Ezekelo 36 - Amazwi Yakwe Leza 2013

Imyamba yakwe Izlaeli ilapolelelwa

¹ Yawe anena ati, “We mwana wa muntu, sema ku myamba ya Izlaeli pakuti yuvwe amazwi,

² yano ne Yawe nkuvwanga ukuti anisi ya ina Izlaeli yalazanga yati, ‘Eya! Imyamba yampiti ilya yaya icuma citu.’

³ “Fwandi lyene sema amazwi yane, landa amazwi yano ne Yawe nasya mvwange. Lino antu amitundu ya mumbali yaposile nu kusampa ivyuma vyamu myamba yamu Izlaeli, yonsi yawelanga Izlaeli.

⁴ Caleka lyene uvwini vino ne Yawe nkumunena mwe myamba na mwe twamba, namwe mwe tunguzi, namwe mwe mikonko, namwe mwe ncende izyasyala ulwanga, na mwe misumba yasyala ivitalang'anda, mwemuno antu ya mitundu ya mumbali yononyile nu kumuwela.

⁵ Nemo ne Yawe ninkalipila wakwe cimwi antu ya mitundu iyaya umu mbali, maka maka Edomu awino nacizyapo. Antu pamulandu ni cilumba cao ni misula yao yapoka impanga yane, ni ncende zya kucemelamo iviteekwa zyasanguka izyao.

⁶ “Caleka wemo usemele impanga ya Izlaeli amazwi yane. Imyamba nu twamba, nu tunguzi, ni mikonko, vinene amazwi yane yano nemo nkuvwanga cipyu cipyu pamulandu wa uzuwa, pano vikatukwa na antu ya mitundu yuze.

⁷ Nemo ne Yawe Simwandalali nalapa ukuti antu ya mitundu yaya umu mbali yalazewana.

⁸ Mu myamba yamu Izlaeli mwene mulamela imiti nupya nu kuseekamo iviseekwa ivyakuti muce mwalya mwe ina Izlaeli, mwe antu yane pano mwasya muswilile zuwazuwa ku mwinu.

⁹ Nemo indi namwe, nkulondesya nu kuti muce mwalima umusili winu nu kukomelamo imbezu.

¹⁰ Nemo ndamusandulula, mulavula wakwe cimwi. Mulaikala mu misumba nu kututulula ivitalang'anda.

¹¹ Nemo ndavuzya antu, ndavuzya ni viteekwa kwene. Mulavulilako ukuluta vino mwali mpiti, nupya mulakwata na ana avule. Ndaleka muce mwaikala ndi vino mwikalanga mpiti, nupya ndaleka mukaye ni cituku vino citatazile ciye kuno muli apa mpiti. Lyene ali lino mulamanya ukuti nene indi Yawe.

¹² Mwemo mwe ina Izlaeli mwe antu yane, ala nemo ndamuwezezya uku mwinu, pakuti muce mwalyata apa musili winu. Nao ulaya icuma cinu, utalatala nupya uponyezye ana inu inzala foo.

¹³ “Yawe Simwandalali akuti, Antu yakavwanga ukuti mwemo mwe myamba mulalya antu, nu kuti mwemo mwemwe iivi akaiya antu ya mitundu yuze.

¹⁴ Lelo ukufuma api lelo mwemo mutalalya antu nanti ukwiila antu ya mitundu yuze ana. Ivyalanda ne Yawe Simwandalali.

¹⁵ Nemo nsikulonda ukuti nupya muce mwauvwa kuno antu ya mitundu yuze yakumutuka nu kumuwela. Mutakatale nupya mukiile imitundu yuze ana. Ivyalanda ne Yawe Simwandalali.”

Imikalile ipya ya ina Izlaeli

¹⁶ Nupya Yawe avwanga kunondi ne Ezekelo, ati,

¹⁷ “We mwana wa muntu, pa nsita ino aina Izlaeli ikalanga mu mpanga yao, yacikowizye ku mikalile yao nu ku micitile yao. Kunondi imipitile yao yali iyawinyi, kwati amangu ali ku mpepo.

¹⁸ Acino nani nayazaukile ni cipyu cane, pano yakomanya antu mu mpanga, nu kukwata utuluwi utwaikowezyanga.

¹⁹ Nayapile umulandu pa mikalalile yao, na pamicitile yao, alino kuyasalanganya na yasalanganyizizye umu mpanga zya antu ya mitundu yuze.

