Ezekelo 39 - Amazwi Yakwe Leza 2013

Kucimviwa kwakwe Gogi

¹ Fwandi we mwana wa muntu, sesemela Gogi uti, Yawe Simwandalali wa vwanga wati, “Namakwalukila we Gogi, we ntunguluzi yaku Mesyeki na Tubali.

² Ndakuzingulusya, ndakutungulula, ndakutumbezya ukufuma uku katutu ukutali. Ndakuleta uku kulwisya imyamba yakwe Izlaeli.

³ Nga alino lyene ndakontola ulapwa uno ulemile ukwikasa limani nu kuleka ukuti inceto zipone pansi zino ufumbite ukwikasa lyakwe ndilo.

⁴ Ulafwila pa myamba yakwe Izlaeli, wewe kwene pamwi ni vita vyako vyonsi nga ni mitundu ino uli nayo. Ndakusangula icakulya ca vyunyi, ivilyanyi vya misango yonsi ni ca nyama zyonsi zya mpanga.

⁵ Mulafwa insansalila mu mpanga, pano ivyalanda ne Yawe Simwandalali.

⁶ Ndaponyezya umoto pa mpanga ya Magogi alino nu mu nkumba zyakwe yemba nu mwikala antu ku matwi cele. Nga alino lyene yalamanya ukuti nene indi Yawe.

⁷ Ndaleka izina lyane lyamuzilo limanyikwe mu antu yane aina Izlaeli. Ntalaleka yakasuule izina lyane lyamuzilo nupya. Nga alino lyene imitundu yonsi ilamanya ukuti nene indi Yawe, Wamuzilo wakwe Izlaeli.”

⁸ “Icintu cico cilafikiliziwa! Nu kucitika cilacitika,” ivyalanda ne Yawe Simwandalali. “Uo ali wanda uno nasowile.

⁹ Alino aikazi yamu misumba yakwe Izlaeli yalaya yakoce nu kusumbila umu moto ivyanzo, visyangu, ivisolelo, amalapwa, inceto, amasumo ni ntuwa. Yalavyoca apa myaka cinimbali.

¹⁰ Yalata ukutiya inkwi umu mpanga nu kuta ukutema imiti umu mitengo pamulandu wakuti yalapemba ivyanzo. Yalapokolola ivyuma kuli yano yayapasile, na kuli yano yayapokololwile ivyuma vyao.” Ivyalanda Yawe Simwandalali.

Ukuzikwa kwakwe Gogi

¹¹ Yawe wavwanga wati, “Lino vii vyonsi vyapita, ndapeela Gogi incende imwi ilumbukisye mu ina Izlaeli, umwakumuzika, umukonko wa Abalimu, uukacilikila alendo, uku ufumondaka wakwe Yemba wa Musilya. Ali kuno yalazika Gogi pamwi ni umba lyakwe lyonsi. Ulaamwa nu kuti cifoloma ca Hamoni Gogi.

¹² Apa myezi cinimbali, ing'anda yakwe Izlaeli ilayazika, apa kusangulula impanga.

¹³ Antu yonsi amu mpanga yalayaziika, yalolelamo nu mucinzi uwanda uno ndalanga ucindami wane. Ivyalanda ne Yawe Simwandalali.

¹⁴ Yalasontapo na antu akupitana umu mpanga ukwaula ukuta, nu kuziika insyazi pambiliwili mu mpanga, ku kuisangulula. Yalalondelezya sile vivyo kwene imyezi cinimbali.

¹⁵ Alino yalapitana mu mpanga. Umwi ndi walola amafupa ya antu, alika cimanyililo mupipi. Ali pakulanga apakuti yakazika yakize yakaziike mu cifoloma ca Hamoni Gogi.

¹⁶ Ni zina lya musumba lilaamwa Hamoni. Ali vino yalasangulula impanga iyo.”

¹⁷ Yawe Simwandalali wavwanga wati, “We mwana wa muntu nena ivyunyi vya misango yonsi ni nyama zya mpanga zyonsi uti, ‘Kolonganini, izini kuno ukufuma mu mpanga yonsi, mulongane ku malila ya mpolelwa, impolelwa ikalamba pa myamba yakwe Izlaeli. Izini mulye iminyefu nu kumwa uwazi.

¹⁸ Mukalye umunyefu wa asambazi, mukamwe nu wazi wa ntunguluzi zya pano nsi, yonsi yasuuku, utwana twa mfwele, yasawe na yacipambasi ya ng'ombe zyaku Basyani.

¹⁹ Mukalye ivya mafuta mukikute, mukamwe nu wazi, mukakoleke uku mpolelwa ino namwamako.

²⁰ Mukikute api tebulo lyane imfwalasi, yakapisya ya mfwalasi, asambazi ni vita vyonsi. Ivyalanda ne Yawe Simwandalali.’”

Leza alacindamika Izlaeli nupya

²¹ Yawe wavwanga wati, “Ali vino ndalanga imitundu ucindami wane, ni mitundu yonsi ilalola ulungi uno ndacita, nu kumanya amaka yane pano yapela.

²² Ang'anda yakwe Izlaeli nayo yalamanya ukuti nene indi Leza wao, ukutandikila pa wanda kwene uwo nu kuya ku nkolelo.

²³ Alino imitundu yonsi iluvwa ukuti aina Izlaeli yasenzilwe mu masi, pano yaifizye kunondi. Nga nani nayafisile usyu wane, pano yantalamile. Caleka nayapile mu makasa ya anisi yao nu kuleka yafwe yonsi mu nkondo.

²⁴ Nayacitile ukulingana na mankowezya yao na ucisanguka wao, nayafisile nu usyu wane.

²⁵ “Yawe Simwandalali wavwanga wati, ‘Fwandi lyene namawezezya amu mupanda wakwe Yakobo, aina Izlaeli, namasakamala ang'anda yakwe Izlaeli yonsi, namasakamala ni zina lyane lyamuzilo.

²⁶ Yalaya insonyi zyao na ucisanguka onsi uno yancitile lino yatenzi ku matwi cele mu mpanga yao umutali uwa kuyoofya.

²⁷ Lino ndayawezya ukufuma ku mitundu, lino ndayafumya mu mpanga zya anisi yao, lino ndasokolola ucindami wane muno yali pa manso ya mitundu ivule,

²⁸ alino yalamanya ukuti nene indi Yawe Leza wao. Lilyo lino ndapususya azya ku mitundu nu kuyakolonganika mu mpanga yao ukwaula kusya nanti wenga.

²⁹ Alino ntalayafisa nupya usyu wane, pano ndapongolwela Mupasi wane pa ina Izlaeli.’ ” Ivyalanda Yawe Simwandalali.