Ezekelo 13 - Amazwi Yakwe Leza 2013

Yakasema yaufi aonsi

¹ Yawe avwanga kunondi ati,

² “We mwana wa muntu, sema isyamo kuli yakasema yamu Izlaeli yano yakusema pali ndakayi. Sesemela yao yano yakuituntumba sile apa lwao uti, ‘Si mungala muvwe ukwizwi lyakwe Yawe!

³ Yawe Simwandalali wavwanga wati, Isyamo, kuli yao yakasema imbulwamano, akasema ivya mu myenzo yao aeneco, ukwaula kulolapo nanti kamwi!

⁴ Yakasema yako we Izlaeli, yakoline na yankusa mu matongwa.

⁵ Mutatala mwacingilila apa kaingilila anisi inu, nanti ukukuulila ng'anda yakwe Izlaeli ilinga, apakuti ikalole ukusipa umu ulwi apa wanda wakwe Yawe.’

⁶ Yakalola ivya uwelewele nu kusowela ivya ntumpu zitupu, ala yakuti nu kuti, ‘Ivyalanda Yawe,’ nalino Yawe atayatumile foo. Nga yataila nu kuti amazwi yao yangafikiliziwa.

⁷ Uzye asi vilolwa vya uwelewele ni visowelo vinu vyaufi lino mukavwanga mukuti, ‘Ivyalanda Yawe.’ Nalino asi anene mvwanzile?

⁸ Icaleka lyene nani namwalukila apamulandu ni vilolwa vinu ni visowelo vinu ivya uwelewele ni vyaufi. Ivyalanda ne Yawe Simwandalali.

⁹ Nkutumpula ikasa lyane nu kukatusya nu kulwisya yakasema ya vya uwelewele. Yatalazumiliziwa ukwiza umwitengo lya yantu yane, yatalalembwa nu mu lupapulo lwakwe ya mwana Izlaeli. Alino mulamanya ukuti nene indi Yawe Simwandalali.

¹⁰ “Pano yakasomba sile antu yane yati, ‘Kuli ulongo.’ Nalino kusi foo. Nalino antu yane yakuula ilinga lyaula kukoma nga yakasema yiza yalikupawila na cipau.

¹¹ Nena yakatakasa yao ukuti, kuliza imvula ikalamba, imvula yamawe akulu, kulakatuka ni cipunga ca muza ukulu.

¹² Lino ilinga lilawa, uzye antu yataluzya yati, ‘Nga cipau mutiswe wino yakupawilile alikwi?’

¹³ “ ‘Icaleka Yawe Simwandalali wavwanga wati, Ndasapula icipunga ca muza uku cipyu cane, ndatonyezya ni mvula ya mawe mu cipyu cane ica ononyi.

¹⁴ Ndawisya ilinga lino mwakupawilile nu mula, ndalisumba pansi nu kusya imifula pambiliwili. Lilawa, namwe kwene lice limwilikizye, nu kumulovya. Alino mulamanya ukuti nene indi Yawe.’

¹⁵ Lino ndamalila uku myalalika icipyu cane apa kuwisya ilinga nu kupezya yano yakupawilile na cipau, alino ndamunena ukuti, ‘Asipapo lyene ilinga lisipo kumwi na yano yakupawilile na cipau,

¹⁶ yakasema ya ina Izlaeli yano yasesemelanga Yelusalemu nu kumulolela ivilolwa vya longo, lino kutali nu longo. Ivyalanda ne Yawe Simwandalali.’ ”

Yamangu yakasema yaufi.

¹⁷ Nupya Yawe anena ne Ezekelo ati, “We mwana wa muntu, apa yantu yako lolapo yamangu aka ituntumba sile ivyakusema. Yanga ukayasoke pali vino yakacita.

¹⁸ Yanene ndi vino Yawe Simwandalali wavwanga wati, ‘Yasyama yamangu yano yasumilila incilizi apa mpingu zya makasa yao monsi, yano yakasumila na antu ya musinku uli onsi ivitambala vyaku mitwe, apakwika imyenzo yao umu citeyo. Ala mukalema imyenzo ya antu yane, lelo mukapanya umwenzo winu mwe yeneco.

¹⁹ Mukanzewanya apa manso ya antu yane, apakuti mulole utungano twakwe baale tumwi utwa pikufi, nga nu tumokolwa twa mukate. Pasi pano mukakoma antu atalinzile nu kufwa, nu kupususya atalinzile nu kwikala muno nsi. Mukasomba antu yane yano yatemwa ukuuvwa vyaufi.’”

²⁰ Icaleka fwandi Yawe Simwandalali wavwanga wati, “Icisuma, mulalola vino ndacitila incilizi, zino mukaomvya apakwezya kulemela antu myenzo wa vyunyi. Ndavilepola apa manso inu kwene, nu kukulula imyenzo yakwe yao yano mukalemela antu myenzo wa vyunyi.

²¹ Ndalepola ni vitambala vinu vyaku mitwe nu kukulula antu yane ku makasa yinu, yatakatale nupya iyaya umu makasa yinu wa nyama zino yakalunga. Alino lyene mulamanya ukuti nene indi Yawe.

²² Pano uku ufi winu mukacuzya imyenzo ya mulungami, wino nemo nsyacuzya foo. Alino mukakomelezya nu mwipe apakuti atata ivicitwa vyakwe iviipe, lelo asyukile nupya uumi.

²³ Lelo ukuya kwene, mutalatala nupya mulole ivilolwa vya uwelewele nanti ukusowela ivyaku nkolelo. Pasi pano ndakulula antu yane ku makasa yinu. Alino mulasininkizya ukuti nene indi Yawe.”