Ezekelo 24 - Amazwi Yakwe Leza 2013

Mupika wa ngalawa

¹ Mu mwaka walenga fundimbali, mu mwezi walenga fundimbali apa wanda walenga ikumi mu nsita ya uzya witu, Yawe avwanga kunondi ati,

² “We mwana wa muntu, lemba ningo uwanda wilelo, pano ali wanda kwene uno mwene waku Babiloni alaya akalwisye Yelusalemu.

³ Nena yacisanguka ipinda lii lino nayumile ne Yawe uti, ‘Teka umupika pa moto, nga wauteka witilemo na manzi.

⁴ “ ‘Putolela mfinyango zya nyama, izisuma zyaku myendo yonsi, wike mwenemo ni nyama zisuma zya mafupa.

⁵ Usolole ni mfwele isuma mu ufyo. Uninkule ni cininkwa ca moto mwi ziko pakuti vitopote ningo, uleke na mafupa yatonte.’ ”

⁶ Vii ivyalanda Yawe Simwandalali, “Kalanda ku musumba wa vipondo! Umusumba uli wa mupika wa ngalawa uno utalatala ukuzwe. Yakungula inyama zyonsi, ukwaula ukusyamo nanti yonga.

⁷ Mwali ukakasi mu musumba. Uwazi utazwanga pa musili apakuti lukungu aluno luuzike, wakonkolokanga pali cilwala, apiwe.

⁸ Nani kwene ali pano naleka uye, pakuti waloleka, ali kuti icipyu cane cilandwilwepo ukali ukali.”

⁹ Caleka Yawe Simwandalali wavwanga wati, “Kalanda ku musumba wa vipondo! Anene kwene namauninkwilapo umoto.

¹⁰ Leta inkwi nazyuze! Sonsela penepo! Elekesya inyama! Itulula umusunyi, uleke mafupa yasikise!

¹¹ Ale lyene teka umupika utupu pa munyeswa, uleke upye, uyenze na cee. Alino ingalawa zya uko zimasunguluka, nga nu mupika lyene umaya ukuzike pa cisila ca ngalawa ukupya.

¹² Lelo kwene ingalawa zisikusililikila zyonsi api ziko foo.

¹³ We Yelusalemu, ala imisango yako ya ukulukusi yakukowezya. Nanti nemo ningezya uku kuzifya, awe cumi wemo ukasyala mumu kwene muno wakowela. Ulazifiziwa sile lino uluvwa apapela icipyu cane.

¹⁴ Ne Yawe Simwandalali nalanda. Insita yatifika yakuti incicite. Insikuta sile foo, nupya nsikukutezela nanti ukuvwa uluse, awe. Wemo namakuvunuka pa vicitwa vyako. Ivyalanda ne Yawe Simwandalali.”

Imfwa ya muci wakwe Ezekelo

¹⁵ Alino lyene Yawe avwanga kunondi ati,

¹⁶ “We mwana wa muntu, nemo namakupumikizya pa kusenda umuntu wino watemwisya wakwe cimwi. Fwandi wemo cisi cakwezya ukuilizyanyapo, nanti kupomola impooma nanti kulukusya aminsozi.

¹⁷ Utezya uleke yuvwe kuno ukusinsimokela. Utazuula insalu ku mutwe nanti kuzuula insapato zyako apa kulanga ukuti uli ni ndosya. Utavimba pa mulomo nanti kwezya ukulya icakulya ca pa ndosya.”

¹⁸ Acino akatondo inalanda na antu, nu mu manguzi awe cumi uwane afwa nu kufwa. Akatondo nemo ncita ndi muno yanenyile.

¹⁹ Alino antu yanguzya yati, “Uzye cino wacitila vii icani?”

²⁰ Ali vino nani nayaswike inti, “Ala Yawe watavwanga kunondi ati,

²¹ ‘Nena ang'anda yakwe Izlaeli uti Yawe Simwandalali uwavwanga wati lola namakowezya incende yane yamuzilo, cilumba ca maka inu, insansa zya manso inu nga ni ciluka ca myenzo inu. Ana inu aonsi na anaci yano mwasya ku cisila yalafwa ku lupanga.

²² Alino mulacita vino nacita, mutalavimba pa kanwa nupya mutalalya cakulya cino yakalya apa ndosya.

²³ Mutalazula imipango inu ku mitwe nupya mutalazula insapato zinu ku ngazo, mutalasinsimokela pa kulila nanti sile ukupomola impooma. Mulondelapo sile wakwe cimwi pa kwifya kwinu, nu kusinkolana nu kung'winta.

²⁴ Akuli Ezekelo ali kuno mwailolela vyakucita. Na cico lino cilafikila, alino mulamanya ukuti fwandi nene indi Yawe Simwandalali.’ ”

²⁵ Nga alino Yawe wanenyile nupya ati, “We mwana wa muntu, nemo ndayapoka ing'anda yao ikulu yakwe Leza, ino yene yakamekelapo pano yakayuvwa, nupya ikayasansamusya. Yakaitamba nu kuipempula. Nupya ndayapoka ana yao aonsi na anaci.

²⁶ Uwanda kwene uo imbutusi iliza ikulandile umulandu.

²⁷ Na pa wanda kwene uno ulalanda ku mbutusi iyo, ulavwanga nu kupola kuli uciulu. Ulaya icilangililo kunoyali, nga nayo yalamanya ukuti nene indi Yawe.”