Ezekelo 30 - Amazwi Yakwe Leza 2013

Leza alafulula impanga ya Eguputo

¹ Yawe avwanga kunondi ati,

² “We mwana wa muntu, sema uti, Yawe Simwandalali wavwanga wati pundini muti, ‘Ala uwanda nu kusyama mwe!

³ Pano uwanda watiupalama, uwanda wakwe Yawe watiupalama. Ulaya uwanda wa cifutika, uwanda wakupezya imitundu.

⁴ Ulupanga lulizila Eguputo, intete zikulu zilalema aina Kusyi, alasyala impondo yalapona mu Eguputo, lino yalasenda ivyuma vyaya mwenemo nu konona imifula ino wakulilwapo.’

⁵ Mu nkondo iyo mulafwamo ivita vyaku Kusyi, na aku Lidya na aku Libya, na aku Alabya, na aku Kubu, nga mulafwamo na antu yane kwene.”

⁶ Yawe walanda wati, “Yonsi yano yakwazwilizya aina Eguputo yalakomwa. Ni vita vya cilumba vya ina Eguputo vilononwa. Ukutandikila ku Migidoli ukufika nu ku Aswani antu yakwe yalakomwa ku lupanga. Ivyalanda ne Yawe Simwandalali.

⁷ Impanga ya Eguputo ilasanguka amatololo, ni misumba yakweyo ilaya wa vitalang'anda.

⁸ Lino ndasontenka umoto mu Eguputo nu konona yonsi yano yakamwazwilizya, alino lyene yalamanya ukuti nene indi Yawe.

⁹ “Mu wanda ulya, ndatuma inkombe mu vimawato kuti zize zyoofye aina Kusyi, nga yene yalazakaza uku ntete apa wanda ulya lino impanga ya Eguputo ilononwa, pamulandu wakuti uwanda uo uliza.

¹⁰ “Yawe walanda wati, ndatuma Nebukadineza umwene waku Babiloni kuti alovye icuma cakwe Eguputo.

¹¹ Wene, pamwi ni vita vyakwe ivinkalwe, yaliza ku konona impanga. Yalasomola amalupanga yao nu kuzanza aina Eguputo, nga mu mpanga ilya mulazula ivyala.

¹² Ndakamya uluzi lwa Nailo nu kukazya impanga ya Eguputo ku antu aipe. Ndaomvya ainamasi apa konona impanga ilya kumwi na vyonsi ivyaya mwenemo. Ne Yawe natindanda.”

¹³ Yawe Simwandalali walanda wati, “Ndonona utuluwi kumwi na maunkolanya aku Memfisi. Kutalatala kuye umwene nupya mu Eguputo. Nupya ndoofya yonsi aikala monsi mu mpanga kwene ilya.

¹⁴ Umusumba wa Patilosi ndausangula ulwanga. Umusumba wa Zoani ndausonteka umoto, nu kuvunuka umusumba wa Teebesi.

¹⁵ Ndapongolwela ukali wane pa musumba wa Pelusiumu, ilinga likome lyakwe Eguputo, nu konona icuma cakwe Teebesi.

¹⁶ Ndasonteka Eguputo umoto, nga Pelusiumu nawe alanyongotoka sile ku ukali. Amalinga yaku Teebesi nayo yalaongololwa, nga Memfisi nawe alononeka pyu.

¹⁷ Alumendo amu musumba wa Heliopolisi nu ku Bubastisi yalakomwa ku lupanga, nga na ikazi amu misumba iyo yalasendwa mu uzya.

¹⁸ Imfinzi ilandatila Taapanesi, lilyo lino ndavuna amaka yakwe Eguputo kuku kwene. Lyene ni cilumba cakwe cilamuputuka. Amakumbi yalamuvimba, nga ni mizi yakwe ilasendwa ku uzya.

¹⁹ Acino ndavunuka aina Eguputo, lyene yalamanya ukuti nene indi Yawe.”

Amaka ya mwene waku Eguputo yatembolwa

²⁰ Pa wanda wakwe cinimbali, uwa mwezi wakwe conga, uwa mwaka walenga ikumi na onga, Yawe avwanga kunondi ati,

²¹ “We mwana wa muntu, nemo natimvuna ikasa lyakwe Falao umwene waku Eguputo. Lyene lisi lipombelezye ni cisalu kuti lipoziwe nanti ukunyepelelwa umuti kuti likome apakuti lileme ulupanga.

²² Caleka nemo ne Yawe Simwandalali nalanda nati, natinja umwanisi wakwe Falao umwene waku Eguputo. Ndavunola amakasa yakwe yoili kwene, ilipuma ni lifwe kwene, nu kulenga ukuti ulupanga lupone ukufuma mu minwe yakwe.

²³ Ndasalanganyizizya aina Eguputo umu nko zyuze nu kuyasansantila mu mpanga izivule.

²⁴ Ndakomya amakasa ya mwene waku Babiloni, nu kumufumbatika ulupanga lwane. Lelo ndakontola amakasa yakwe Falao, nga nawe alanyunguluka pa manso ya mwanisi wakwe wa muntu uwataciswa.

²⁵ Ndakomya amakasa ya mwene waku Babiloni, lelo amakasa yakwe Falao ndayatovola. Lyene antu yalamanya ukuti nene indi Yawe, lilyo lino ndafumbatika umwene waku Babiloni ulupanga nga nawe aluomvye apa kukoma aina Eguputo.

²⁶ Ndasalanganyizizya aina Eguputo umu nko zyuze nu kuyasansantila mu mpanga izivule. Alino lyene yalamanya ukuti nene indi Yawe.”