Ezekelo 32 - Amazwi Yakwe Leza 2013

Falao yamukolanya kuli mung'amba

¹ Apa wanda wakwe conga, wa mwezi walenga ikumi na iili, uwa mwaka walenga ikumi na iili, Yawe avwanga kunondi ati,

² “We mwana wa muntu, imbila Falao, umwene waku Eguputo, ulwimbo lwa ndosya. Umunene ilandwe lii uti, Wemo ukoline na cisama apakasi ka nko. Ukoline na mung'amba muli yemba wino akuitamola apa manzi

³ Yawe Simwandalali walanda wati, ndakonganika pamwi antu amitundu ivule, nga ndakulema umwi sumbo lyane nu kukuvuwila ku cituntu.

⁴ Ndakutama pansi nu kukuvwintila mu calo. Ndaleka ivyunyi vyonsi vya mulwelele ni nyama zya mpanga kuti vikulye.

⁵ Ndasansanta umunyefu wako pa myamba ni vyasyala vyako ndaviika mu vifoloma mpaka vizule.

⁶ Ndapongolola uwazi wako mpaka usansantikile mu myamba, nga inguzi nazyo zilazulamo iminyefu yako.

⁷ Lino ndakonona, ndavimba ulwelele nu kusisya intanda. Ilanzi ndalivimba ikumbi, nga umwezi nao utalawala.

⁸ Ndazimya vyonsi ivya mwiyulu ivikawala. Ndaponyezya imfinzi apa mpanga yako. Ivyalanda ne Yawe Simwandalali.

⁹ “Ndaanola imyenzo ya antu avule amitundu yuze, lilyo lino ndakuletela uononesi apakasi ka nko, uku mpanga zino utamanyile.

¹⁰ Vino ndacita kunuli vilazungula antu avule. Yamwene yao nayo yalakankamala sile uku ntete pakutezela wewe. Apa wanda wakuwa kwako cila wenga alazakaza uku ntete apakutezela umi wakwe.

¹¹ “Pano Yawe Simwandalali akuti, Ulupanga lwa mwene waku Babiloni lulakwizila.

¹² Ndalenga kuti ivita vyako vyonsi vikomwe ku malupanga ya asilika amu nko zyuze ankalwe nupya amaka. Yene yaliifya kuyemba kwakwe Eguputo nu konona ivita vyakwe vyonsi.

¹³ Ndonona ing'ombe zyao zyonsi zino zikala umupipi na manzi avule amu mpanga iyo. Ku manzi yayo kutalatala kuye umuntu wakulyatolamo nanti inkamba zya nyama.

¹⁴ Alino lyene ndalenga amanzi yakweneko yasengame nga ni nguzi zyakonkoloka wa mafuta. Ivyalanda ne Yawe.

¹⁵ Eguputo ndamusangula ulwanga, nupya ndonona impanga ilya yonsi, nga lino ndakoma yonsi aikala mwenemo alino yalamanya ukuti nene indi Yawe.

¹⁶ “Amazwi yane yaa yalaya ulwimbo lwa ndosya, nga akazyana ainamasi yalaimba, ukwimbilila Eguputo ni vita vyakwe. Ivyalanda ne Yawe Simwandalali.”

Impanga ya antu afwe

¹⁷ Apa wanda walenga ikumi na yasano wa mwezi, mu mwaka walenga ikumi na iili, Yawe avwanga kunondi ati,

¹⁸ “We mwana wa muntu, losya wakwe cimwi pamulandu wa antu avule amu Eguputo, nga yene pamwi na antu amu mpanga zyuze uyatwale pansi mu mpanga ya afwe.

¹⁹ Uyanene uti, ‘Uzye mwemo yamusumbako amano kuluta antu yauze? Tentemukilini kwi lindi pamwi na antu yauze yano yatasilamulwa.’

²⁰ Aina Eguputo yalawa apakasi ka antu yano yakomilwe umu nkondo. Ulupanga lwati luteyanyiziwa uku yakomola yonsi kwene pyu.

