Ezekelo 4 - Amazwi Yakwe Leza 2013

Ezekelo waikolanya kwati awiyo wino akuzanza Yelusalemu

¹ Leza avwanga ati, “We mwana wa muntu, toola ulungelwa longa, nga ulwike inkolelo yako, nga usilepo imipelwa ino ikwimilila umusumba wa Yelusalemu.

² Lyene utuntumalike ingalande ukulizizya umusumba uo. Ukuule ni mpungu zyakuucevezya nu kwimika insakwe zya kuulwisya, alino ni vyaku uongolwela.

³ Alino lyene utoole icela icipapatale, icili wa lwangayo. Uciimike pakasi kako nu musumba, ulozye na manso yako ku musumba. Umusumba ulaya uzanzwe, nupya wewe kwene ulauzanza. Na cico cilaya ali cilangililo ca kusoka ing'anda yakwe Izlaeli.

⁴ “Nupya lala kambazo kwikasa limani, nu kuitwika maifyo ya ina Izlaeli. Uli nukusenda icisendo ca maifyo yao apa manda yonsi aumi wako yano ulalalilila umu musango kwene uo.

⁵ Nakupimila mpiti amanda yi iifyo lyao. Ulasenda iifyo lya ng'anda yakwe Izlaeli apa manda imyanda itatu na makumi fundimbali (390).

⁶ Lino waca wamala amanda yao, ulaswilizya ukulala pansi, kuli kambazo wikasa lilunji. Alino nupya ukaitwike iifyo lya ng'anda yakwe Yuda, apa manda amakumi yani. Apakukupimila amanda yaa, natimpenda umwaka onga wa wanda onga.

⁷ Nga nupya ulalozya amanso yako uku Yelusalemu umuzanzwe. Ulatumpula ni kasa lyako nu kulizulunzizya umunwe apa kusesemela Yelusalemu isyamo lyakwe.

⁸ Inda kunyepelela ni myando apakuti utaca uwasunkana ku na ku, mpaka uce ukamalile amanda ya ucuzi wako.

⁹ “Ale lyene senda ingano na baale, cilemba ni landa, malezi nu usozi. Uviike umu mpakwilo yonga nu kuipangila umukate. Ulinzile ukulya cakulya cico umu manda imyanda itatu na makumi fundimbali, akulala kwako muli kambazo.

¹⁰ Apa cakulya kwene cico ufwile ukupima akamokolwa kanono sile cila wanda, kakukumana uwanda upuma.

¹¹ Uce uwalinga na pakumwa amanzi. Fwandi ufwile wapima ingako sile ziili apa wanda onga upuma.

¹² Uce uwatoola amavi ya antu aume, ayano uwapembelako umoto uwakwengelako utumakeke twako utwa usu wakwe baale. Uce uwacita cico ala na antu yakulolako.”

¹³ Nga alino nupya Yawe wanenyile ati, “Umu musango uo, aina Izlaeli yalalya icakulya icikowele umu mpanga zino ndayazingila mwenemo.”

¹⁴ Lelo nani navwanzile nati, “Awe, vivyo foo we Yawe Simwandalali! Nemo ntatala nailikizya. Ukutandikila sile uku ulumendo wane ukufika na pilelo, ntatala nalya icintu iciifwile nanti icilemwe ni nyama zya mpanga. Inyama ya mifitalila itatala ingila umukanwa kane foo.”

¹⁵ Leza ali pakuti, “Icisuma, nakuzumilizya ukuomvya citindi wa ng'ombe pa ncende ya mavi ya muntu.”

¹⁶ Nga nupya anena ati, “We mwana wa muntu, indi nu kucefya ukuloleka kwa vilyo umu Yelusalemu. Antu yali nu kulalya icakulya cakupimilwa sile nga nu kumwa utumanzi tunono sile, utwa kupimilwa.

¹⁷ Yaluulilwa vyakulya na manzi. Yene yalawa ulwezwe nu kufwa nu lusala, yace yakalowe nu kulowa pamulandu wa kuntuvwa kwao.”