Ezekelo 20 - Amazwi Yakwe Leza 2013

Ivikalonda Yawe na ucisanguka wa muntunze

¹ Mu mwaka walenga cinimbali, pa wanda walenga ikumi mu mwezi wakwe cisano, intunguluzi zimwi zya ina Izlaeli zizile zinguzya ukulonda kwakwe Yawe, zikala na pankolelo yakwe nene ne Ezekelo.

² Yawe avwanga kunondi ati,

³ “We mwana wa muntu, unene antu ukuti Yawe Simwandalali wavwanga wati, ‘Uzye mwemo mwizile mu kuuzya vino nkalonda? Awe, nemo nsikuleka muzye penepo nanti cimwi. Ivyalanda ne Yawe Simwandalali.

⁴ “ ‘We mwana wa muntu, uzye umayaputwila umulandu? Uzye umayalanga uyi uno ivikolwe vyao vyacisile?

⁵ Yanene vino namalanda. Lino nasolwile aina Izlaeli, nemo nalavile ana yakwe Yakobo, indundapo nu kulapa. Nupya mu Eguputo nemo naisokolwile kunoyali nu kuyanena ukuti nene indi Yawe Leza winu.’

⁶ Apa wanda kwene uo lino nayalavile nu kulundapo ukulapa ukuti ndayafumya mu Eguputo, nu kuyatwala mu mpanga ino nemo nasolwile, ali mpanga ikankala nupya iya muvundo iyaluta impanga zyuze zyonsi ku usuma.

⁷ Nemo nayanenyile ukusumba utuluwi twao utwipisye tuno yatemwa, nayanenyile nu kufuntunka ku ukowezya wa tuluwi, tuleza twaufi twamu Eguputo, pano nene nenga mpo indi Yawe Leza wao.

⁸ Lelo yene yamfutatila, yakana nu kunguvwa. Yakana kusumba tuluwi twao utwipisye, yakana nu kufumya amano yao ku tuluwi, tuleza twaufi twamu Eguputo. Nani ali pakuyafululula uyi uyi mumu kwene mu Eguputo.

⁹ Lelo nacindikanga izina lyane, naleka nu kuti litazewana pa manso ya mitundu muno yikalanga mwenemo. Pano nanenyile imitundu iyo inti ndafumya mutundu wane mu mpanga ya Eguputo pa manso inu.

¹⁰ “Fwandi nani nayafumizye mu mpanga ya Eguputo nu kuyatwala mu lwanga.

¹¹ Nayapile amasunde yane nu kuyasambilizya ivipope vyane, apakuti yonsi yano yakulondela ivintu vii, amuno yangalolela uumi.

¹² Nayapile na Masabata yane kukuya icimanyililo pakasi kao nani, cakuyamanyisya ukuti akayazifya anene ne Yawe.

¹³ Lelo kwene nu mu lwanga kwene namo kwene yansangukile nupya yatapitanga nu kulondela amasunde yane, yasuulanga ni vipope vyane, vino yali nu kuwaka kuti yalolelemo uumi. Yene yasuulilila ne wamuzilo yonona na Masabata yane. Nani ali pakupanga kuyaponyezya ukali wane mu lwanga nu kuyalovya mumu kwene.

¹⁴ Lelo nupya nasuzile sile pano nga nailetile sile nenga insonyi ku antu amitundu, alolanga kuno nayafumyanga mu Eguputo.

¹⁵ Acino nani mu lwanga kwene ali pakulapa ukuti ntalayatwala mu mpanga ino nayapeela, impanga ikankala nupya yamuvundo, yaluta impanga zyuze zyonsi ku usuma.

¹⁶ Ee kwene, nalafile, pano yasuuzile ivipope vyane, yafuma nu mu masunde yane, yasuulila kumwi ni Sabata lyane lyamuzilo. Yatemilwe ukupepa tuluwi twao.

¹⁷ “Nga lelo nupya kwene nayuvwilile uluse, ntayononyile foo. Ntayakomile yonsi mumu mu lwanga.