²¹ Umukasi ka malindi, ivita ivikalambane kumwi na antu yonsi yano yavyazwilizyanga ukulwa inkondo, nayo ali pakupokelela aina Eguputo ku cifulo ca yasipwa. Nu kupunda yatandika ukupunda iyati, ‘Antu yano yasuuzile Leza, yano yafwile umu nkondo, aeya yiza kuno, aeya yalala paa!’

²² “Kuku kwene ukuli Asilya ni vita vyakwe vyonsi. Amalindi ya antu yano wakoma yatiyamulizizya, yonsi yano yakomilwe umu nkondo.

²³ Amalindi yao yali mu cifulo cizike mu mpanga ya antu afwe ni vita vyakwe vilambalile ukuzinguluka ilindi. Antu yonsi yano yaponyizye ingofyo mu mpanga ya apuma yatiyakomwa, yakomwa umu nkondo.

²⁴ “Elamu ali kuku kwene, pamwi na malindi ya vita vyakwe vyonsi ala yamuzingulwike monsi. Yonsi kwene yakomilwe mu nkondo, nga yonsi kwene yazisilwe ukwaula kusilamulwa, yaya ku mpanga ya afwe. Lino yali nu umi yaponyizye ingofyo, lelo ndakai yatiyapupana nupya afwe nga yalambalile nu mu mpanga ya afwe.

²⁵ Elamu wiyo yamupangila incende yakusendamapo apakasi ka antu afwe, kumwi ni vita vyakwe vyonsi, yalambalile mu malindi. Yonsi kwene yatasilamulwa, yakomilwe umu nkondo. Endi, pamulandu wakuti antu kwene yayo yaponyizye ingofyo mu mpanga ya antu apuma, ndakai insonyi zyatiziyalema pamwi na yayo ali mu mpanga ya afwe. Yene yikwa pakasi ka antu akomwa.

²⁶ “Kuku kwene ukuli Mesyeki na Tubali. Ivita vyakwe vyonsi vili mu malindi yano yavizingulwike. Yonsi kwene atasilamulwa, yakomilwe umu nkondo pamulandu wakuti yaponyizye ingofyo mu mpanga ya antu apuma.

²⁷ Uzye yene yatalambalile na asilika yauze atasilamulwa yano yafwa, yano aya ku mpanga ya afwe kumwi ni vyanzo vyao vya ulwi? Amalupanga yao yaisile apisika lya mitwe yao, nga ni visyangu vyao yavimbilikizye imili yao, pano ingofyo zya vita kwene vivi alanga zyapona monsi mu mpanga ya antu apuma.

²⁸ “Fwandi ali vino na ina Eguputo yalaongoteka nu kulambalala pamwi na antu atasilamulwa, afwilile mu nkondo.

²⁹ “Kuku kwene ukuli Edomu pamwi na yamwene yakwe. Yali ivita vikalambane, lelo pali ndakai yalambalala umu mpanga ya afwe, pamwi na antu atasilamulwa yano yafwile mu nkondo.

³⁰ “Intunguluzi zyonsi zyaku katutu nazyo zili kuku, zili pamwi na ina Sidoni yonsi. Apa mpiti ali yano yoofyanga antu pamulandu na maka yao, lelo apilelo yiza ni nsonyi kuno ku mpanga ya afwe, pamwi na antu afwilile mu nkondo, nu ukuzikwa ali kuno yazikwa ukwaula kusilamulwa. Yalingana sile kuzewana pamwi na antu yano yiza ku mpanga ya afwe.

³¹ “Caleka nemo ne Yawe nalanda nati, lino Falao umwene waku Eguputo alalola yonsi, imfwa yakwe ilamutekezya umwenzo pali ponga ni mfwa ya vita vyakwe vyonsi ivyafwilile mu nkondo. Ivyalanda ne Yawe Simwandalali.

³² “Nanti angala wino wasalanganyanga ingofyo mu mpanga ya apuma watalambalala pamwi na atasilamulwa yano yafwile mu nkondo.” Ee anene ne Yawe nkuyanenelapo.