Ezekelo 12 - Amazwi Yakwe Leza 2013

Kasema waya kwati imbutusi

¹ Yawe avwanga kunondi ati,

² “We mwana wa muntu, wemo wikala pakasi ka antu yacisanguka. Yene yakwata amanso akulolelako, lelo yasilola. Yakwata amakutwi akuuvwilako, lelo yasiuvwa, pamulandu wakuti acisanguka.

³ Caleka, we mwana wa muntu, nyepa icifunda cako cakusenda ku uzya. Nga lyene ukatuke apa ulendo umusanya, lino antu yayo yakukulola, ukacite ungati ukuya mu uzya ukufuma ku mwinu ukuya ku mpanga ya inamasi. Limwi antu yayo yangiluka, nanti angala yene acisanguka.

⁴ Lino ucili umusanya, unyepe icifunda cako cakusenda ku uzya, ala yene yakukulola. Lyene amanguzi, lino yakukulola, ufume mu musumba winu, ungati umuntu wino akuya ku uzya.

⁵ Lino yakukulola utulule ulung'umba nga ufumizye icifunda cako mu cipongo cico.

⁶ Leka yalole kuno ukwika cifunda cako pa ciye nu kufumila ukunzi lino kakuku kaciliko. Uvimbe pa manso pakuti utangalola pansi, pano natinkucita kuya icimanyililo cakuceula ang'anda yakwe Izlaeli.”

⁷ Acino nani incita wakwe muno wampelile ilamulo. Umusanya imfumya cifunda cane, icinyepwe kwati ca muntu wino akuya ku uzya. Amanguzi nalyo intulula icipongo mu lung'umba na makasa yane. Lino kakuku katola, imfumya cifunda cane, ncisenda pa ciye ala na antu yalya yakulola.

⁸ Mu katondo Yawe avwanga kunondi ati,

⁹ “We mwana wa muntu, uzye aina Izlaeli, yacisanguka yaya, yatali yakuuzya yati, ‘Uzye ukucita cani?’

¹⁰ Uyanene uti, ‘Vii avino ne Yawe Simwandalali nkulanda: Amazwi yaa yakumile kateeka uwamu Yelusalemu nga na ina Izlaeli yonsi yano yakaikala kweneko.’

¹¹ Uyanene uti, ‘Nene indi cimanyililo kuno muli.’ Ndi vino ncisile, avino cilayacitikila. Yalasendwa ku uzya.

¹² Kateeka wao alasenda cifunda cakwe apa ciye lino kakuku katola. Wene alakatuka nu kufumila pa cipongo cino antu yalatulula mu lung'umba. Alavimba pa manso pakuti atalola pansi pano akupita.

¹³ Ndateya isumbo lyane kuti alemyemo, nga nawe alalemwa mu lukose lwane. Ndamuleta ku Babiloni, ku mpanga ya ina Kalideya, lelo wene atalailola, nga alafwila kuku kwene.

¹⁴ Yonsi aikala apipi na aliwe, yakazwilizya yakwe nga ni vita vyakwe, ndayasalanganyizizya ku ntunga zyonsi zya nsi. Ndayazinganya nu lupanga mu minwe.

¹⁵ Lyene yalamanya ukuti nene indi Yawe, nene nayasalanganyizizya mu nko zyuze nu kuyasansanta mu mpanga izivule.

¹⁶ Lelo ndasyako anono ampendwa yano yalapusuka ku nkondo, ku cipowe nu ku mpungo, apakuti uku nko zyuze kuno yalaya yalamanya ukwipa kuno imicitile yao yaipa. Lyene yazumile ukuti nene indi Yawe.”

¹⁷ Pacisila cakwe vii Yawe avwanga kunondi ati,

¹⁸ “We mwana wa muntu, lino ukulya cakulya ulinzile wazakaza, na lino ukumwa amanzi wakankama pamulandu ni coopo.

¹⁹ Unene aikala mpanga ilya uti, ‘Avino Yawe Simwandalali walanda pamulandu wa ikazi amu Yelusalemu pamwi na amu mpanga ya Izlaeli. Uyanene ndi vino yene yalalya icakulya cao ni sakamika ilikulu. Nupya yalakanka sile uku ntete pa nsita ino yakumwa amanzi. Umu mpanga inu mutalasyala kantu nanti kamwi, pamulandu wa umpulamasunde wakwe yayo yonsi aikala mwenemo.

²⁰ Imisumba muno mwikala antu tupu, ilawa ni mpanga ilasanguka amatololo. Alino mulamanya ndi vino nene indi Yawe Leza.’ ”

Imvwango zimwizimwi izya ufi

²¹ Yawe avwanga kunondi ati,

²² “We mwana wa muntu, mwalozya mwi muno mu mpanga ya Izlaeli apakutaka imuti, ‘Manda yakupita, ni vilolwa ukwaula vino vitumbwile.’?

²³ Lyene uyanene uti, ‘Yawe Simwandalali walanda wati, Namaputula umunyanya wa mvwango iyo, nupya yatalatala yaiomvye umu Izlaeli. Uyanene nu kuti, amanda yali umupipi lino cila cilolwa cilafikiliziwa.

²⁴ Pano umu ina Izlaeli mutalaya nupya ivisowelo vyaufi.

²⁵ Nene ne Yawe ndalanda, na cino ndavwanga vino indi nu kuvwanga nupya navino ndavwanga vilafikiliziwa kwaula nu kusumba kasita. Nupya umu nsita inu kwene, mwe luko lutalame mwe, ali muno ndavwanga izwi nu kulifikilizya. Ivyalanda ne Yawe Simwandalali.’ ”

²⁶ Yawe avwanga kunondi ati,

²⁷ “We mwana wa muntu, lola vino aina Izlaeli yakulanda yati, ‘Icilolwa cino umuntu wi walola, ciliza umu manda ntanenwa ukufuma apilelo, nupya usemo wakwe asi wilelo, uwa patali.’

²⁸ Caleka uyanene uti, ‘Yawe Simwandalali wavwanga wati, Amazwi yane yatalalengela ukufikiliziwa. Vyonsi vino nala nalanda ala nindanda, nupya vilafikiliziwa. Ivyalanda ne Yawe.’ ”