Ezekelo 16 - Amazwi Yakwe Leza 2013

Yelusalemu, muntataila

¹ Yawe avwanga kunondi ati,

² “We mwana wa muntu, manyisya Yelusalemu apa uyi wakwe uwipisye.

³ Munene ndi vino Yawe Simwandalali wanena Yelusalemu ati, ‘Kuno wafuma apakuti wize uvyalwe uku Kenani. So, wali umwina Amoli, nyoko nawe umwina Hiti.

⁴ Uwanda uno wavilwe, umutoto wako utaputwilwe foo. Yatakufuzile na manzi apakukuzifya, yatakupasile umusilya nanti sile ukukupombelekezya umu tusalu.

⁵ Kutali nanti wenga uwakuweni luseluse nanti ukukuvwila amizu ya kukucitila icili consi apa vintu vivyo. Ala uwanda uno wavilwe, yakusankilizye sile umu mpanga. Fwandi vivyo, ali vino antu yakupasile.

⁶ “Lelo nemo, napitile lwakuno yakusumbile. Nga nuvwa kuno ukupantoka, ukuivumvunya umu wazi wako. Nga nalino ucili uizi mumu kwene, niza nakuvwanzya nati, ‘Samalale, ungala uye nu umi ukakule uye wi sote lya mu mpanga.’

⁷ Nawe wakula, wasuka waya sile uwikolo ukulingana ni ciimo cakutwalwa. Wamela maele ni nyele zyako zyakula zyavunda wakwe cimwi, lelo ala usile sile tupu.

⁸ “Nga lino napisile umupipi nawe, nakulolekesya, nazana nu kuti insita yako iya citemwiko, yatifikila. Alino niza navungulula isempe lya cikuwalo cane, nakuvimbilikizya apakufisa impamba zyako, pano wali tupu. Nga lino nalapa nu mulapo wakupingana nawe upangano pano lyene waya wewe wane.” Vii, ivyalanda ne Yawe Simwandalali.

⁹ “Natoozile na manzi, nakufula uwazi wa mbuza nakupaka na mafuta.

¹⁰ Nakuzwika ni nsalu zipikule ni nsapato zya mpapa isuma wakwe cimwi, nga ni citambala iciyembe icakuzwala uku mutwe kumwi ni candaluwa ca mutengo.

¹¹ Nakuyemvizye ni viyembelo. Ku makasa, nakuzwisile amakoza nu tuwangili alino umu nsingo namo nakuzwika ivikasi ni nsambo izyamutengo.

¹² Umu mpuno namo nakuzwisile icipini, ku makutwi nako nakuzwisile amaelena nga ni cingala ciyembe uku mutwe wako.

¹³ Fwandi, wakweti sile iviyembelo vyakwe zaabu na siluva, insalu zitelepelele ni zipikulwe, walyanga usu utonyoleke, uuci ni vya manona. Wasuka wayemba wakwe cimwi cakuti wafika na kuli unamwene.

¹⁴ Walumbwike umu mitundu pa lwa kuyemba kwako, pamulandu wakuti anene nakuyemvizye ukuyemba kumwi ukumalilike ni viyembelo vya mutengo. Vii ivyalanda ne Yawe Simwandalali.

¹⁵ “Lelo wemo wayuvwanga apa kuyemba kwako, waleka nu lulumbi lwako lwakutwala uku ulalelale. Waipelesyanga kuli ucizelele uku mupita nzila ali wensi.

¹⁶ Watolanga ivyakuzwala vyako ivicindame, nu kuipangila utuvuwa umwa kupepelamo tuleza utuluwi, ali muno walongozyanga.

¹⁷ Watolanga iviyembelo vino nakupile ivyakwe zaabu na siluva, apa kupangilamo ivinkolanya vya yantu, ivya kuomvya muli ucizelele wako.

¹⁸ Nupya watolanga insalu zyako izipikulwe, nu kuvizwika. Nga alino utula kuno vili amafuta yane nu ubani wane.

¹⁹ Ivyakulya vino nakupeelanga vya usu utonyoleke, amafuta nu uuci vino nakwimulanga, ali vino wavyocelanga ukuya icinunu cisuma icakuvisansamusya! Ee, anene Yawe nakunenelapo.

²⁰ “Lyene watola ana yako yakaci na yakalume, yano waviile kunondi, ayano wocela impolelwa ya cakulya uku tuluwi. Uzye kwene pali ucizelele wako utakumanizye,

²¹ apakuti untolele na ana uyakome nu kuyapeela impolelwa ku tuluwi tuto?

²² Apa kasita konsi kaa kano wikalila nu kucita ucizelele, icumi usitala uwikale pansi nu kwiusya vino waviilwe, na vino walaangananga sile umu wazi wa mbuza, na vino wapitanga tupu umu wance wako.”

