Ezekelo 19 - Amazwi Yakwe Leza 2013

Ulwimbo lwa kulosya intunguluzi ziili zya ina Izlaeli

¹ Yawe anena ati, “Ale lyene saula ulwimbo lwakulosya intunguluzi ziili zya ina Izlaeli uti,

² ‘Nyoko wali a cisama wakaci pakasi kakwe yacisama, walambalalanga pamwi nu ufyo wakwe yacisama, wakuzizyanga utwana twakwe umu ufyo wa twana twakwe yacisama.

³ Wakuzizye umwana wakwe wenga, wiyo wino wasambilizye ukulunga, asuka umwana wiyo atandika kulema antu.

⁴ Antu ya mitundu yuze lino yuvwile yamukatukila, mpaka yasuka yamulemenkezya mu ucinga, yamwika mu cimponda nu kumutwala ku Eguputo.

⁵ Apakulola ukuti vino cisama wiyo walondanga ukucita vyavulungana, nu utailo wakwe ononeka, cisama wiyo watozile umwana wakwe muze amucita kuya cisama wamaka.

⁶ Walanga wafika pa cimo cakuya cisama wamaka, avino watandike ukupitana pamwi na yacisama yauze. Asuka asambilila kulunga, atandika nu kulema antu.

⁷ Wene walwisizye amasano ya antu yalya nu konona imisumba yao. Impanga pamwi na ikazi ya mwenemo, pasi pakuvwa intete apa kuvwa kung'anza kwakwe.

⁸ Alino antu amitundu ya mpanga zya mumbali yakolongine ukwiza lwisya cisama wiyo. Yene yatevile isumbo nu kumulema ali muno yamulemile.

⁹ Yamwisile mu cimponda, yamusenda nu kumutwala ku mwene waku Babiloni. Yamusumbile mu ng'anda yaminyololo, apakuti kung'anza kwakwe kutakatale kuvwike mu myamba yamu Izlaeli.

Umutingi uume

¹⁰ Nupya nyoko wali wa mutingi uwalemilwe mupipi na manzi. Wali ulembe nupya waseekanga amatingi wakwe cimwi, pamulandu wakuti pano wali, pali amanzi avule.

¹¹ Wene watumbanga imisambo ikome, iyo ino yizile iya intuwa zya mwene. Yene yakulanga nu kutalimpa, isuka ifika nu mukasi ka makumbi. Yonsi yalolekesyanga ukulemba nu utali wakweo.

¹² Lelo antu acipyu yene iyautukula, yauwisya na pansi. Iviseekwa vyakweo ali pakuuma, pamulandu wa muza waku ufumondaka. Imisambo yakweo nayo ikontoka, yuuma ipya nu ku moto.

¹³ Nga alino lyene iulemwa mu lwanga, mu mpanga iyumalale ndi, umutaya amanzi.

¹⁴ Nga alino mu cimuti kwene ca mutingi mufumamo umoto, nao wiza oca misambo yakweo kumwi ni viseekwa vyakweo. Awe imisambo iyo yakweo italatala ikome nupya, nupya italatala iye intuwa zyakwe yakateeka.’ Fwandi lulo ali lwimbo lwa ulanda, ulukaimbwa lili lili apa ndosya.”