Ezekelo 35 - Amazwi Yakwe Leza 2013

Leza alafulula Edomu

¹ Yawe avwanga kunondi ati,

² “We mwana wa muntu, lozya amanso ku mpanga ya myamba iyaku Seili nga useme amazwi akuipeela imilandu.

³ Antu aikala kweneko uyanene ukuti Yawe Simwandalali akuti, Nene mwanisi wako, we Mwamba wa Seili, nupya ndakufulula uye wa citalang'anda.

⁴ Ndonona imisumba yako nga mutalikalamo antu foo. Lyene ulamanya ukuti nene indi Yawe.

⁵ “Pano wakweti impanzela ya pee, walovizye aina Izlaeli ku lupanga umu nsita ya kucula kwao, mu nsita ya kuluvyanya kwao kwakusyalikizya.

⁶ Caleka Yawe Simwandalali wavwanga wati, ‘Nkulapa, ndaleka ukazwisye uwazi, uwazi ulakulondela. Nalapa nati, pamulandu wakuti waifya pa kuzwisya uwazi, caleka uwazi ulakulondela.

⁷ Ndasangula umwamba wa Seili ulwanga umwaula akantu, ndakoma na wensi alapita mu mpanga.

⁸ Ndazuzya imyamba iyayamo, ivyala. Yonsi pyu yalalukuta ku lupanga pa twamba twako, mu nyika zyako nga nu mu mikonko yako kwene.

⁹ Ndakusangula uye ulwanga lwa pee, ni misumba yako mutalatala mwikale umuntu nupya. Lyene alino mulamanya ukuti nene indi Yawe.’

¹⁰ “Pamulandu wakuti wanenyile inko ziili, Izlaeli na Yuda, uti mwemwe mpanga zyane tumamupoka, nanti angala mwikala ne Yawe.

¹¹ Caleka nalapa ne Yawe Leza waumi, nemo lyene ndalandula pa cipyu cako, na pa uzuwa wako, na pa lupato lwako, vino wakwatila antu yane. Alino nayo yalasininkizya ukuti nemo namayafulwila pali vino wacisile.

¹² Mu cumi, alino lyene ulasininkizya ukuti nene ne Yawe nkauvwa kuno ukavwanga musaluula musaluula uti, ‘Mu myamba yamu Izlaeli mutalasyala akantu nanti kamwi, asweswe kwene tuli nu kuvipoka.’

¹³ Nemo nkauvwa amazwi yonsi acilumba, yano ukavwanga civwangevwange pali nene. Ala nemo nkauvwa sile vyonsi.

¹⁴ “Yawe Simwandalali akuti, nemo ndakusangula ulwanga umutalatala mwikale akantu, na antu yonsi impanga yonsi yalazanga apakulola vino wemo wononeka.

¹⁵ Pamulandu wakuti wasansamwike, lino impanga ya ng'anda yakwe Izlaeli yasangwike ulwanga, nawe kwene avino ndakucita umusango uli onga kwene. Ulaya ulwanga, we mwamba wa Sili, pamwi ni mpanga yonsi yakwe Edomu. Lyene alino yalamanya ukuti nene indi Yawe.”