Ezekelo 23 - Amazwi Yakwe Leza 2013

Ukwifya kwakwe Yelusalemu na Samaliya

¹ Yawe avwanga kunondi ati,

² “We mwana wa muntu, kwali anaci yaili avilwe inda yonga.

³ Lelo, ukufuma ku ukazyana wao, yene yacita uzelele na Eguputo. Wene uwayatonyanga amayele nu kufikina insota zya ukazyana wao.

⁴ Amazina yao a Oola, na nyinalenzi wali a Ooliba. Oola ali Samaliya, na Ooliba a Yelusalemu. Yonsi yoili nene nayatwite nga yamvyalila na ana aonsi na anaci.

⁵ Lelo Oola, nanti wali uwane, wene wacitanga uzelele nalino acili uwane. Watemwanga yacuza yakwe, ivita vya ina Asilya yano yapalamine nawe.

⁶ Aonsi yayo yali ivita vyazwalanga insalu ziyenzulukile, asambazi ni ntunguluzi zikalamba zya uteko. Yali alumendo yamwi asuma nupya ayembe apitilanga pa mfwalasi.

⁷ Aina Asilya yao, asopoloke yonsi ayano waipelesyanga kunoyali nupya waikowezyanga ku tuluwi tonsi twa atemwikwa yakwe.

⁸ Wene atatiile uzelele wakwe uno wacitanga na aina Eguputo, kuno aonsi yalongozyanga nawe ukufuma ku ukazyana wakwe. Yatonyanga mayele ya ukazyana wakwe nu kupuzoka nawe.

⁹ Caleka namululile mu makasa yakwe yacuza yakwe yano watemilwe, mu minwe ya ina Asilya.

¹⁰ Nayo yamuzula nu kumusya tupu, yamupoka ana aonsi na anaci, umweneco nawe yamukoma ku lupanga. Awe nawe alumbuka pa anaci yonsi mpanga yonsi yamamulandapo pali vino yamupezizye.

¹¹ “Umuze nawe Ooliba nanti angala waweni vii vyonsi, awe wene walusizyepo sile ukuya cuze cuze sile, nu uzelele wakwe walusizye nu wa mwina Oola.

¹² Nawe kwene wakumbwanga aina Asilya yano yapalamine nawe, ivita ni ntunguluzi, azwalanga insalu zikankala, alumendo ayembe akwelanga pa mfwalasi.

¹³ Nani ali pakulola ukuti awe nawe kwene uzelele wakwe waipisya. Wene yalingine sile na nyinalenzi ku uyi.

¹⁴ Nawe alusyamo ku uzelele wakwe, watambanga na onsi yano yalenzile pa ciumba, unkolanya wa ina Babiloni, vino yalenzile kwi langi liyenzu.

¹⁵ Yali aonsi apombelizye vimisipi mu misana ni nsalu zikulu ku mitwe. Yonsi kwene yalolekanga wa ntunguluzi, yali unkolanya wa ina Babiloni, akaya yamu Kalideya.

¹⁶ Watangi ndi walolekesya penepo, awe mukwai nu mwenzo munda waciloka sile ku kuyakumbwa. Wasusile azitumila ni nkombe ku mpanga kwene ilya yaku Babiloni.

¹⁷ Aina Babiloni nayo avino yiza ku kucita uzelele nayo. Yamucenya nu kumukandola cakuti pakusyalikizya cifuula ayatendwa.

¹⁸ Lyene atandika ukuisenekezya kuli yonsi nu kuitasya pa uzelele wakwe. Nani insuka lyene imutendwa, ndi vino camfuulile kuli kaci muze.

¹⁹ Awe lyene alino cilusyamo kunoli ukucita uzelele uno wene watandike mu Eguputo lino wene wali umukazyana.

²⁰ Azembokela sile ku kutemwisya nkulukusi zya onsi izyali ni vyanzwalo vikoline na vyakwe yapunda, avovomolanga wa mfwalasi.

Upinguzi wakwe Leza pali Ooliba

²¹ “We Ooliba, wemo ukasi kuti nupya wacita uzelele ndi vino wacitanga lino wali mukazyana mu Eguputo, muno aonsi yakutonyanga amayele nu kukufikina insoto.

²² Fwandi lyene nemo ne Yawe nkukunena inti, wemo caticikufuulila ku akundwe yako, lelo nemo ndaleka kuti yakusokele, nu kwiza kulilizya.

²³ Ndaleta aina Babiloni na ina Kalideya yonsi, aina Pekodi na ina Syoa, aina Koa na ina Asilya yonsi. Yonsi yayo alasi na yamusika ya vita, nupya alumendo ayembe atuputupu. Yonsi intunguluzi zya uteko pamwi na yamusika akapita pa mfwalasi.

²⁴ Yalakwizila ukufuma ku kayeya, yalaya na maceleta ni vyakusendelamo iviya. Yene yalazwalila ivyaulwi, vimpompo pakukulizizya. Nene ndayanena uku kupingwila, nga nayo yalakupingwila kulingana na masunde yao.

