Ezekelo 22 - Amazwi Yakwe Leza 2013

Ui uwaya mu Yelusalemu

¹ Yawe avwanga kunondi ati,

² “We mwana wa muntu, uzye ukasi kupingula Yelusalemu? Uzye ukasi kupingula umusumba uu uwazulamo utazi wa katwe? Lyene umunenole pamulandu wa vicitwa vyakwe vyawinyi.

³ Unene umusumba uo vino ne Yawe Simwandalali nkulanda ukuti, Owe vino we musumba wailetelela apa kukoma antu yako avule na pa kuikowezya we mwisikulu ku tuluwi tuno waipangila.

⁴ Acino pamulandu wa kukoma antu nupya waikowezya ku tuluwi tuno waipangila. Caleka amanda yatiyakuzana, ni mpela yako yatifika. Acino nani ndaleka antu amu nko zyuze yakusoweke na amu mpanga zyuze nayo yakuseke.

⁵ Impanga zya mupipi ni zyakutali zimakusekanga pamulandu nu kuipupanya kwako, nu ku cimvulunganya cako.

⁶ Intunguluzi zinu zyonsi mwe ina Izlaeli zikaomvya amaka yakwezyo pa kukoma antu.

⁷ Mu musumba uu mutaya nanti wenga akacindika akwasi yakwe. Wemo ukacenjezya aenyi, nupya ukafyenga yamukamfwila na ana asyale.

⁸ Wemo usicindika ivintu vyamuzilo nupya usicindika uwanda wi Sabata.

⁹ Antu yako yamwi yakatumpwila auze pakuti yayakome. Yamwi nayo yakalya impolelwa izikatuulilwa utuluwi mu ncende zino yakapepelamo mu myamba. Yamwi yakacina iviila vitazifile lyonsi sile.

¹⁰ Yamwi yakalongozya na yamuka yaisi. Yamwi nayo yakapatikizya anaci pakuti yalongozye nayo pa nsita ino yali ku mpepo.

¹¹ Yamwi yakalongozya na yamuka ine nu kulyombeleka yanyinavyala, nga nu kulongozya na yakaci yao, avyalwa kuli isi wenga kwene cikulu yapusine yanyina.

¹² Antu yako yamwi yakalipilwa impiya ndi yakoma umuntu. Yamwi yakapokelela amafukakanwa pali vino yakakopesya aina Izlaeli yauze, yakasanguka akama pamulandu nu kucenjezya auze. Lelo kunondi iyanjilila sile. Ivyalanda ne Yawe Simwandalali.

¹³ “Walola, nakufundikila ikofi pamulandu wa wivi wako nu ukakasi wako.

¹⁴ Lino ndakupezya uzye wemo ukuti ulayumilizya nanti kuzyansya? Ne Yawe natindanda, nu kucita ndacicita.

¹⁵ Antu yako ndayasalanganyizizya mu mitundu ya antu yauze aya mu mpanga zyuze, ni viipe vino ukacita navyo kwene ndavipezya.

¹⁶ Cacumi, ulazewana pa manso ya antu ya mitundu yuze, nu kumanya ulamanya ukuti nene indi Yawe.”

Ilungu lyakwe Leza lyakwengulwilako

¹⁷ Yawe avwanga kunondi ati,

¹⁸ “We mwana wa muntu, aina Izlaeli kunondi nkayalola wakwe munyela. Yaya kwati amunyela wino watikinkana nu mukuwa, ilata, icela, nu mutovwe, vivi ivikasyala mwi lungu lino siluva wengululwa.

¹⁹ Caleka ne Yawe Simwandalali nanena aina Izlaeli ukuti avino nayo kwene yaya, yene iviwelewele vya antu. Ndamukolonganya mwensi pamwi mukasi kakwe Yelusalemu.

²⁰ Ndi vino yakakolonganya siluva, mukuwa, umutovwe ni cela ci lata mwi lungu, yapemba nu moto mwisika pa kuvisungulula vyonsi, avino ndamukolonganika mu cipyu cane cikali nu kumusungulula.

²¹ Ndamukolonganika nu kumusonteka umoto wa ukali wane ali pakumusungulula mukasi ka musumba.

²² Vivi kwene vino yakaengulula siluva mwi lungu, avino mulengululwa mukasi ka musumba. Alino lyene mulamanya ukuti nemo ne Yawe, nene namuponyezizye ukali wane.”

Amaifyo ya ntunguluzi zya ina Izlaeli

²³ Yawe avwanga kunondi ati,

²⁴ “We mwana wa muntu, nena aina Izlaeli ukuti yaya wa mpanga muno imvula itatala yatonya, muno mumbo nanti atuswelelele tutatazile tuputilizye lino nayakwatile icipyu.

²⁵ Intunguluzi zyao zili kwati a yacisama akung'anza pa nsita ino yakutakanya inyama ino yalemile. Intunguluzi zikakoma antu nu kuyapoka impiya, ni vyuma vyao vyonsi, zikalenga ukuti yamangu aingi yasyale yamukamfwilwa.

²⁶ Yasimapepo yao yakaonona amasunde yane, nupya yasicindika ivyamuzilo vyane. Yasipusanya vyamuzilo ni visi vyamuzilo. Apa kusambizya yasipusanya ivintu ivikakowezya antu ni visikowezya, nupya yasisakamala ni Sabata kwene. Uli mulandu kwene uno aina Izlaeli yasincindikila.

²⁷ Akalamba ya uteko nayo kwene yaya wa mimbulu ino ikutakanya inyama ino yatilema. Yene yakakoma antu pakuti yalonkelemo icuma.

²⁸ Yakasema yao nayo yasilandapo pa uyi uu, yakafisa kwati antu yano yakupawila cipau ku lung'umba. Ivilolwa vyao navyo ivyaufi sile, ni visowelo vyao navyo kwene ivyaufi sile. Yene yakailola ungati antu akalanda amazwi yane ne Yawe, fwandi ala ne Yawe ntayanenyile nanti kamwi.

²⁹ Akama nayo yakacenjezya auze nu kuiyila vintu. Yakacuzya alanda, yakafyenga na aenyi.

³⁰ Nemo nakasi ukuti wenga angakuula iciumba, aimilile na pa cipongo pano iciumba catuluka, pakuti awino apokolole kweneko impanga, lino nemo ndalonda ukuyonona uku ukali. Lelo ntalolapo nanti wenga.

³¹ Fwandi nemo ndayafulumila ukali wane nu kuyonona ndi vino umoto ukacita, pakuti nkayafulule pamulandu wa vintu vino yacita. Ivyalanda ne Yawe Simwandalali.”