Ezekelo 34 - Amazwi Yakwe Leza 2013

Yakacema ya ina Izlaeli

¹ Alino Yawe avwanga kunondi ati,

² “We mwana wa muntu, semela yakacema amu Izlaeli, useme uyanene uti, avino Yawe wavwanga wati, kalanda kuli yakasema amu Izlaeli, yao akaisemela sile aeneco. Uzye yakacema yasi nu kucema ufyo?

³ Mwemo mwailyokezyanga iziya, mwazwalanga insalu izyokoswa na mavumbu ya mfwele kwene, mwakomanga imfwele iziine ningo, lelo mutacemanga ufyo foo.

⁴ Mutakomelezyanga imfwele zitonte, mutapelanga izilwale umulembo nanti kuzinyepela ivilonda. Mutawezyanga iziponge nanti kulonda izyapumbuka. Zyene zyatesilwe sile ku kalili.

⁵ Zyapasiike, pamulandu wa kuulilwa kacema. Lyene zyasangwike icakulya ca cilyanyi icili consi, zyasasantike.

⁶ Uli mulandu kwene uno ufyo wane ukalulumba sile mpanga yonsi, mu myamba na pa twamba tusanzame. Ali cino zyasansantike mpanga yonsi, ukwaula nanti wenga uwakuti azisakamale nanti kwezya kuzilonda.

⁷ “Fwandi lyene mwemo mwe yakacema uvwini vino nemo nkumunena.

⁸ Ne Yawe Simwandalali nkulapa inti, kasili, pamulandu wakuti imfwele zyane zikulemwa ku vilyanyi pamulandu wa kuulilwa kacema ndi vino namwe kwene mwe yakacema yane musiiezya nanti panono kuzilondolola, mukaisakamala sile mwenga, ukwaula kusakamala imfwele,

⁹ caleka fwandi uvwini kuno mwe yakacema.

¹⁰ Nemo ne Yawe nalanda ukuti lyene namufutatila, mwaya anisi yane. Ndamupoka imfwele zyane, mutalatala mukaziceme nupya foo. Nupya ntalaleka kuti mwaisakamala sile mwe eneco. Mwemo ndamufyombotola imfwele zyane, ntalaleka mukazilyepo nupya foo.

Kuliza kacema musuma wakwe Leza

¹¹ “Nemo ne Yawe Simwandalali nkumunena ndi vino nene kwene ndalonda imfwele zyane, nupya nene kwene ndazisunga.

¹² Ndazisunga vivi kwene vino kacema akasunga imfwele zyakwe zino zyasalangine pakutandika. Ndazikolonganika monsi muno zyasalanganile pa wanda ulya uwa cifutika nupya uwa uzanzo.

¹³ Ndazifumya mu mpanga zya mitundu yonsi. Ndazikolonganika, nkaziwezezye nu mu mpanga yakwezyo. Ndazicemela mu myamba yamu Izlaeli, ku tunguzi twa manzi, nu mu mpanga zyonsi umwikala antu.

¹⁴ Ndazicemela umwaya umulemvwe usuma, mu myamba nu ku nguzi nu mu mpanga zyonsi zya mulemvwe, izyaya mu mpanga ya Izlaeli.

¹⁵ Nene kwene ndacema imfwele zyane nu kuzitwala ukwa kupuzila. Ee, anene kwene ne Yawe nalanda.

¹⁶ “Nemo ndapita nkulonda iponge, ndawezya ni ipumbuke, yacilonda nayo ndainyepela icilonda nga nu kupozya ino yalwala. Lelo iine, nupya ikome, yene ndaisunga. Ndazicema nu mulungikila.

¹⁷ “Lelo mwemo mwe mfwele zyane, nemo ne Yawe ndamupingwila mwensi wenga wenga. Ndapaatulula mwe mfwele. Ndapaatulula pano muli yasuuku na yasawe.

¹⁸ Yamwi pano muli yatemwa ukulya umulemvwe usuma, yakomela sile ukulyatola pali vino yatakasi ukulya! Nupya ukumwa amanzi asenguke cisi cimwi kunoyali, yakavundola asyalapo ku ngazo zyao!

¹⁹ Alino Imfwele zyane zyuze izili nu kulya vino mwemo mukulyatola, izili nu kumwa amanzi yano mukuvundola.

²⁰ “Caleka fwandi nemo ne Yawe nemwisikulu namapingula apakasi ka mfwele iine ni mfwele iyonde.

²¹ Pano imfwele zitonte uku mbazo zinu mwemo mukazipumola nu kuzisunka pakuti zifume mu ufyo.

²² Lelo ndapususya imfwele zyane, ntalaleka yakazicuzye nupya. Ndazipingwila zyonsi yonga yonga, nupya ndapaatulula izisuma ni ziipe.

²³ Ndakatusya kacema uwa kuziteeka, umuomvi wane Davidi awino alaya akacema waziko nu kuzisunga aliwe alazisunga.

²⁴ Nemo ne Yawe ndaya Leza wao, nu muomvi wane Davidi aliwe alayatungulula. Ivyalanda ne Yawe.

²⁵ Ndapangana nazyo upangano cakuti zikasininkizyeko ukuti zilaikala umu longo. Ndafumyamo ivilyanyi mu mpanga yao, yalikala umutende mu lwanga nu kulala yalalala umu mitengo kwene, ni ntazi kutalaya.

²⁶ Ndaleka ikale ukuzinguluka umwamba wane. Ndatonyezyamo imvula pa nsita ilinge, nupya ilaya imvula ya upolelelo.

²⁷ Imiti yamu mpanga ilaseeka iviseekwa vyakweo, nu musili ulamezya ivyakulya vyakweo, yalikala umutende mu mpanga yao. Lyene alino yalama ukuti nene indi Yawe, lino ndaputula insinga zya makoli yao, nu kuyakulula mu makasa yakwe yao ayateeka uzya.

²⁸ Yalata ukuya ivisampwa vya mitundu, ni vilyanyi vya mpanga vitalaayalya. Yalaikala mutende, kutalaya nupya uwa kuyacuzya.

²⁹ Ndamezya ivyakulya ivya lulumbi mu vyalo vyao, mutalaya nupya ukucula uku nzala mu mpanga ni mitundu italayasuula nupya.

³⁰ Alino yonsi kwene yalamanya ukuti ne Leza wao twaya nayo, ni ng'anda yakwe Izlaeli ali yantu yane. Ivyalanda Yawe Simwandalali.

³¹ “Ala mwemwe mfwele zyane, mwemwe antu yane sile nenga, mwemwe ufyo uno nkacema, nani nene indi Leza winu sile. Ivyalanda ne Yawe Simwandalali.”