Ezekelo 25 - Amazwi Yakwe Leza 2013

Usemo wa vilaponela aina Amoni

¹ Yawe avwanga kunondi ati,

² “We mwana wa muntu, lozya amanso yako ku ina Amoni uyasemele nu kuyasemela pa kuyakalipila.

³ Kayanene pakuti yatezye vino ne Yawe nkuyanena. Nemo nkuyanena inti mwemo mwasansamuka pakulola vino yakowezya incende yane yamuzilo yakumpepelamo, mwatemwa ukulola vino impanga ya Izlaeli yononeka, na pakulola kuno aina Yuda yasendwa uzya.

⁴ Pamulandu wakuti mwemo mwatemwa, nani ndaleka ukuti antu amitundu iyaya mu lwanga iyaku ufumondaka yakize yakamucimvye. Mu mpanga inu yaliza yakuulemo insakwe, nu kwikala amuno yakikale. Yaliza mu kumuliila ivyakulya nu kumumwela iziya.

⁵ Umusumba winu wa Laba ndausenula uluwa lwa ngamila, ni mpanga inu yonsi mwe ina Amoni, ndaisangula incende yakucemelamo imfwele. Alino mulasininkizya ukuti nene indi Yawe.

⁶ “Pamulandu wakuti wakomela inkufi zyako nu kulizya insindo, nga nu mwenzo wako mwazula umusaalula pa mpanga ya Izlaeli,

⁷ acino nani lyene ndakusumba ku antu ya mitundu yuze, uleke yakakusampe vyonsi. Ndamulovya sile mwensi, pakuti umutundu winu ukalowe, mutakaikwatile impanga nupya. Ee, alino lyene mulasininkizya ukuti nene indi Yawe.”

Usemo pa vilaponela aina Moabu

⁸ Yawe Simwandalali wavwanga wati, “Pamulandu wakuti aina Moabu na ina Seili yakavwanga ukuti aina Yuda yalingana sile na antu ya mitundu yuze yonsi,

⁹ cisuma nani fwandi ndaleka imisumba ikalinda yanande ya ina Moabu ikazanzwe, ukwikapo nu musumba wao uzipisye uwa Beti Yesyimoti, nu wa Baali Meoni nu wa Kilyataimu nayo kwene ikazanzilwe kumwi.

¹⁰ Ndaleka antu amitundu iyaya mu lwanga yaku ufumondaka ikacimvye aina Moabu, kumwi na ina Amoni, ali pakuti umutundu wao ukalowe.

¹¹ Ee, anene ndapezya aina Moabu, nga alino yalasininkizya ukuti nene indi Yawe.”

Usemo pa vilaponela aina Edomu

¹² Yawe Simwandalali anena ati, “Pamulandu wakuti aina Edomu yazanzile aina Yuda uyi uyi nu kuiletelela umulandu aeneco pa cilanduzi cao,

¹³ cisuma nani ne Yawe nayanenelapo ukuti ndayavunukilapo, nkayakomole yonsi kumwi ni viteekwa vyao. Impanga yao ndaisangula ulwanga, ukutandikila sile ku musumba wa Temani ukuyafika nu ku musumba wa Dedani nga na antu yalafwa uku nkondo.

¹⁴ Antu yane aina Izlaeli ali yano yalandandwilako ku ina Edomu, alalenga nu kuti aina Edomu yakuvwikisye apapela ukali wa cipyu cane. Alino lyene aina Edomu yalamanya vino cikaya ku antu yano nemo nalandwila. Ivyalanda ne Yawe Simwandalali.”

Usemo pa vilaponela aina Filisti

¹⁵ Yawe Simwandalali wavwanga wati, “Pamulandu wakuti aina Filisti yailandula pa kucita cilanduzi ni myenzo iyazula umusaalula, pano yezya ukucita uononyi nu lupato, nani fwandi nkanjalovye.

¹⁶ Caleka nani ne Yawe nayanenelapo ukuti ndayazanza nu kuyalovya ndayalovya. Ndalovya aina Filisti, na ina Keleti na yonsi pyu asyala mu nkumba yakwe yemba.

¹⁷ Ndayavunuka nu kucita cilanduzi kunoyali. Yalalola apapelela icipyu cane. Alino lyene yalasininkizya ukuti nene indi Yawe.”