Ezekelo 33 - Amazwi Yakwe Leza 2013

Leza wasonta Ezekelo ukuya kalinda wa antu

¹ Yawe avwanga kunondi ati,

² “We mwana wa muntu, nena antu amu mutundu wako uvwange uti, Ndi nakatusizya impanga ino inkondo, nga na antu amu mpanga iyo yasonte umuntu wao wenga, pakuti awino angaya kalinda wao.

³ Nawe ndi walola kuno anisi yakupalama, alalizya intandala apakuceula antu yonsi.

⁴ Umwi nga atasumvileko amano nanti ukuvwa intandala, wiyo wene umulandu wakwe ndi cakuti anisi yiza yamukoma.

⁵ Imfwa yakwe ilaya iyakuiletelela sile umwisikulu ku mufulo wakwe, pamulandu wakukana sakamala vino yamucewile. Pano ndi cakuti asumbako amano, angutuka.

⁶ Lelo kalinda ndi walola anisi kuno yakwiza, wakana nu kulizya intandala ya kuceula antu, lyene anisi yangiza yayapumikizye, nu kuyakoma. Lelo kwene a kalinda ali wino ningapela umulandu apa mfwa yao.

⁷ “Fwandi wemo we mwana wa muntu, nemo nakucita kalinda wa mutundu onsi wa ina Izlaeli. Awewe nomba umayaceulanga kuli vino nemo namakunenanga.

⁸ Nemo ndi napingwila umuntu mwipe ukufwa, alino nawe wakana kumuceula apakusenula imisango yakwe, pakuti aikala nu umi, umwipe wiyo ndi wafwa apa uyi wakwe, awewe ndapeela umulandu apa mfwa yakwe.

⁹ Lelo wemo ndi waceula umuntu mwipe, alino wene wakana ukuta ukwifya, lyene umwisikulu alafwila pa uyi wakwe, lelo wemo ulapusuka.”

Umuntu wensi alailolwela pa vicitwa vyakwe

¹⁰ Yawe anena ati, “We mwana wa muntu nena aina Izlaeli ndi vino mwemo mukailizyanya muti, ‘Swemo twanyomelwa ni viipe vitu, nu mufulo uno twacita. Twatituya tukucepelako nu kwikala pano nsi kwene kwatikutufuulila.’

¹¹ Yanene ukuti kasili nalapa ne Yawe umumi, ala nemo cisinzanzya apakulola kuno umuntu umwipe akufwa. Nemo natemwa ukulola kuno umuntu mwipe wazenzuka, apakuti aikala uwa umi. Caleka mwemo mwe ina Izlaeli tiini imisango inu iipe, muitelele. Kuno icani cino mungalondela ukufwa?

¹² “Caleka we mwana wa muntu, nena aina Izlaeli uti, umuntu musuma ndi waifya, ala vino wene wacitanga mpiti vitangamupususya foo. Umuntu mwipe ndi wazenzuka, ala uyi wakwe uwa mpiti utanga umuletelele foo. Nu muntu musuma nawe ndi waifya, ala wene atanga aikalilile umi awe.

¹³ Nemo nga nanena umuntu musuma ukwikala nu uumi, alino nawe wataila ukuzifya na mbali akwifya, lyene nemo apa visuma vyakwe ivyampiti intaliusyapo nanti cimwi. Alafwila sile apa uyi wakwe.

¹⁴ Lelo nemo nga cakuti na ceula umwipe ukuti amafwa, nga nawe wata ukwifya, watandika nu kucita ivya ulungi ni vyaololoke,

¹⁵ ivili wa kuwezya ivya kulemela umulandu pali vino wakongwile, wawezya navino wivile, amalondela amasunde akatwala uku uumi, wene atalafwa foo, alaya nu umi pee.

¹⁶ Nemo ndamuyelela uluse apa uyi wakwe onsi uno wacisile mpiti. Alaikala nu umi apamulandu nu kuzifya kwakwe na pa kulungika kwakwe.