²⁵ Ndaleka yakutakanye cipyu cipyu, pano nemo ninkusokela. Yalakuputula impuno na matwi, yalakoma na ana yako. Yalakupoka ana yako aonsi na anaci, yakayoce nu mu moto.

²⁶ Yalakulepolela vyakuzwala nu kukuzula ukasi wa mutengo.

²⁷ Nemo ndaputula umunyanya wa uzelele wako, nkamale ni mipitile yako iipisye, ino wakweti lino wali mu Eguputo. Utalatala nupya ukaluuke aina Eguputo nanti kwiusya impanga yao.

²⁸ “Nemo ne Yawe nkukunena vii nati, ndakutwala ku antu yano wemo wasoka, yano cakufuulila.

²⁹ Yene yalakupokolola vyonsi vino waombile, alino yakakusye tupu, pano nayo kwene yakupata. Yalasya watusenekezya tupu pakuti ukazewane pa uzelele wako ku unkolanya.

³⁰ Ukulukusi wako na uciizelele wako ivilakuletelela amacuzi. Pano pakucita uzelele ni mitundu, wemo waikowezya ku tuluwi twaiko.

³¹ Walondelelanga imisango yakwe nyokolenzi. Caleka nani kwene ndakufulilwamo.

³² Ne Yawe Simwandalali nakunena ukuti, nawe kwene ulamwela mu lwako lwakwe nyokolenzi, mu lwako lukulu nupya luzike. Antu yonsi yalakuseka nu kukuweleketa, pano ivilatapwilwa mwenemo vilazulisya.

³³ Lulakukola nupya ulasakamilwa ndi wamwamo, pano ulwako lwa masakamika nupya ulwa ononyi, ulwako lwakwe Samaliya nyokolenzi.

³⁴ Ulamwamo nu kufipilila, nga alino ukalutame. Ni vinga vyaluko vilalepola amayele yako. Ivyalanda ne Yawe Simwandalali.

³⁵ Caleka ne Yawe Simwandalali nkukunena vii inti, wemo ulaculilamo pa ukakasi nu uzelele wako, pano wanjililako nu kunsuula wansuulako.”

Kupingulwa kwakwe yakaci yoili

³⁶ Yawe ali pakunena ati, “We mwana wa muntu uzye ukulonda kupingula Oola na Ooliba nu kuyakalipila pa vicitwa vyao vyawinyi?

³⁷ Yene yacita umulandu wa ucizelele, ni minwe yao yasalipa. Yene yacitanga ucizelele nu tuluwi twao. Yapisyanga na ana yao yano yaivyalile, mu moto apa kuyoca.

³⁸ Nupya yancitila icintu nacuze. Yene yakowezya incende yane yamuzilo nu kukowezya Masabata yane pa nsita ili yonga kwene.

³⁹ Na pa wanda kwene ulya yakomile ana yao impolelwa yakutuulila utuluwi twao, izile mu ncende yane yamuzilo nu kuikowezya. Cumi kwene avino yacita mu ng'anda yane.

⁴⁰ Nacuze penepo, antu amu mpanga zya kutali, yano yamiile pakuyatumila inkombe, walanga yafika sile wafulile upakala amafuta pa manso nu kuzwala iviyembelo vyako.

⁴¹ Nga lyene uwikala pa usanzi ukankala nu kwika itebulo pa nkolelo yakweo, apano utantika ubani wane na mafuta yane.

⁴² Alino pizile puvwika ni congo ca luzango ci umba lya antu aina Sebeya yano yacinanga. Pasi pano mu lwanga mwafumile iumba lya onsi yano yazwikanga anaci amakoza ni vingala vikankala ku mitwe.

⁴³ Nelenganya inti yamangu yacizelele yakucita uzelele mu ng'anga ya mwanaci umutonte muli ucizelele, umweneco nawe acili akucita uzelele,

⁴⁴ na onsi yacili yakwiza kunoli, ndi vino yakaya mwa mwanaci cizelele, ndi vino yayanga kuli Oola na Ooliba, nkulukusi zya anaci zizi.

⁴⁵ Lelo asuma yalayapingwila ndi vino yakapingwila anaci yacizelele na akazwisya uwazi, pamulandu wakuti yene acizelele ni minwe yao yali yamifitalila pamulandu wa kuzwisya uwazi.”

⁴⁶ Yawe Simwandalali wavwanga wati, “Lekini yayakolonganike mwi umba lya antu uleke amuno yize yayofye yayasampe ni vyuma vyao.

⁴⁷ Lekini iumba lilyo lya antu lize liyatamole na amawe nu kuyakomola ku lupanga. Yakome na ana yao aonsi na anaci yoce na mang'anda yao.

⁴⁸ Ali vino ndamala ukulukusi onsi wamu mpanga, apakuti anaci yonsi yakasokwe, yatakatale yakolanye ukulukusi winu.

⁴⁹ Alino lyene namwe, mwe yakaci yaili, nemo ndamufulula pa ukulukusi winu na pa uyi winu wakupepa tuluwi. Alino mulamanya ukuti nene indi Yawe Simwandalali.”