Ezekelo 31 - Amazwi Yakwe Leza 2013

Eguputo yala muwisya wa muti umukelide

¹ Apa wanda wakwe conga uwa mwezi wakwe citatu, mu mwaka walenga ikumi na onga uwa kusendwa mu uzya, Yawe avwanga kunondi ati,

² “We mwana wa muntu, nena Falao umwene waku Eguputo pamwi ni vita vyakwe uti, uzye aweni wino angakolana namwe?

³ Endi, namamukolanya nu mukelide waku Lebanoni, uno ukweti misambo iyembe, iyacisao. Wene utali wakwe cimwi cakuti intonje yakweo ifisile nu mu makumbi.

⁴ Amanzi alio yakaukuzya, nga nu tufukoka atuno tukautalimfya. Utunguzi tukapongolokela icisinte cakweo ukucizinguluka nu tumifolo twakweo tukapongolokela ku miti yonsi yamu mutengo.

⁵ Acino umuti uo utalimpa wakwe cimwi ukuluta imiti yonsi yamu mutengo. Ni misambo yakweo ikulilako ni nsaala zyakweo zitalimpilako, zisakata pamulandu wa manzi avule.

⁶ Ivyunyi vyonsi vya mulwelele vyalusile ivinsanzo vyakwevyo mu misambo yakweo. Inyama zyonsi zyamu mpanga zyavyalile umwisika ya nsala zyakweo. Antu yonsi amu nko yatenzi mu cisao cakweo.

⁷ Wene wali umuti uyembe wakwe cimwi, ni misambo yakweo iyanze ningo, pano imisisi yakweo yazisile ukufika apali amanzi avule.

⁸ Kutali umukelide mu calo cakwe Leza uno wakoline nu uliyo, nanti imilemo imipaini kwene itange ilingane ni misambo yakweyo, nanti umuti uze uwamu calo cakwe Leza utange ulingane nu uliyo umu kuyemba.

⁹ Nene nauyemvizye apakuuvuzizya imisambo, nga acino ni miti yuze yamu Edeni, calo cakwe Leza ikuuvwila ulozo.

¹⁰ “Caleka Yawe Simwandalali walanda wati, pamulandu wakuti umuti ulya watalimfile wakwe cimwi iufika mpaka nu mu makumbi, nga na pamulandu wakuti wali ni cilumba ca utali wakweco,

¹¹ nemo naupiile mu makasa ya ntunguluzi ya antu ya mitundu yuze, kuti iyapezye ukulingana ni micitile yao iyankota.

¹² Ainamasi ankalwe sana nayo yacitema nu kucisya. Imisambo yakweco iponela apa myamba nu mu vifoloma. Imisambo yakweyo yalambalile mu nguzi zya mpanga ilya. Antu amu nko zyonsi zya nsi yafumile mu cisao cakweo yausya.

¹³ Ivyunyi vyonsi vya mulwelele vyatenzi apa cimuti cipone, nga ni nyama zya mpanga zyonsi zyali apa misambo yakweo.

¹⁴ Caleka ukufuma ndakai kusi nanti cimuti cuze, cino catapililwa ningo, icilakula nu kutalimpa mpaka intonje yakweco ifike nu mu makumbi, wa cimuti kwene cico. Pano yonsi kwene uyo wakweyo imfwa, ukuya ku mpanga ya pansi, ukwikala pamwi na antu aina kufwa, yano yaya mpiti kuzimo.”

¹⁵ Yawe Simwandalali akuti, “Pa wanda uno umukelide ulya ulalambalikwa mwi lindi, ndaleka amanzi apa nsi ya musili yauvimbilikizye, apakuya icimanyililo ca ku ulosya. Nene nacilikile utunguzi twakweo, nu kulesya amanzi yakweo avule. Nemo naponyizye ulanda pali Lebanoni pamulandu wa cimuti cico, nga ni miti yonsi yamu mutengo iyuma.

¹⁶ Nalenzile kuti antu amitundu yamu nko zyuze yazakaze uku ntete apa kuvwa ukuwa kwakweco, lilyo lino nacilambalalike mwi lindi pamwi na afwe. Lyene imiti yonsi yamu Edeni, kumwi na yonsi iyembe yamu Lebanoni, imiti yonsi iyatapililwe ningo, ino ili kuzimo, ilazangila mu kuwa kwakweco.

¹⁷ Yayo aikala mu cisao cakweo, ainamasi yonsi aikala pakasi ka nko, nayo kwene yaya kuzimo pamwi naco, yuminkana na yayo akomilwe mu nkondo.

¹⁸ “Uzye umuti cii umu miti yamu Edeni uno ungakolana nawe mu lulumbi nu ukulu? Lelo nawe kwene pamwi ni miti yamu Edeni yalamutwala kuzimo. Mulalambalala pamwi na yayo atamanya Leza nga na yayo akomilwe umu nkondo. Cimuti cici, ali Falao kwene pamwi ni vita vyakwe vyonsi. Ivyalanda ne Yawe Simwandalali.”