Ezekelo 14 - Amazwi Yakwe Leza 2013

Leza wapeela antu umulandu wa kupepa utuluwi

¹ Yamwi mu ntunguluzi zya ina Izlaeli iiza kunondi nga yikala pansi uku nkolelo yane.

² Yawe avwanga kunondi ati,

³ “We mwana wa muntu, antu yaa yatiyika imyenzo yao ku tuluwi twao, nu kwika amanso yao pa vintu vyuze vyakupumika kweneko. Uzye yene yakwelenganya ukuti nemo ndayaasuka lino yanguzya?

⁴ “Caleka uyanene ukuti ne Yawe nkulanda ukuti, ‘Ndi cakuti umwina Izlaeli umwi ali wensi wika umwenzo pa tuluwi twakwe nu kwika amanso yakwe pa vintu vyuze vyakupumika kweneko, nga lyene aya ku kuuzya kuli kasema, lyene ne Yawe ne mwisikulu ndamwasuka uwasuko ulingine nu upefi wa tuluwi twakwe.

⁵ Ndacita cii pakuti imbwezye imyenzo ya ina Izlaeli, yayo yonsi yano yamfutatila nu kulondela utuluwi twao.’

⁶ “Caleka unene aina Izlaeli ukuti Yawe Simwandalali wavwanga wati, ‘Zenzukini! Fumini ku tuluwi twinu nu kuta imicitile inu iipe!’

⁷ “Ndi cakuti umuntu ali wensi, mwina Izlaeli ali wensi nanti umwinamasi wino akwikala pakasi kao, wakana nene nu kwika umwenzo wakwe pa tuluwi twakwe, nga nu kwika amanso yakwe pa vintu vyuze vyakupumika kweneko, umuntu wiyo ndi wiza ku kuuzya kunondi, kupitila muli kasema, ne Yawe ndamwaasuka nemwisikulu.

⁸ Kuli kuti ndapezya umuntu wiyo nu kuleka ukuti aye icakulolela kweneko kuli yauze. Ndamusukula mu antu yane nga lyene mulamanya ukuti nene indi Yawe.

⁹ “Ndi cakuti kasema yamulyombeleka kuti aseme vyaufi, ala anene ne Yawe natindyombeleka kasema wiyo. Nga ndaomvya amaka yane nu kumupezya apakumufumya pakasi ka antu yane aina Izlaeli.

¹⁰ Uvunuko ulaya uli umwi kuli kasema wiyo kumwi na wiyo aile ku kuuzya kunoli.

¹¹ Alino lyene aina Izlaeli yatalansya nupya foo, nanti ukuikowezya ku maifyo yao yonsi. Yene yalaya antu yane, nga nani ndaya Leza wao. Ivyalanda ne Yawe Simwandalali.”

¹² Yawe avwanga kunondi ati,

¹³ “We mwana wa muntu, aikala mpanga ndi yifya kunondi apakuntaya acumi kunondi, lyene ndaomvya amaka yane nu kuyavunuka apa kucefya ivyakulya. Ndaponyezya impanga iyo icipowe nu kukoma antu kumwi ni nyama kwene.

¹⁴ Nanti angala antu yatatu yaa, Nowa, Danieli na Yobo yatenzi mwenemo, yene yangaipususya sile aisikulu ku ololoke wao. Ivyalanda ne Yawe Simwandalali.”

¹⁵ Nanti ndi natumile ivilyanyi kuti vipitane mu mpanga ilya nu konona antu aikalamo, mpaka impanga iyo izulemo uzanzo cakuti kusi nanti wenga angapita kusalala mwenemo pamulandu wa vilyanyi vivyo,

¹⁶ cumi kwene, lino nene indi Yawe waumi, yene yatangapususya ana yao aonsi na anaci. Yangaipususya sile aisikulu, lelo impanga yene ilasanguka amatololo.

¹⁷ “Nanti uzye ndi naponya inkondo umu mpanga kwene iyo nu kupeela ilamulo lyakuti inkondo isansantike mu mpanga kwene iyo nu konona antu kumwi ni nyama,

¹⁸ cumi kwene lino nene ndi waumi, Yawe Simwandalali, lyene antu yayo yatatu nanti angala yalimo, yatangapususya ana yao aonsi na anaci. Yangaipususya sile aisikulu.

¹⁹ “Nanti naponya impungo apa mpanga iyo nu kupongolwela mwenemo ukali wane apakuzwisya uwazi, kukomola antu avule kumwi ni nyama kwene,

²⁰ cumi kwene lino nene ndi waumi, Yawe Simwandalali, nanti angala Nowa, Danieli na Yobo yatenzi mwenemo, yene yangaipususya sile aisikulu ku ololoke wao.

²¹ “Pano vii ivyalanda Yawe Simwandalali. Cilipisya wakwe cimwi lilyo lino ndapezya Yelusalemu ku vyaupinguzi vyane vii vini vyakoofya: inkondo, icipowe, ivilyanyi nga ni ndwala, kuti vyonone antu kumwi ni nyama.

²² Lelo yamwi yalasyalako umu mpanga iyo, yayo alafumyamo ana yao aonsi na anaci. Yene yaliza kunomuli, nga namwe muce mulolekesye imicitile yao. Muce mulole ukwipa kuno yipa, nga lyene musininkizye ukuti nsikuyafyenga apakuyaletela uvunuko.

²³ Lyene alino mulamanya ukuti apamulandu usuma acino nacitile vii vyonsi. Ivyalanda ne Yawe Simwandalali.”