²⁰ Lyene nupya konsi kuno yala yaya, nako kwene yasincindika awe. Na antu yonsi yakavwanga pamulandu wao yati, ‘Antu yaa ali yano Yawe wazinzile mu mpanga ino wene wayapile.’

²¹ Lelo nasakamile izina lyane licindame, lino aina Izlaeli yasawisye mu mitundu ino yasalanganilemo.

²² “Fwandi lyene nena aina Izlaeli uti, Yawe Simwandalali akuti mwe ina Izlaeli ala asi pamulandu winu uno nacisile vii, lelo apamulandu sile wi zina lyane lino mwasawisye mu mitundu muno mwasalanganile.

²³ Ndi cakuti nalanga antu ya mitundu yuze vino nemo naya uwamuzilo, nanti angala mwemo mwandetile insonyi kunoyali, lelo yene yalasininkizya ukuti nene indi Yawe. Ivyalanda ne Yawe Simwandalali. Nupya mwemwe kwene ndaleka mukamanyisye antu ya mitundu yuze ukuti nene ndi wamuzilo.

²⁴ Pano nemo ndamufumya ku antu ya mitundu yuze, ndamukolonganika ukufuma ku mpanga izyenyi zyonsi nu kumuwezezya umu mpanga inu.

²⁵ Na pakumusangulula ku tuluwi tonsi utwa mukowizye, nu kumakombezya yauze yonsi, nemo ndamukanyila amanzi asanguluke.

²⁶ Ndamupeela amano yapya akumfukilila. Ndamutonsya apakuti umukate ukutalama.

²⁷ Mupasi wane auno ndiika munomuli, nupya ndasumbako amano wakwe cimwi apakuti muce mwawaka amasunde yane ni vipope vyane vino nemo namupeela.

²⁸ Mulaikala mu mpanga ino napiile ivikolwe vinu. Mulaya antu yane sile nenga, nga nani ndaya Leza winu.

²⁹ Ndamupususya ku makombezya yonsi. Ndakonkomezya ukuti ingano zikavulisye, apakuti nupya mutace mukaponelwe ni nzala.

³⁰ Ndaleka imiti inu ikasekesye viseekwa, nu kuvuzya ivyakulya mu vyalo vinu pakuti mutace mukaponelwe nupya ni nzala iyakumuletela insonyi uku antu ya mitundu yuze.

³¹ Alino mulaiusya imipitile inu iipe yampiti, ni micitile inu yampiti iipe, alino lyene namwe kwene mulavipata pamulandu wa uyi wakwevyo nu winyi wakwevyo.

³² Mwe ina Izlaeli, nkulonda mumanye ningo ukuti nemo nsikucita vivyo vyonsi pamulandu winu foo. Nkulonda mwauvwa insonyi, pano mukaizewanya sile pa vintu vino mukacita. Ee, ivyalanda ne Yawe Simwandalali.”

³³ Nupya Yawe Simwandalali anena ati, “Lino nemo ndamuzifya ku viipe vinu vyonsi, alino ndaleka mwaikala mu misumba inu nupya, nu kuleka mukatutulule ivitalang'anda.

³⁴ Yonsi akapita mu vyalo vinu yakalola vino vyasapilwa, lelo nemo ndaleka ukuti muce mwalimamo nupya.

³⁵ Nga alino yonsi yalavwanga yati, Silolini ivyalo ivyali mpiti ulwanga, lolini lyene vino vili wa calo ca Edeni. Nga ni misumba iyaongolwike mpiti nu kuisampa nu kusyala vitalang'anda, lolini lyene vino yati yaikuula cipya cipya, nu kupindilizyako amalinga, nga na vino lyene antu yakwikala mwenemo.

³⁶ Alino antu amitundu iyaya umu mbali alasyala penepo, yalasininkizya ukuti nene ne Yawe ninkuula cipya cipya imisumba iyononike, nu kututulula ivyalo ivyalalukanga. Ee, ivyalanda ne Yawe nu kucita avino ndavicita.”

³⁷ Nupya Yawe Simwandalali avwanga ati, “Vino nemo ndacita, vilaluta pali vino navwanga. Ndaleka aina Izlaeli yace yautukila kunondi pakuti nce nayazwako. Ndaleka yakasandulukisye wa ufyo wa mfwele.

³⁸ Antu yalazuula tupu mu misumba iyasiile vitalang'anda, ndi vino umusumba wa Yelusalemu apampiti wazuulanga tupu imfwele, zino yaletanga pakupeela impolelwa apa manda makulu. Ee, alino antu yalasininkizya ukuti nene indi Yawe.”