Ezekelo 18 - Amazwi Yakwe Leza 2013

Cila muntu alailolwela pa vicitwa vyakwe

¹ Yawe avwanga kunondi ati,

² “Uzye mwe antu mwalozya mwi apakuuma umulumbe uu? Pano antu yakavwanga mu mpanga ya Izlaeli yati, ‘Ivikolwe vitu ivyalile amatingi masasalume, lelo swe ana kuvyalwa yatuletela uwizila mu mino?’

³ Icumi ne Yawe waumi nkuti akasili umulumbe uu mutalauswilizya ukuulandapo nupya mu Izlaeli.

⁴ Pano umupasi wa mukwasi, cisi mulandu ndu monsi nanti umwanaci, yonsi iyakwane. Umuntu akaifya aliwe alafwa.

⁵ “Umuntu uwakaele akalondela amasunde yane, akacita ni vyaololoke.

⁶ Wene asiliila impolelwa pa myamba, asitumpwila amanso ku tuluwi twamu ng'anda yakwe Izlaeli, asilongozya na muka muze, nanti kupalama kuli mama ali ku mpepo.

⁷ Asifyenga umuntu ali wensi, lelo akalipa kamukole apakwazima. Asipoka kantu ku maka, akapeela uwanzala vyakulya nu kuzwika wiyo ali tupu.

⁸ Asiliila muli vino wazimisya, asipoka nsonse, akafuntusya iminwe yakwe ku viipe, akapingwila na antu mu ulungi.

⁹ Akalondela amasunde yane nu kuwaka vipope vyane, pakuti apite nu ufumacumi. Ala wiyo ali mulungami wampomvu, vii ivyalanda ne Yawe.

¹⁰ “Lelo umuntu ndi wavyala umwana umonsi intalanganyi, cikoma, wiyo akacita vimwi pa vintu iviipe,

¹¹ nanti isi wene atatala wacita, lelo umwana wiyo wakamuka mukuliila impolelwa pa myamba nu kulongozya na yamuka yauze,

¹² akacuzya mupina nu mulanda, akapokolola vya eneco ku maka, asiwezya vino wazima, akatumpwila amanso ku tuluwi, akacita vyawinyi,

¹³ akaliila muli vino wazimisya nu kupoka tunsonse, umwana wiyo aakacita iviipe vii vyonsi vyawinyi atalaya nu umi, lelo alafwa nga nu wazi wakwe ulaya pa mutwe wakwe umweneco.

¹⁴ Lelo umuntu umwi ndi wavyala umwana umonsi, walola na maifyo yonsi yano isi wacita lelo atamukolinye.

¹⁵ Wene asiliila impolelwa pa myamba, asitumpwila amanso ku tuluwi twa ng'anda yakwe Izlaeli, asilongozya na muka muze,

¹⁶ asicuzya umuntu nanti wenga, asipoka kamukole, asipokolola vya eneco ku maka, akapeela ali ni nzala icakulya, akazwika yayo ali tupu,

¹⁷ akafuntusya minwe yakwe ku viipe, asilonkelamo muli vino wazimisya, asipoka nsonse, lelo wene akalondela ivipope vyane nu kuwaka amasunde yane yonsi, umwana wiyo atalafwa foo pa maifyo yakwe isi, lelo alaya nu umi.

¹⁸ Isi wene alafwila pa maifyo yakwe umweneco, pano wali umukakate, wapokololanga vya eneco ku maka, atazifizye mukasi ka antu yakwe.

¹⁹ “Lelo mwemo munguzya muti, ‘Uzye pacani cino umwana atangapeelwa umulandu pa kwifya kwakwe isi?’ Uwasuko aewu wakuti umwana wene wacitanga ivyaololoke nupya ivisuma. Nupya wene walondelanga ningo amasunde yane yonsi, uli mulandu kwene uno wene angikalilila nu umi.

²⁰ Uwaifizye aliwe alafwa, isi nawe atalapeelwa umulandu pa maifyo ya mwana. Umusuma alalambulwa pa usuma wakwe, umwipe nawe alapeelwa umulandu pa uyi wakwe.

²¹ “Umuntu umwipe ndi wata ukwifya, amalondela na masunde yane yonsi, amacita ni vyaulungi nupya ivisuma, umuntu wamusango uo atalafwa foo, lelo alaya nu umi.

²² Wene alelelwa uluse pa viipe vyakwe vyonsi, alaya nu umi pamulandu wakucita vilungame.

²³ Nemo ne Yawe Simwandalali nkuuzya inti, ‘Uzye nemo ne Yawe nkasansamuka pakulola umuntu mwipe kuno wafwa?’ Ala asi vivyo foo, lelo nemo nkasansamuka pakulola umuntu mwipe kuno wazenzuka nu kuya nu umi.

²⁴ “Lelo umuntu musuma ndi wata kuzifya, watandika nu kwifya, amacita ni vintu iviipisye ivikacita antu aipe, uzye umuntu wiyo angaya nu umi? Awe foo. Ni visuma vyonsi vino wacita yatange yaviusye. Angafwila pa utalami wakwe na pa viipe vino wacita.

²⁵ “Lelo mwemo mukavwanga muti, ‘Ivikacita Yawe awe vitalolamo.’ Uvwini kuno mwe, mwe ina lzlaeli. Fwandi mwemo mukati musango uno nemo nkacitilamo ivintu utalolamo. Ala awe, imisango inu ali ino italolamo.

²⁶ Umuntu musuma ndi wata ukuzifya watandika nu kucita iviipe alino nu kufwa wafwa, ala wene wafwila pa maifyo yakwe.

²⁷ Umuntu mwipe ndi wata ukwifya, watandika nu kucita vya ulungi nupya ivisuma, ala umuntu wiyo watapususya umi wakwe.

²⁸ Pano wene ala watalola uyi wa vintu vino wacitanga, fwandi nawe ali pakuvita. Cacumi, umuntu wiyo alaya nu umi, atalafwa foo.

²⁹ Alino mwemo mwe ina Izlaeli apakuti mwati ivikacita Yawe vitalolamo, uzye cumi kwene vino nemo nkacita vitalolamo? Ala imisango inu sile ali ino italolamo.

³⁰ “Fwandi lyene ne Yawe Simwandalali namunenelapo mwe ina lzlaeli ukuti nemo ndamupingwila mwemwe mwensi wenga wenga ukulingana ni vicitwa vinu. Fwandi funtukini ku vintu vyonsi viipe vino mukacita, pano maifyo yinu yalamuletelela.

³¹ Tiini iviipe vyonsi vyampiti. Senulini amano inu ni myenzo inu. Uzye icani cino mwe ina Izlaeli mungalondela ukufwila?

³² Nemo ne Yawe Simwandalali nalanda nati, nemo nsilonda ukuti umuntu nanti wenga akafwe. Fwandi mwemo tiini ukwifya, uleke muye nu umi.”