¹⁸ Lelo mu lwanga kwene amuno nanenyile ana yao inti, ala mwemo mutalondela amasunde ya vikolwe vinu. Mutalondela imisango yao, mutaikowezya ku tuluwi twao.

¹⁹ Nene indi Yawe Leza winu. Mwalondela amasunde yane, nu kuwaka ivipope vyane.

²⁰ Mwacindika uwanda ukankala wi Sabata nu kuucita wamuzilo, ali pakuti wene waya cili cimanyililo ca cuvwano cinu nupya mwaiusya ukuti nene indi Yawe Leza winu.

²¹ “Lelo nupya kwene inkulo iya nayo kwene yansangukile. Yene yasya umwi sunde lyane, yakana nu kuwaka ivipope vyane, ivintu ivilinzile kuyaletela yonsi umi ndi yakuvilondela. Yasuulila kumwi ni Sabata kwene. Nani ali pakulonda kuyafulula ukali ukali nu kuyakoma yonsi mumu kwene mu lwanga.

²² Lelo nupya kwene nasuzile sile, pano nga nailetile sile insonyi ku antu amitundu aweni kuno nafumizye aina Izlaeli mu Eguputo.

²³ Nupya kwene mu lwanga kwene amuno naswilizye ukulapa. Lyene indapa ukuti indayasansantila mu mpanga zyonsi.

²⁴ Na cino nacitile cico apamulandu wakuti yene yasuuzile vipope vyane, yasuula kumwi ni Sabata lyane lyamuzilo, yafukamila utuluwi kwene tutu twa vikolwe vyao.

²⁵ Fwandi nani lyene ali pakuyapeela amasunde yano yatali amasunde yampomvu, ni vipope ivitali vipope vya mpomvu, ivintu ivitange viyaletele uumi.

²⁶ Nupya nayatile ukuti yakweyowezya aisikulu ku mawila ni mpolelwa zyao, apakuleka ukuti yatoola na ana yao aonsi amayeli nu kuyoca impolelwa. Na cino nacitile cico apakuyafulula, na pakuyalanga ukuti nene nenga mpo indi Yawe.

²⁷ “Caleka fwandi we mwana wa muntu nena aina Izlaeli vino nemo nkulanda. Akuno uli mulandu nauze uno vikolwe vyao vyanzewanya ku vya utalami wao.

²⁸ Nemo nayatwazile mu mpanga ino nayalavile kuyapela. Lelo lino yaweni mwenemo utwamba tonsi ututumpuke, ni miti yonsi ilembe, awe nupya kwene yatandika ukupeela impolelwa zyao. Yaleka nu kuti insoke pamulandu ni mpolelwa zino yocelangapo, na pamulandu wa mawila yauze ya vyakulya vino yatwalanga penepo.

²⁹ Nani ali pakuyuzya inti, ‘Ngi ncende zizi izitumpuke zino mukuya kweneko, uzye incende zyamusango cii?’ Fwandi papa kwene, apatandikile izina lyakuti, ‘Incende Zitumpuke ukufika na pilelo kwene.’

³⁰ Lyene fwandi nena aina Izlaeli amazwi yane ne Yawe, uyanene ukuti uzye mwemo umulandu cii uno mukacitila iviipe vili vimwi na vino ivikolwe vinu vyacitanga? Uzye pacani cino mwemo mukapepa utuluwi twao?

³¹ Na pilelo kwene mwemo mucili mukatula amawila ali yamwi kwene, nupya mucili mukuikowezya ku tuluwi tuli tumwi kwene, mukututuula impolelwa zyakoca ana inu? Uzye pacani cino mwemo mwe ina Izlaeli ningamuzumilizya ukwiza mukunguzya vino nkalonda? Nalapa, ne Yawe Simwandalali, nemo ntange ntale muzumilizye kwiza mukunguzya.

³² Mwemo mwapanga mpiti mu myenzo inu ukuya wa antu ya mitundu yuze, mwemo mwapanga ukuya wa antu yauze aikala mu mpanga zyuze, akapepa vimuti, amawe, lelo kuno muli citalatala ciye vivyo foo.”

