Ezekelo 26 - Amazwi Yakwe Leza 2013

Usemo pa vilaponela aina Tuli

¹ Pa wanda wakutandika umwezi, mu mwaka walenga ikumi na onga wa uzya witu, Yawe avwanga kunondi ati,

² “We mwana wa muntu, antu amu musumba wa Tuli yakalaizya ni nsansa yati, ‘Eya! Umusumba wa Yelusalemu uno tukacimvyanya nao ku vyauculuzi watiuongoloka ni mpongolo zyakweo zisile mwanku. Navino Yelusalemu watacimba, awe lyene swemo tumaya akama!’

³ Caleka nemo ne Yawe nkuyanena inti, ‘Mwe ina Tuli, lyene nene indi mwanisi winu alipo. Ndakatusya antu amitundu ivule pakuti yakize yakamuzanze, yaliza ndi vino maimbi ya muli yemba yakacita.

⁴ Yaliza yonone amalinga ya musumba winu wa Tuli nu kuongolola impungu zinu. Nga nani ndasenda umusili, mukasyale sile kwati a cilwala.

⁵ Tuli alaya wa kacilila, kano avuvi ya nswi yakaanikapo amasumbo yao, nupya kasyala vivyo kwene sile muli yemba. Ivyalanda ne Yawe.

⁶ Antu ya mitundu yuze yalazanza Tuli, yalakoma na antu aikala mu mizi ino yafumamo ino yayela mu milundu. Nga alino aina Tuli yalasininkizya ukuti nene indi Yawe.’ ”

⁷ Pano Yawe Simwandalali wavwanga wati, “Silola, nkutumila aina Tuli umwene waku Babiloni, umwene wakwe yamwene, wene alafuma ku ntunga yaku katutu, aliza ni mfwalasi na maceleta na akapita pa mfwalasi nga ni umba lya vita ilikulu.

⁸ Antu aikala mu mizi ino yafumamo, iyayela ku mulundu yalafwa ku ulapwa. Anisi yaliza yimbe amacinga monsi monsi yatuntumalike nu musili nu kukwimikila icakuicingilila ku vyanzo vyako.

⁹ Amalinga yako yaliza yayaongolole, ni mpungu zyako yaliza yaziongolole uku ncinde.

¹⁰ Imfwalasi zyakwe zilavula wakwe cimwi cakuti ulukungu luno zilakatusya lulakukupilizya. Amalinga yako yalatenta ku congo ca mfwalasi yakwe, ku congo ca maceleta yakwe ni congo ca vintu vya mipeto vyuze. Lino alingila mu mpongolo zyako cilaya kwati avino yakaingila mu musumba uwati ucimba.

¹¹ Yalalyatola imiseo yako yonsi ku nkamba zya mfwalasi yakwe, alakoma antu yako ku lupanga, akawisye ni ncesi zyako izitaikulila.

¹² Yalasenda ivyuma vyako nu kusampa ivilonkwa vyako vyonsi. Yalawisya amalinga yako, yakaongolole na mang'anda yako akankala. Amawe yako, imiti yako nu lukungu lwako, yalavisumba pali yemba.

¹³ Ndaputula izwi lya nyimbo zyako, ukulila kwa vinanda vyako kutaluvwika nupya.

¹⁴ Ndakusangula umwalala utupu tupu, ulaya incende ya kwanikilapo amasumbo. Utalatala nupya ukakuulwe cipya cipya, pano ne Yawe natimvwanga, ivyalanda ne Yawe Simwandalali.”

¹⁵ Yawe Simwandalali wanena Tuli wati, “Uzye antu aikala mu nkumba yakwe yemba yatalazakaza ku ntete, lino yaluvwa icongo ca kuwa kwako, ukuteta kwa vilaswe vyako nu kukomwa kwa lupanga munuli?

¹⁶ Intunguluzi zyonsi zya pali yemba zilatenuka pa vilimba vyakwezyo, zilazuula imingila yakwezyo ni nsalu zyakwezyo zipikulwe. Zilalemwa ni ntete nu kwikala pansi. Zilazakaza ukwaula ukuta, zilasyala na masakamiko pamulandu wako.

¹⁷ Apa kulosya zilati, ‘Owe mwe vino ononeka nu kulowelela muli yemba, we musumba wa lulumbi! Antu yako yali ali yeneco yakwe yemba, nupya aofyanga na antu yonsi aku mulundu.

¹⁸ Uwanda uno ononekelapo, aikazi amu nkumba yakwe yakuizakazila sile ku ntete, antu yano yikala mwenemo caticiyapezya amano apakulola vino ononeka.’ ”

¹⁹ Pano Yawe Simwandalali wavwanga wati, “Lino ndakusangula itongwa, wa misumba itatala ikalwamo, lino ndakuletela itenga nu kukutuwizya mu manzi azike,

²⁰ alino ndakusumba kuzimo ukwaya antu yampiti. Ndakusontelela apakwikala mu mpanga ya pansi mu musili, mu lwanga lwa pee, kumwi na aya kuzimo, ali pakuti utakatale uwele nu kwikala pano apa mpanga ya apuma.

²¹ Ndakusangula cakoofezya, utalayako nupya. Yalakulonda, lelo yatalatala yakuzane. Ivyalanda ne Yawe Simwandalali.”