Ezekelo 2 - Amazwi Yakwe Leza 2013

Leza waama Ezekelo ukuya kasema

¹ Ngi zwi lilyo ilineena liti, “We mwana wa muntu, katuka ndande nawe!”

² Lino akulanda nani, Mupasi wiza wingila munondi nu kunjimika apa ngazo zyane, nga alino nuvwa akulanda kunondi,

³ anena ati, “We mwana wa muntu, nkukutuma ku ina Izlaeli, yacisanguka ansangukila. Yansangukila ukufika na pilelo, alio kwene kumwi ni vikolwe vyao.

⁴ Antu yaa, yakoma imitwe nu kuumalala imyenzo, ali yano nkukutumako kuti ukayanene vino ne Yawe Simwandalali nalanda.

⁵ Yuvwe nanti yakane ukuvwa, uluko lulo lutalami lulamanya ukuti pakasi kao paali kasema.

⁶ “Nawe we mwana wa muntu, utoopa nga yakunena yati, ‘Imyunga yatikuzinguluka, utenzi na pa makalela.’ Utoopa amazwi yaa, utaya ni ntete ndi yakutunwila amanso, pano uluko lulo lwatalama.

⁷ Yuvwe nanti yatuvwa wemo uce ukayanene amazwi yane pano uluko lulo ulutalame.

⁸ “Lelo wemo, we mwana wa muntu uvwa vino nkukunena. Utezya uye mutalami wa luko lulu lutalame. Asamula akanwa, ulye cino namakupeela.”

⁹ Lyene lino nalolekesya, indola ikasa likonzolwike, lilemile na kalata umupombwe.

¹⁰ Nawe amupombolola apa manso yane, nga ndola ukuti iyalemba mbali zyonsi ziili. Palemvilwe ukuti ukulosya, ukuteta, nu kulilizika.