¹⁷ “Nga nupya aina Izlaeli yauzo yakavwanga ukuti, ‘Vino nemo ne Yawe nkacita, vitalolamo!’ Ala mwine yame imisango sile yao aino itafikapo.

¹⁸ Umuntu musuma nga wata ukuzifya, watandika nu kwifya, ala alafwila umu uyi.

¹⁹ Umuntu mwipe nawe nga watandika ukuzifya, wata ukwifya, umuntu wiyo ala alapusuka.

²⁰ Alino, lyene mwemo mwe ina Izlaeli, mukulanda muti, ‘Vino nemo ne Yawe nkacita vitalolamo, vwile? Ala nkumunena mwemo mwensi ndamupingwila wenga wenga ukulingana ndi vino mukacita.’ ”

Umusumba wa Yelusalemu wapokwa

²¹ Mu mwaka walenga ikumi na iili, pa wanda walenga yasano uwa mwezi walenga ikumi, ala tucili mu uzya, umuntu umwi uwapusumwike mu Yelusalemu, wizile anena ne Ezekelo ukuti yatiyapoka umusumba.

²² Amanguzi yalya lino umuntu wiya atatala wiza, ala amaka yakwe Yawe yatiyiza munondi. Lino umuntu wiyo wafisile akatondo, wazanyile Yawe watansapula ululimi, na uciulu wane ala watiusila mpiti.

Amaifyo ya ina Izlaeli yalayaletelela

²³ Alino Yawe avwanga kunondi ati,

²⁴ “We mwana wa muntu, antu yano yakaikala mu matongwa yamu Izlaeli yavwanga yati, ‘Abulaamu wali sile wenga lino yamupiile impanga ii. Lelo swemo tuli aingi. Lyene fwandi impanga ii, iitu.’

²⁵ “Caleka uyanene uti, ‘Yawe Simwandalali wavwanga wati, Mwemo mukalya inyama ino icili nu wazimo. Mukapepa utuluwi twinu, nupya mwemwe yacikoma. Uzye fwandi icingalenga ukuti impanga ii iye iyakwinu, icani?

²⁶ Mwemo mwataila mu malupanga inu, nga mukacita ni viipe, cila muntu akalongozya na muka muze. Ale lyene icingalenga ukuti impanga ii iye iyakwinu icani?’

²⁷ “Caleka yanene uti, ‘Yawe Simwandalali walapa wati, Awe cumi kasili, antu aikala mu matongwa yalakomwa umu nkondo. Na yano yikala mu mpanga ndaleka yalike ku nyama zyamu mpanga. Na yano yafisama mu macele nu mu myamba nayo yalafwa ku mpungo.

²⁸ Ndasangula impanga iye ulwanga, umutaya akantu nanti kamwi. Ndamala ni cilumba ca maka yao. Imyamba yamu Izlaeli ilononeka, mutalaya nu wakupita mwenemo.

²⁹ Alino yalamanya ukuti nene indi Yawe, lilyo lino ndasangula impanga ulwanga umutaya akantu nanti kamwi, pamulandu nu uyi wao uno yacita.’ ”

Ivilatumbuka umukukana londela usemo wakwe kasema

³⁰ Nupya kwene Yawe anena ati, “We mwana wa muntu, antu amu mutundu wako yakalanda pali wewe lino yakomenkana api liinga na pa milyango ya mang'anda, ala yakunenana yakuti, ‘Izini tuvwe amazwi yafuma kuli Yawe.’

³¹ Antu yane yakaiza kunuli iumba likalamba, yiza yikala pa nkolelo yako apa kuvwa amazwi yako, lelo yakana ukuyalondela. Mu tunwa twao mwazula intumpu, nu mu myenzo yao mwaya ulwiswa lwa vyuma vino yakalonkela uku ukakasi.

³² Kuli alio waya wa lwimbo lwa citemwiko, luno yakaimba usaka nu kulizya ingoma. Pano yene yakauvwa amazwi yako, lelo kusi nanti wenga wino akayalondela.

³³ Lino vivyo viliza, nupya vili mupipi vyasya vize, lyene alino yalamanya ukuti pakasi kao pali kasema.”