Ezekelo 28 - Amazwi Yakwe Leza 2013

Usemo wa pa mwene wa ina Tuli

¹ Yawe avwanga kunondi ati,

² “We mwana wa muntu, nena intunguluzi yakwe Tuli uti, Yawe Simwandalali walanda akuti wemo mu cilumba camu mwenzo wako walanda wati wewe uli Leza. Nikala wa mwene pa cilimba cakwe yaleza umwi ziya muli yemba. Lelo wewe muntu, usi leza awe, nanti angala ukwelenganya ukuti wewe wamano wakwe leza.

³ Wemo ukwelenganya ukuti wewe wamano ukuluta Danieli cakuti kusi inkama izingafiswa kunuli.

⁴ Amano yako nu kwiluka kwako vyativikulenga ukulonka vyuma nu kuitulikila zaabu na siluva umu vipao vyako.

⁵ Wemo wali umulamoke mukucita uculuzi nupya watwalilile kukwata umuzano wakwe cimwi, ali cino uli ni cilumba pamulandu wa vyuma vyako.”

⁶ Caleka Yawe Simwandalali walanda wati, “Pamulandu wakuti wemo ukwelenganya ukuti wewe wa mano ukuluta leza,

⁷ nemo namakuletela ainamasi kuti yakupezye. Yene antu yamwi akakate ukuluta. Yalasomola amalupanga yao kuti yonone ukuyemba kwako na mano yako nga nu kutotola ululumbi lwako.

⁸ Yalakukoma nu kukusumbila mu ciwina ca manzi nga nawe ulafwa imfwa iipisye mwi tenga muli yemba.

⁹ Uzye lyene ulasya uvwange ukuti wewe kaleza apa manso yakwe yayo alakukoma? Awe, wemo ulaloleka wa muntu, lino ulaya mu makasa yakwe yayo alakukoma, lelo asi wakwe kaleza foo.

¹⁰ Wemo ulafwa wakwe simbwa, ainamasi yayo atamanya ne Leza, yalakukoma. Ee, anene ne Yawe nakunenelapo nu kukukonkomezezya penepo.”

Yalosya umwene waku Tuli

¹¹ Yawe avwanga kunondi ati,

¹² “We mwana wa muntu, saula ulwimbo lwakulosya umwene waku Tuli. Munene ukuti ne Yawe nkunena umwene waku Tuli inti, ‘Wemo wali icilangililo cimalilike, amano yako yazile tupu nu kuyemba kufumaluke.

¹³ Wikalanga mu Edeni, mu calo cakwe Leza, wazwalanga tumawe tukankala twa misango yonsi. Utuli wakwe lubi, topazi, emalodi, belulo, onikisi, yaspele, safilo, na daimondi. Tuto tonsi awewe twapangilwe uwanda uno waumvilwe.

¹⁴ Nakutozile pa mwamba wamuzilo wakwe Leza, nakupile na kelubi waku kulinda, wafyatanga na pakasi ka munyeswa wa moto.

¹⁵ Wali ni mipitile ya ukayele, ukufuma uwanda uno waumvilwe ukufika nu wanda uno yatandike ukuzana uyi munuli.

¹⁶ Uculuzi wako uvulane wakulenzile kuya nu ukakasi ni mpulupulu. Caleka ninkuzinga pa mwamba wakwe Leza nu kukusumba pansi, kelubi wakukulinda watakulovya nu kukufumya mu munyeswa ungakusunga.

¹⁷ Ukaitakizya mu mwenzo pamulandu wa kuyemba kwako, nu kucindama kwako kwakulenzile kuya wa ciwelewele. Caleka ninkufwanta pansi pa manso yakwe yamwene nga yakambone.

¹⁸ Wakowezya incende yako yamuzilo ku maifyo yako avule nu ku ucenjezi wako wa uculuzi. Nafumya munuli umoto ulakoca, nakusangula itwi pansi, pa manso yakwe yonsi akuweni.

¹⁹ Imitundu ino yakumanya pasi pakuzunguka pamulandu nawe, wewe cakoopa, walowelela cala casila.’”

Ivilaponela aina Sidoni

²⁰ Yawe wavwanga kunondi wati,

²¹ “We mwana wa muntu, lozya amanso yako ku Sidoni umusemele uti,

²² ‘Yawe Simwandalali walanda wati amakufutukila, we Sidoni, amacindamila na munuli. Yalamanya ukuti nene indi Yawe, pano alakulula ndi vino wakupingila, alalanga nu ucindami wakwe munuli.

²³ Alakuponyezya impungo nu kuzwisya uwazi mu miseo yako, na akomwe yalaponela ku lupanga, ululakwizila ukufuma konsi konsi. Alino yalamanya ukuti nene indi Yawe.’

Aina Izlaeli yalakululwa

²⁴ “Muli yayo yonsi azinguluka ulupwa lwa ina Izlaeli nu kulupata, mutalatala muye umunga uwakulutota, nanti nkololwa uwakulukolola. Alino yalamanya ukuti nene indi Yawe.

²⁵ Yawe Simwandalali wavwanga wati, ‘Lino ndafumya aina Izlaeli mukasi ka mitundu muno yayasalanganyizizya, nu kuyakolonganika, alino ndalanga ucindami wane pa manso ya mitundu muli cii cakuti, yalikala mu mpanga ino napiile muomvi wane Yakobo.

²⁶ Yalikalamo ukwaula cakoopa, yalakuula amang'anda nu kulema amatingi, yalaikala ku matwi cele. Nupya lino ndafulula amu mbali mbali zyao yonsi, yano yayasuula, alino yalamanya ukuti nene indi Yawe Leza wao.’ ”