Ezekelo 21 - Amazwi Yakwe Leza 2013

Lupanga lwakwe Yawe

¹ Yawe avwanga kunondi ati,

² “We mwana wa muntu, sumba amanso ku Yelusalemu, kalipila incende yao yamuzilo nu kusesemela impanga ya ina Izlaeli,

³ nena impanga yakwe Izlaeli uti, ‘Yawe wavwanga wati lola nakukatukila, namasomola ulupanga lwane mu cituwo, pakukoma umulungami pamwi ni ntalanganyi.

⁴ Ulupanga lwane lwasomolwa mu cituwo, pakukoma umusuma nu mwipe, antu yonsi sile ukufuma ku kayeya nu kufika ku katutu.

⁵ Alino antu yalamanya ukuti nene ne Yawe, natinsomola ulupanga mu cituwo, nupya ntalaluswilizyamo nalyuze.’

⁶ “Caleka nawe we mwana wa muntu, isya umwenzo. Ucite kwati uli pakufwa. Tolomanga pakuti antu yuvweko.

⁷ Ndi yakuuzya umulandu uno ukutolomela, uyasuke uti, ‘Apamulandu wa vintu vino vyasya vicitike.’ Yanene ukuti kwatikwiza izwi lyakuti imyenzo yonsi ilakulukunta pamulandu ni ntete, amakasa yao yalatolompoka, amano yao yalapela, mu nteo zyao mulapomponteka. Icali nu kufikila, ala cafikila. Ivyalanda ne Yawe Simwandalali.”

⁸ Nupya Yawe avwanga kunondi ati,

⁹ “We mwana wa muntu, sema uti, Yawe wavwanga wati, ala ulupanga lwati lunyolwa nupya lwati lukulumbilwa.

¹⁰ Lwatilunyolelwa kusalipa, lwakulumbilwa kumyantula wa nkuwa! Patalolike uwa kululeuka, pano mwemo mwakana ukupandwa amano.

¹¹ Ulupanga lwati lukulumbilwa, pakuti luiteyanye ukuomba. Lwatilunyolwa, pakuti iminwe yakwe cikoma ilufumbate.

¹² Pomola impooma, nupya pundisya, we mwana wa muntu, pano ulupanga luu ulwa kusalipila antu yane ni ntunguluzi zyonsi zya ina Izlaeli. Ni ntunguluzi zilafwila pamwi na antu yonsi. Fwandi mwemo tungililini sile amakasa mu nzekete.

¹³ Ukweziwa kuliza. Nga ndi mwakana kuzenzuka, uzye vii vyonsi vitalamuponela? Ivyalanda ne Yawe Simwandalali.

¹⁴ “Caleka lyene, we mwana wa muntu, komela amakufi useme, alino nu lupanga lumakoma amaila yaili nanti yatatu. Cacumi, ulupanga lukasalipa, lwene lukaoofya nupya lukakoma wakwe cimwi.

¹⁵ Ali pakuti antu yane yapeziwe amano, yapomponteke. Pa mpongolo zyonsi zya musumba nemo ninteya penepo ulupanga ulumamyantukanga wa nkuwa, ulumalolelanga sile ukusalipa.

¹⁶ We lupanga lunyoleke, ale koma konsi konsi! Koma konsi sile kuno wasenukila.

¹⁷ Nga nani kwene namakomela inkufi ni cipyu cane cimasila. Ivyalanda ne Yawe Simwandalali.”

Ulupanga lwa mwene waku Babiloni

¹⁸ Yawe avwanga kunondi ati,

¹⁹ “We mwana wa muntu, sila inzila ziili mwakwizila ulupanga lwa mwene waku Babiloni, uleke zyonsi ziili zifume mu mpanga ili yonga kwene. Wiike ni vimanyililo pa masansa yakwezyo aku musumba uo.

²⁰ Cimanyililo conga ali cakulanga umwene inzila iyaya ku Laba, ku musumba wa ina Amoni. Cuze naco ali cakulanga inzila yaya ku Yuda, nupya yalungama nu ku musumba wa Yelusalemu.

²¹ Pano umwene waku Babiloni wataimilila pa masansa ya nzila ziili, akupendola pakuzulunzya inceto, akuuzya nu tuluwi twakwe nu kuceceta itima lya nyama ino yafyulile utuluwi.

²² Mu minwe yakwe ya kwilunji, ukupendola kwakwe kwafikilizya ukuya ku Yelusalemu nu kwimika vyakuongolwela ilinga, ukupeela isunde lyakukomako antu nu kupunda impooma zya ulwi, pakuti yaike vyakuongolwelako pa mpongolo ni cakutuntumalika ciimbili nga ni cakwimba yamunyama.

²³ Amu musumba yelenganye ukuti nanti yangalapa imilapo uli, kupendola kwao ukwa uwelewele sile. Lelo kukapeela umboni pa uyi wao, ulayaponela mu uzya.

²⁴ Caleka ne Yawe Simwandalali nkuti, pamulandu wakuti mwaisinila mwe eneco uyi winu, pakusokolola ucisanguka winu, nu kulanga ukutala kwinu kwa micitile inu yonsi, mulafululwa pano imilandu ii yamusinila.

²⁵ “Lelo nawe we kateeka wa mpanga yakwe Izlaeli, we nkakasi ya muntu we ciwelewele we, nawe kwene lyene uwanda umakufikila uwakukufulwilapo.

²⁶ Ne Yawe Simwandalali avino nalanda. Ale lyene zula icisote cako ca wene, ni cisalu cico cino upomvile ku mutwe cizule. Ee, ivintu vyonsi lyene vyasenuka. Alanda lyene ayano kayateeka! Yakateeka kayaye alanda!

²⁷ Kalanda kasikolo we ononyi we! We ononyi we! Ee, umusumba nkambucite itongwa. Lyene awe kacitale ciye sile, mpaka ace asuke aize wino nasolola ukuti akize akafulule umusumba uu.

Aina Amoni yasokwa

²⁸ “We mwana wa muntu sema amazwi yane. Kafisye amazwi yano ne Yawe Simwandalali nkunena aina Amoni, akatukola intusi aina Izlaeli. Kayanene uti, ‘Ala ulupanga alulo, lukulonda ukusalipa. Lwatilukulumbikilwa ukusalipa, nu kumyantula wa nkuwa.

²⁹ Nena aina Amoni ukuti ivilolwa vino yakalola ivyaufi, nu kuti ivisowelo vino yakasowela, navyo kwene ivyaufi. Aina Amoni antu yaipe nupya iviwelewele vya antu, nu wanda onga wasya uyazanikizye, uli wanda wakuyalyotola. Ulupanga lwatilufika pa nsingo zyao.

Aina Babiloni yasokwa

³⁰ “ ‘We Babiloni, wezezya ulupanga lwako mu cituwo. Wemo ndakupingwila mu ncende kwene ino wapangilwe, mu mpanga kwene muno wavyalilwe.

³¹ Lino ndakukatukila wa cimbilimbili ca moto, alino wemo uluvwa apapela icipyu cane. Ndakusumbila ku antu aya wa vilyanyi ku ukali, ku antu amanya ukusalipa.

³² Wemo ulononeka ku moto. Wazi wako ulazwa mukasi ka mpanga yonsi, kusi na alatala akwiusye. Pano avino ne Yawe nalanda.’ ”