Ezekelo 29 - Amazwi Yakwe Leza 2013

Ivilaponela aina Eguputo

¹ Umu mwaka walenga ikumi, apa wanda wi kumi na yaili wa mwezi wi kumi, Yawe avwanga kunondi ati,

² “We mwana wa muntu sumba amanso kuli Falao, umwene waku Eguputo, umusesemele pamwi na Eguputo wensi.

³ Vwanga kunoli uti, Yawe Simwandalali walanda wati, lyene namakufutukila we Falao, umwene waku Eguputo, mung'amba mukulu we, wemuno ukalambalala mukasi kakwe Nailo nu kuitanka uti, ‘Nailo ali cuma cane, nene namupanga.’

⁴ Namakovya ivikonkoli mu mazaka yako, namafyantika ni nswi zyamuli Nailo mu vikooko, namakukwetela ukunzi nu kukufumya muli Nailo wako pamwi ni nswi zyamuli Nailo wako kwene, zino zyafyantama mu vikooko vyako.

⁵ Nkukuvwintila mu lwanga pamwi ni nswi zyamuli Nailo wako. Ulaponela pansi usalile, yatalakulombola nanti kukuzika. Ndakucita cakulya ca nyama zya mpanga ni vyunyi vyamu lwelele,

⁶ pakuti akaya amu Eguputo yakamanye ukuti nene indi Yawe. Pano amwemwe aina Izlaeli yasintililemo wa ntuwa yi tete.

⁷ Ndi yailema ikontokela mu minwe yao nu kuyalepola iminwe yonsi. Ndi yasintilila kunuli uvunika, nu kusunkanya imisana yao.

⁸ “Caleka Yawe Simwandalali walanda wati, lola ndakutumila ulupanga lwa kukukoma, we mweneco kwene na antu yako kumwi ni viteekwa vyako.

⁹ Mpanga ya Eguputo ilasanguka ulwanga umutaya antu. Alino yalamanya ukuti nene indi Yawe. Pano wene wavwanzile ati Nailo ali cuma cane, nene namupanzile.

¹⁰ Caleka nemo namakufutukila, wewe kwene na Nailo wako. Namasangula impanga ya Eguputo ulwanga umu siikalwa umuntu, kutandikila ku Migidoli ukufika nu ku Siyene, na kuli nande waku Kusyi.

¹¹ Mutalapita ulwazo lwa muntu, nu lwazo lwa nyama lutalalyatamo. Impanga iyo ilasyala ulwanga ukwaula uwakwikalamo imyaka amakumi yani.

¹² Ndasangula impanga ya Eguputo ulwanga mukasi ka mpanga izyononeka. Pa myaka amakumi yani imisumba yayamo ilaya amatongwa mukasi ka misumba iyononeka. Ndasalanganyizizya na ina Eguputo mu mitundu nu kuyapasila mu masi.”

¹³ Pano Yawe Simwandalali wavwanga wati, “Imyaka amakumi yani ndi yapita alino ndakolonganika aina Eguputo nu kuyafumya mu mitundu muno nayapasila.

¹⁴ Ndafumya aina Eguputo mu uzya nu kuyawezezya mu mpanga ya Patilosi, yacivyalilwa. Amuno yalakwata uwene waulwa amaka.

¹⁵ Mucumi, Eguputo alaya uwene uwaulwa amaka ukuluta uwene uli onsi. Atalatala ateeke imitundu yuze. Ndamucefya, pakuti atakateeke nalyuze imitundu.

¹⁶ Eguputo lyene atalaya wakuti akaya ya nsi nanti akaya ya mpanga yakwe Izlaeli yangatailamo. Alasinila aina Izlaeli pa uyi uno yacisile pa kumulenga uwazwilizyo. Alino lyene yalamanya ukuti nene indi Yawe Simwandalali.”

Umwene Nebukadineza alacimvya Eguputo

¹⁷ Mu mwaka walenga amakumi yaili na cinimbali, pa wanda wa kutandika kwa mwezi wakutandika, Yawe avwanga kunondi ati,

¹⁸ “We mwana wa muntu, Nebukadineza umwene waku Babiloni, watatuma ivita pamwi ni vita vyakwe ku ulwi ukalamba uwa kulwisya Tuli. Yonsi yatiyapela inkuuzu ni viye vyonsi vyativikuzoka. Lelo umweneco wa vita vyakwe yataweni icilambu pa mulimo onsi uno yaombile ku Tuli.

¹⁹ Caleka Yawe Simwandalali wavwanga wati lola, namasumba impanga ya Eguputo mu makasa yakwe Nebukadineza, umwene waku Babiloni. Wene alatola ivyuma vyayamo, akavisampe nu kuvisenda, pakulipila ivita vyakwe.

²⁰ Na pakumulambula pa mulimo wakwe wa kulwisya Tuli, ndamupeela impanga ya Eguputo, pano ali wino wambombile. Ivyalanda ne Yawe Simwandalali.

²¹ Pa wanda uno ndawezezya aina Izlaeli amaka, nawe ndakupeela insambu yakwasamula umulomo wako kunoyali. Alino yalamanya ukuti nene indi Yawe.”