

³⁶ Nako kwene kwali imiputule yakwe yakalinda, ni viumba umukasi ivilengwepo, nu muputule onga ukulu, ni nzota cinani. Ni nzila iyalipo yakweti amamita amakumi yaili na yani umu utali, umu kusalala amamita ikumi na yani.

³⁷ Umuputule ukalamba walungatine nu musolo wa mwilinga lya kunzi. Palenzilwe penepo nu tuncindu pa viumba vya mukasi, ivyalungatine ni nzila. Pali penepo nu ukwelelo, uwakweti intampulo cinani, uwakukwelelepo pakuya uku mpongolo kwene iyo.

Amang'anda yauze aku mpongolo yaku katutu

³⁸ Kwali kweneko nu muputule, umulyango wauko wali umuputule wakwingililamo uwa mpongolo. Ali muno yafulilanga impolelwa zyakoca.

³⁹ Mu muputule wa mpongolo uwa kwingililapo pali amatebulo yaili ku na ku, apakufyulilapo impolelwa zyakoca, impolelwa zyakulipila pa maifyo nga ni mpolelwa zyakufuta pa viponge vya yantu.

⁴⁰ Apanzi napo pali amatebulo yani, ku yaili na ku nako yaili. Amatebulo yayo yayelile lwa umu nzila yakwizila ku mpongolo yaku katutu.

⁴¹ Mukasi ka muputule mwali amatebulo yani, apanzi napo yani, yonsi pamwi yali cinani. Ali pano yafyulilanga inyama zino yali nu kutuula impolelwa.

⁴² Amatebulo yani yano yateyanyizizyanga impolelwa zyakoca ni mpolelwa zyuze, yapangilwe na mawe awazwe, mu utali lwa papela yatalimfile citika wakwe mita, mu kusalala namo yali cikoline na mita wenga. Apa matebulo kwene yayo apano yikanga iviombelo vyakufyulila inyama zya mpolelwa.

⁴³ Apapela ukuzinguluka papangilwe icatikime ukulingana ni cizanza. Pa matebulo kwene yayo apano yikanga inyama zyonsi zyakutuula impolelwa.

⁴⁴ Mu musolo wa mwi linga lya mukasi mwali imiputule iili, onga walola ku kayeya, umu mbali ya mpongolo yaku katutu, uze nao mu mpongolo yaku kayeya, uwalozya lwaku katutu.

⁴⁵ Alino umuntu wiyo anena ukuti umuputule uno ulozizye amanso ku katutu, ali wakwe yasimapepo akatumikila mu Ng'anda ikulu yakwe Leza.

⁴⁶ Umuputule uno ulozizye amanso ku katutu nao uwakwe yasimapepo akatumikila pa kavuwa ka mpolelwa. Yonsi aina Levi, nupya ana yakwe Zadoki aonsi yonga sile ali yano yali nu kupalamila Yawe apa kumutumikila.

Umusolo wa mwilinga lya mukasi, ni Ng'anda ikulu yakwe Leza

⁴⁷ Nupya umuntu wilya apima umusolo wa mwi linga lya mukasi, monsi monsi wali amamita makumi yani na cinani na citika. Kavuwa kakocelapo impolelwa kali lwa pankolelo ya Ng'anda ikulu yakwe Leza.

⁴⁸ Alino umuntu wilya anjingizya mu muputule wakwingililamo pakuya mu Ng'anda ikulu yakwe Leza. Atandika nu kupima pa wingililo, mu utali kuya papela pali amamita yaili na citika, nupya pasaalile yamita cinimbali, ni viumba vyalipo ku na ku vyatikime mita wenga na citika.

⁴⁹ Umuputule wa kwingililamo mu utali wali yamita ikumi lyonga numu kuzika wali yamita mutanda. Wakweti nu mupanda wakukwela pakuyamo. Apa wingililo pali ni ncesi ziili, longa ku nu luze ku.