Ucizelele uwamu Yelusalemu

²³ Nupya Yawe Simwandalali avwanga ati, “Ulacilola we Yelusalemu! Icumi ulacilola! Apa viipe vyonsi vino wemo ukacita,

²⁴ walundapo nu kuteyanya incende zimwi umu mbali ya miseo, apa kupepelapo utuluwi nu kucitilapo vya ucizelele.

²⁵ Nanti angala wayemba, lelo kwene wewe mukowele. Pasi pano umwili wako ukautwala uku muntu ali wensi wino wiza kunuli, icakuti lyene na ucizelele wako wati usuka ukulilako.

²⁶ Wacitanga ucizelele na ina Eguputo yacizelele yakulu, ali yano mwalongozyanga nayo wasuka wamvulumwila ni cipyu.

²⁷ Icaleka lyene ninkatusya ikasa lyane apakukufulula. Nincefyako icakulya icakukupeela, natinkusumba umu makasa ya anisi yako, akazyana aina Filisti, yano insonyi zyatiziyalema apamulandu ni mipitile yako iipisye.

²⁸ Wemo walongozyanga na ina Asilya, nu kutonta foo. Pano wapunukisye, utatazile uti cafula.

²⁹ Nupya wiza walundapo ukulongozya na ina Babiloni, antu ya mpanga iyakomesya uculuzi. Nga nalyo kwene utatazile uti cafula.”

³⁰ Yawe Simwandalali wati, “Kalanda we! Vino umwenzo wako watovoka, imicitile yako ikoline nu mwanaci cizelele umukamuke!

³¹ Umu miseo monsi, wemo wapanga mwenemo utuvuwa umwa kupepelamo utuluwi, napa masansa ali yonsi. Ukuya kwene usi wa mwanaci cizelele wiyo akalonda ukulipilwa impiya.

³² Wemo waya wakwe mama wino wasuula iya, nupya ukalongozya na onsi yauze.

³³ Cizelele wensi akalipilwa pali ucizelele wakwe. Lelo wemo, awewe ukapeela uwila uku onsi yano akulanzya. Nupya wemo, awewe kwene ukayapa amafukakanwa pakuti yafume umu mpanga zyao nu kwiza umukulongozya nawe.

³⁴ Ee kwene umucumi wemo waiyela na yacizelele yauze, pano kutaya umonsi wino akakulanzya, nupya wemo usilipilwa kantu nanti kamwi foo. Lelo wemo, awewe kwene ukayalipila! Ee kwene umucumi wemo wala waiyela sile.”

Upinguzi wakwe Leza pali Yelusalemu

³⁵ Lyene we Yelusalemu cizelele wakantu, uvwa vino ne Yawe nkukunena!

³⁶ Vii ivyalanda ne Yawe Simwandalali, “Pamulandu wakuti wayazulilanga nu kuleka yakulole tupu, apakulongozya na yacuza yako nu tuluwi twako utwamuselu, nupya uvipeela nu wazi wa yana yako,

³⁷ icaleka nemo namakolonganika akundwe yako yonsi, yano wacinanga nayo, yano watemilwe na yano wapasile kwene. Ndayakolonganika icakuti mpaka yakakukatukile imbali zyonsi ziili. Alino nkakuzuule pa manso yao, pakuti nayo yakulole tupu.

³⁸ Nupya ndakupezya ivikapeziwa yamangu yano atemwa ukulongozya nu kuzwisya uwazi. Ndakuvunuka nu lucu nu uzuwa.

³⁹ Nga lino lyene ndakuswilizya umu makasa ya akundwe yako, nayo yalapasaula iviimbili vya tuvuwa twako, yakonone ni ncende zya kupepelapo utuluwi, yakakulepolele ivyakuzwala vyako, yakakupokolole ni viyembelo vyako nu kukusya tupu.

⁴⁰ “Nupya yalatunka iumba likakukatukile, apa kukutamola na amawe nu kukukomola nu lupanga.

⁴¹ Yaloca amang'anda yako nu kukupezya apa manso yi umba lyakwe yamangu. Ala mwine, ali lino ndaputula umunyanya wakwe ucizelele wako. Utalatala nupya ukalipile yacizelele yako aonsi.

⁴² Avino ndamyalalika icipyu cino nakukwatila. Alino uzuwa wane ulakutaluka, umwenzo wane ulamyalala, nu ukali wane ulasila.

⁴³ Wemo wakana ukwiusya amanda ya ukazyana wako, ukansonsomba na muli vii vyonsi. Nani kwene fwandi ndakuwezezya imicitile yako pa mutwe wako. Ivyalanda ne Yawe Simwandalali. Uzye kwene ukunena ndi vino utacisile iviipe umu mipitile yako iyamuselu?

Ivyaya nyina ivikaya nu mwana kaci

⁴⁴ “We Yelusalemu, ala antu yamakunenanga ipinda lii iyati, ‘Ivikaya nyina ivikaya nu mwana kaci.’

