Ezekelo 11 - Amazwi Yakwe Leza 2013

Maifyo ya ina Yelusalemu

¹ Nupya mupasi wankatwisye nu kuntwala ku mpongolo ya Ng'anda ikulu yakwe Leza iyalozizye umulyango uku ufumondaka. Papa kwene apa mpongolo apali aonsi ukulingana ni mpendwa ya makumi yaili na yasano. Pali alio apali na Yazaniya umwana wakwe Azuli na Pelatiya umwana wakwe Benaya, intunguluzi zya yantu.

² Nga alino Yawe anena ati, “We mwana wa muntu, yaa ali yantu yamwi yao yano yakupingila ukucita iviipe nu kupanda amano yaipe uku yantu umu musumba.”

³ Yakavwanga iyati, “Uzye insita ya kukula amang'anda, isi umupipi? Umusumba ukupya wa ntendo apa moto, nga naswe tuli wa nyama.

⁴ Icaleka fwandi, yasesemele ilovyo. Sungala uyasesemele, we mwana wa muntu!”

⁵ Nga nupya Mupasi wakwe Yawe anjikila, anena ati, “Yawe wa vwanga ndi vino, avino mukalanda, mwe ya ng'anda yakwe Izlaeli, lelo manyile vino mukalanda navino mukupanga ukucita.

⁶ Mwazuzya wakwe cimwi ivyala muno musumba, ivya yantu yano mwakomola nga nuku zuzya imiseo yonsi alaswe asyala impondo.”

⁷ Icaleka Yawe Simwandalali wavwanga wati, “Ivyala vino mwasumba umukasi ka musumba ali nyama, umusumba nao ali ntendo, lelo mwemo ndamuzinga mwenemo.

⁸ Uzye mwemo mukoopa ulupanga? Endi, nemo namaleta ivita ivimaiza namalupanga ku kumuzanza. Ivyalanda Yawe.

⁹ Indamuzinga umu musumba nu kumuluula mu makasa ya inamasi, ndafikilizya vino namupingwila.

¹⁰ Mulalukuta muno mpanga yakwe Izlaeli uku lupanga. Ndalinganya apakuti mukamanye ndivino icumi nene indi Yawe.

¹¹ Kuno muli umusumba uu, utalaya intendo foo, namwe mutalaya inyama ino yeleka mwenemo. Pasi pano ndamucitila umulungikila muno kwene, mu mpanga yakwe Izlaeli.

¹² Alino mulamanya ukuti nene Yawe, wino mwakananga ukulondela amasunde yane nu kuwaka ivipope vyane, mukulondelela sile imisango ya mitundu ino yamuzinguluka umu mbali.”

¹³ Lyene mwalola, nalikwene lino nkusema, Pelatiya umwana wakwe Benaya awiyo wafwa. Nga nani inkupama pansi indaizya ni zwi ilikalamba inti, “Kalanda we, we Simwandalali Yawe! Uzye umala umalile ni nsyazi kwene izyasyalapo umu ina Izlaeli?”

Yawe walaya ukuwezya azya kumwao

¹⁴ Pacisila cakwe cico Yawe avwanga kunondi ati,

¹⁵ “We mwana wa muntu, anyonko, kuli kuti akazi kako, auzo ali mu uzya, yonsi ang'anda yakwe Izlaeli, ayayo yano antu aikala mu Yelusalemu yakulandapo yati, ‘Antu yonsi yano yasendwa ku uzya yali kutali na Yawe cakuti yatange yamupepe. Acino impanga ii ndakai yatiya iyakwitu.’ ”

¹⁶ “Caleka unene auzo ali mu uzya ukuti ivintu vino ne Yawe Simwandalali nkumunena aivi: ‘Nene nayatumile kuya ikala mu nko zyuze zyakutali nu kuyasalanganyizizya mu mpanga zyuze. Lelo, pa kasita kanono namayanga nayo mu mpanga muno yaya.’

¹⁷ “Caleka uyanene vino, ne Yawe Simwandalali, nkulanda. Nemo ndayakolonganika ukufuma mu mpanga muno nayasalanganyizizye, nu kuyawezezya impanga ya Izlaeli.

¹⁸ Lino yalawela mu mpanga iyo, yalinzile yafumyamo utuluwi twao tonsi utwipe nupya utwawinyi.

¹⁹ Ndayapeela umwenzo upya, nga ndiika umi upya munoyali. Ndafumya umwenzo ukome wi we muno yali nu kuyapeela umwenzo utonte wa munyefu.

²⁰ Lyene alino yalayela ivipope vyane nu kuteekela apakuwaka amasunde yane. Yalaya antu yane, nga nani ndaya Leza wao.

²¹ Lelo ndavunuka antu yano yatemwa ukupepa amaunkolanya aipe nu tuluwi twawinyi. Ndayavunuka pamulandu wa vintu vyonsi viipe vino yacita. Ivyalanda Yawe Simwandalali.”

²² Lyene yakelubi yatandika ukupapuka, ala ni mipeto ili umu mbali yao, nga nu luswepo luyengese lwakwe Leza wa ina Izlaeli ala luli papela yao.

²³ Uluswepo luyengeses lwakwe Yawe ilufuma mu musumba nga ilulungama ku mwamba lwaku ufumondaka wa musumba uo.

²⁴ Pacisila Mupasi wakwe Yawe iunyemula nga untwala ku azya ku mpanga ya Babiloni. Vyonsi vii vyacitike umu cilolwa, ndi muno Mupasi wakwe Yawe wandanzile. Lyene cilolwa cino nakweti icipita,

²⁵ nga nani inena azya ivintu vyonsi vino Yawe wandanzile.