Ezekelo 17 - Amazwi Yakwe Leza 2013

Umulumbe wakwe lyang'anda'anda nu mutingi

¹ Yawe avwanga kunondi ati,

² “We mwana wa muntu, umila aina Izlaeli umulumbe uu,

³ uleke yamanye vino ne Yawe nkuyanena inti, lyang'anda mukalamba, uwa maapa akulu na mavumbu atali. Wene wakweti na mavumbu asuma nupya amaala maala. Lyang'anda'anda wiyo waile ku mwamba wa Lebanoni, aya atimpula insongo pa ntonje ya kamuti kamwi akatalimpisye.

⁴ Lyene lyang'anda wiyo atwala ni nsongo zizyo ku mpanga imwi ya aculuzi, nu kuya iika mu musumba umwi wa aculuzi.

⁵ Nupya wizile asenda umusonga wa mutingi nu kuya ulema mu musili uvunde umu mbali ya luzi umwali amanzi avule, pakuti uce ukaye ilumba lya muti.

⁶ Awe musonga uo walemuka wasuka waya umutingi, utali lelo wasapalile, imisambo yakweo yasonsile mupela kuli lyang'anda, ni misisi yakweo nayo yayanga pansi. Fwandi wasangwike umutingi, wapanda ni nsala nu kukwata imisambo.

⁷ “Lelo kwaliko lyang'anda namuze, nawe mukulu uwa maapa akulu na mavumbu nyanya. Umutingi nao wafumya imisisi yakweo mu musili, muno walemilwe nu kuilozya kuli lyang'anda, ni misambo kwene apakuti avikontelele.

⁸ Yaulemile mu musili uvunde umu mbali ya manzi aingi pakuleka ukwate imisambo, useeke ni viseekwa nga nu kusanguka umutingi ukankala.

⁹ “Uyanene uti, ‘Yawe Simwandalali wavwanga wati, Uzye ulalemuka? Uzye lyang'anda atalawipa, uzye atalaukuntola iviseekwa nu kuleka amafwa apya yonsi yano yatumba yakanyale? Apakwipa kumwi ni misisi patalalondekwa amakasa akome nanti antu avule.

¹⁰ Ukulemwa kuno walemwa, uzye ulalemuka? Uzye utalanyala, umuza waku ufumondaka ndi wapunga kuno uli? Ala ulumila pa musili kwene pano wamelela.’”

Leza walondolola umulumbe

¹¹ Yawe avwanga kunondi ati,

¹² “Nena uluko luu lwa antu atalame uti, ‘Uzye mutamanyile icintu cii muno cilozile? Yanene uti umwene waku Babiloni wizile ku Yelusalemu, wasenzile umwene waku Yelusalemu pamwi ni nkombe zyakwe, ayatwala nu ku musumba wakwe wa Babiloni.

¹³ Watozile nu muntu wenga uwamu luko lwa mwene awino yapangana nawe upangano. Amunena nu kulapa ukuti upangano uo utalononeka. Lilyo ala umwene waku Babiloni wasenda ni ntunguluzi zyamu mpanga,

¹⁴ apakuti umutundu waziko ucepelwe amaka, ukaposiwe nu kukatukila umwene waku Babiloni, na pakuti upangano wasungwa ningo.

¹⁵ Lelo umwene waku Yuda wene wasangukile umwene waku Babiloni, watumile inkombe uku Eguputo, apakuyalengako imfwalasi ni vita ivivule. Uzye umuntu wamusango ndi uo angasyuka? Uzye ndi wacita vivyo yatange yamucitepo cimwi? Uzye angonona upangano ukwaula kuti yamufulwilepo?’

¹⁶ “Nemo ne Yawe Simwandalali nalapa nati kasili, umwene wiyo kakafwile ku Babiloni, pano wene wasuula umulapo, nupya wonona nu upangano uno napangine nu mwene waku Babiloni, wiyo uwamutesile na pa cilimba ca wene.

¹⁷ Nanti angala Falao angakwata uli ivita vya maka, awe nce nawe kwene angaposiwa ukutuula kweneko umwene waku Yuda umu nkondo. Nanti angala Ayuda yangatuntumalika iviimbili nu kwimba yamunyama cakuti pafwile na antu avule, nalyo kwene pasi icilaomba.

¹⁸ Pano umwene wiyo wasuula umulapo, nupya wonona upangano. Ala wene atange apusuke foo pamulandu wakucita ivintu vivyo.

¹⁹ “Pamulandu wakusuula umulapo wane nu konona upangano wane, ndaviwezezya pa mutwe wakwe.

²⁰ Ndamuteyapo isumbo lyane, alalemwa mu lukose lwane, nga alino ndamutwala ku Babiloni akuno nkamufulwile pamulandu wakonona umulapo uno walafile kunondi.

²¹ Ivita vyakwe vyampomvu vilapona pansi ku lupanga na alasyala impondo yalasalanganila mu ntunga zyonsi. Alino lyene mulamanya ukuti anene ne Yawe nalanda.”

Ukutaila vino Leza walaya

²² Yawe Simwandalali wavwanga wati, “Nemo ndatimpula insongo ya kamuti kamwi akatalimpisye, ndatatoola nu munsonga onga nkauleme pa mwamba umwi utali.

²³ Ndaulema pa mwamba umwi utalimpisye mu Izlaeli. Wene ulalemuka uce ukakule ukatumbe ni misambo iingi, nga nu kuseeka iviseekwa. Ulaya umuti umwi utalimpisye. Ivyunyi vya misango yonsi akuno vilaikala, nu kuuwa mu misambo yakweo.

²⁴ Alino imiti yamu mpanga yonsi kwene ilamanya ukuti nene indi Yawe, nu kuti nene nkasinda imiti itali, nu kuleka imiti iipi aino italimpisye, nu kuti nene nenga nkaleka imiti iisi yauma nga nu kulenga ukuti imiti yume yalemba. Ee, anene ne Yawe nalanda nu kucita avino ndacita.”