⁴⁵ Icumicumi we kaciwe, wakola nyoko. Nyoko wapata so, wapatila kumwi na anyonko kwene. Wemo wewe mwina yankazi yauzo, yano yapata ya iya na ana yao kwene. Wemo pamwi ni misumba inyonko mwakweti nyoko umwina Hiti, so nawe wali umwina Amoli.

⁴⁶ “Nyokolenzi wali a Samaliya, wino watenzi intunga yaku katutu kako pamwi na ana yakwe ya kaci. Umutowako umwanaci a Sodoma, pamwi na ato yakwe yakaci, yao yano ikalile lwaku ntunga ya kayeya kako.

⁴⁷ Wemo utapelezile sile apakulondelela imisango yao nu kukopa imiyele yao iipisye. Lelo umu vicitwa vyako patasumvile ni nsita wasuka wewe kwene wayaluta ukucita ivintu vimwi vivyo ivya muselu.

⁴⁸ “Nene ne Yawe, nalapa umwizina lyakwe kaci wako Sodoma kumwi na ana yakwe, awe cumi yatatazile yaifye ndi vino wemo ukwifya pamwi na ana yako.

⁴⁹ Sodoma na ana yakwe yayuvwanga pamulandu wakuti yene yakwatisye ivyakulya, nu kwikala ningo, nanti angala yatasakamalanga ukusunga alanda na apuzi.

⁵⁰ Yali ni vilumba, yali atalame, nupya yacitanga ni vintu vino nemo napatisya. Cico icalenzile nani njalovye, nu kucimanya nawe kwene wacimanya.

⁵¹ “Iviipe vino Samaliya wacitanga, vyacepapo apa viipe vino wemo ukacita. Wemo wamuluta umukucita ivintu vyawinyi, icaleka na yakaci yauzo yakaloleka yakacita ya vyaololoke kuluta wewe.

⁵² Fwandi wemo ufwile uuvwa insonyi. Pasi pano ivicitwa vyako iviipe vyaipisyapo ukuluta iviipe vyakwe yakaci yako, cakuti yene yaloleka penepo akaele. Icaleka wemo insonyi kazikuleme nu kuzewana ku zewane. Pano awewe we mweneco walenga ukuti yakaci yauzo yalolekepo asuma.”

Sodoma na Samaliya yalasyuka nupya

⁵³ Nalyuze Yawe wanenyile Yelusalemu ati, “Nemo ndalenga ukuti Sodoma ace asyuke pamwi na ana yakwe, na Samaliya nawe kwene akasyuke nupya, pamwi na antu. Icacumi, nawe kwene we Yelusalemu ndalenga ukuti ukasyuke nalyuze.

⁵⁴ Ali pakuti ukatekezye imyenzo pakuvwa umuzewanya wako na pakulemwa ni nsonyi.

⁵⁵ Umunyonko Sodoma na ana yakwe yakaci yalavunukwa nalyuze umwi syuko lyako ilyampiti. Samaliya na ana yakwe yakaci yalaswilila nupya kwene kwi syuko lyako lyampiti. Nawe kwene na ana yako yakaci mulapelwa nupya isyuko lilyo ilyampiti.

⁵⁶ Uzye asi munyonko Sodoma wino wambanga mwi lyasi lyako mu nsita ya cilumba cako,

⁵⁷ lino yatacili yakuzule usyale tupu? Fwandi lyene awewe kwene wino yakusoweka ku ana yakwe Edomu anaci, ku anaci yonsi amu mbali zyako nu ku anaci aina Filisti. Ala yakusuula kuli yonsi akuzinguluka.

⁵⁸ Avino wailetelile we mweneco ku vyaukulukusi wako nu ku vicitwa vyako vyamuselu.” Ivyalanda Yawe.

Upangano wakuyelelela pee

⁵⁹ Nupya Yawe Simwandalali avwanga ati, “We Yelusalemu, nemo ndakulinganya sile pa vintu vino wemo ukacita, pano onona nu upangano.

⁶⁰ Lelo kwene ndiusya upangano uno napangine nawe, lino wali umwance, nupya ndapangana nawe upangano wakuyelelela pee.

⁶¹ Lino ndatoola yakaci yauzo, nyokolenzi nu muto wako, nu kuyapeela kunuli, ukuti yangaya ana yako, nanti ntalavile ulayo uno napangine nawe, nga alino nawe uliusya imiyele yako yampiti ni nsonyi zilakulema.

⁶² Pasi pano ndapangana nawe upangano cipya cipya, nga alino ulamanya ukuti fwandi nene indi Yawe Simwandalali.

⁶³ Ali pakuti uce ukaiusya nu kulemwa ni nsonyi, ukasyalilile cele mu nsonyi zyako, lilyo lino ndakuyelela uluse kuli vyonsi vino wacita. Ivyalanda ne Yawe.”