Leza akavunuka antu nga nu kuyayela uluse

³³ Nupya Yawe wavwanzile ati, “Nkulapa ne Leza wa umi, nemo ndamuteeka ku maka yane yonsi uluku uluku.

³⁴ Ndamulanga vino nemo naya na maka na vino nkasoka, lino ndamufumya mu mpanga zyonsi muno yamusalanginye, pakuti nkamukolonganike pamwi.

³⁵ Ndamutwala mu lwanga lwa antu ya mitundu yuze. Kuku kwene akuno ndamupingwila apaswe.

³⁶ Vino napingwilile ivikolwe vinu mu Lwanga lwa Sinai ali vino ndamupingwila namwe. Ivyalanda ne Yawe Simwandalali.”

³⁷ Nemo ndamupisya mwisika lya ntuwa yane ya ucemi, nupya ndamuwezya sile ansokotwa.

³⁸ Pali mwemwe kwene ndafumyapo yacisanguka antalamila. Kwene ndayafumya mu mpanga muno yacili yakwikala, lelo ntalayata ukuti yakawelele mu mpanga ya ina Izlaeli foo. Lyene alino mulasininkizya ukuti nene indi Yawe.

³⁹ Mwe ina Izlaeli, Yawe Simwandalali wavwanga wati, “Ale mule mutwalilile ukupepa tuluwi twinu! Lelo nemo nalapa ukuti ku nkolelo mulasuka muvwe izwi lyane. Mutalasausya nupya izina lyane lyamuzilo ku vya mawila inu nu ku tuluwi twinu.

⁴⁰ “Pano Yawe Simwandalali wavwanga ukuti pa Mwamba wane wamuzilo, pa mwamba utali wakwe Izlaeli, apano ang'anda yonsi yakwe Izlaeli yalikala nu kumpepa. Apano nemo ndamuzengela, nu kupokelela impolelwa zinu, amawila inu asuma, pamwi na mawila yauze amuzilo.

⁴¹ Lino ndamufumya mu mpanga muno namusalanginye nu kumukonganika pamwi, alino ndapokelela impolelwa zinu zino mukaoca. Antu amitundu yonsi yalalola ukuti fwandi nene wamuzilo, pano mwemo mulampepa.

⁴² Lino ndamuwezezya mu mpanga ya Izlaeli, ino nalavile ukupeela ivikolwe vinu, alino mulasininkizya ukuti nene indi Yawe.

⁴³ Alino mulaiusya ivintu vyonsi vyawinyi vino mukacita, navino mukaikowezyako mwe eneco. Ku mwenzo kulasalokwa pamulandu wa vintu viipe vyonsi vino mukacita.

⁴⁴ Mwemo mwe ina Izlaeli, mulasininkizya ukuti nene indi Yawe, pano nemo nsimucita ukulingana ni mipitile inu iipe, ni misango inu ivulungane, awe. Vino nemo ndamucita, ivyakusunga sile umucinzi wane epela. Ivyalanda ne Yawe Simwandalali.”

Umoto ku kayeya

⁴⁵ Pacisila cakwe vii Yawe avwanga kunondi ati,

⁴⁶ “We mwana wa muntu, senukila kwilunji, lozya amazwi yako ku kayeya usesemele umutengo wa mpanga ya Negebu.

⁴⁷ Nena umutengo waku ntunga yaku kayeya ukuti uuvwe vino ne Yawe nkumunena ukuti, lola! Nemo namasonteka umoto nga nao umaoca imiti yonsi iisi ni yume kwene. Pasikuloleka cakuzimya cimbilimbili cakweo. Umatandikila ku Negebu, ku kayeya ukuyafika nu ku katutu, nu kuyaoca vyonsi pyu.

⁴⁸ Na antu yonsi yalalola ukuti uwausontike anene ne Yawe nu kuzima utalazima foo.”

⁴⁹ Nga nani ali pakwasuka inti, “Yawe Simwandalali, antu yakalanda kunondi yati, ‘Umuntu wiyo akauma sile imilumbe!’ ”