Ezekelo 10 - Amazwi Yakwe Leza 2013

Ucindami wakwe Yawe wafuma mu Ng'anda yakwe ikulu

¹ Lino ne Ezekelo natumpwile amanso yane papela yakwe yakelubi, naweni icintu conga icali wa cilimba ca wene, capangwa kwiwe likankala lyakwe safilo

² Alino Leza anena umuntu uwazwite insalu zisuma ati, “Yanga mu mipeto ilya ikuzinguluka, ino ili mwisika lyakwe yakelubi, kapalemo umoto, uzuzye umu makufi. Nga lyene uye ufume ukutandanya mu musumba.” Awe nawe aya kweneko, ala nkuilolela nu kuilolela na manso yane.

³ Lino akuya kweneko, yakelubi yaya yimilila ku Ng'anda ikulu yakwe Leza ku lusansa lwaku katutu, nga ni kumbi lyafupa mu musolo lwa mukasi.

⁴ Nu ucindami wakwe Yawe ali pakufuma apapela yakwe yakelubi, nu kuya ku mulyango wa ng'anda yakweyo. Ni kumbi ilifupa monsi mu ng'anda iyo, cakuti nu musolo onsi uyengesa sile pamulandu nu ucindami wakwe Yawe.

⁵ Icongo ca maapa yakwe yakelubi naco cuvwika nu ku musolo wa panzi, kwati a Leza Wamaka yonsi umweneco awino akuvwanga.

⁶ Lino Yawe wapela ilamulo ku muntu wino wazwite insalu isuma ukuya pala umoto mu mipeto ino yazingulukanga, iyali umwisika yakwe yakelubi, awe umuntu wiyo nawe akuno aya, aya aimilila umu mbali ya mupeto onga.

⁷ Nga alino kelubi wenga alema pa moto apala onga nga aufuumbatika mu minwe ya muntu uwazwite insalu zisuma. Nga nawe asenda umoto afuma na penepo.

⁸ Nga indola ukuti, umwisika lyamapa yakwe yakelubi muli cino cingakolana ni cizanza cikasa lya muntu.

⁹ Nupya lino nalolekesya, indola imipeto iini, umu mbali yakwe yakelubi wenga. Ni mipeto iyo yaloleka ukuyengesa kwati amawe amutengo yakwe belulo.

¹⁰ Yonsi iini ala ikuloleka icili conga kwene, lyene ungati onga uli umukasi kauze.

¹¹ Nga cakuti yalungama uku ntunga zyonsi zini, imipeto iyo ilungama sile ukunkolelo, kusi nukuweluluka, pano ala ilungime sile ukulozile umutwe, ukwaula ukuweluluka icisila.

¹² Imili yao yonsi, amatundu yao yonsi, iminwe yao, amapa yao ni mipeto yao yonsi iini, vyali na manso yatupu monsi monsi.

¹³ Nuvwile kwati yakwama imipeto izina lyakuti, “Nkungulupya.”

¹⁴ Cila kelubi wakweti ivinso vini. Icinso cakwe kelubi wenga cali icakwe kelubi. Cakwe ciili cali ica muntu. Cakwe citatu icakwe cisama. Alino cakwe cini icakwe lyang'anda.

¹⁵ Alino lyene yakelubi yakatwike. Iciumbwa cii ali cino naweni uku nkumba ya Luzi Kebali.

¹⁶ Lino ya kelubi yaya ukunkolelo, imipeto nayo iya ukunkolelo. Nupya lino yakelubi yanza amapa pa kukatuka, imipeto nayo kusi ukufuma umu mbali yakweyo.

¹⁷ Lino imilila, nayo kwene iimilila. Nupya nga yakatuka nayo kwene ikatuka, pamulandu wakuti iciumbwa cica cali sile nu mupasi onga mpo.

¹⁸ Alino nupya ucindami wakwe Yawe wafumile apa wingililo wa ng'anda ya mapepo nu kwiza imilila papela yakwe yakelubi.

¹⁹ Yakelubi nayo apali pakwanza amapa yao, yakatuka pansi, yafuma ni mipeto yayalondela. Alino yaya imilila apa mpongolo yaku ufumondaka wa ng'anda yakwe Leza, nu ucindami wakwe Leza wakwe Izlaeli ala uli apapela yao.

²⁰ Iciumbwa cica ica umi cino naweni apisika lyakwe Leza wakwe Izlaeli, apa nkumba ya Luzi Kebali, niluka nu kuti ali yakelubi yaa.

²¹ Fwandi cila wenga wakweti ivinso vini, amapa yani, navino vyalolekanga wavizanza vi kasa lya muntu umwisika lya mapa.

²² Ivinso vyao vyali wa vinso vino naweni pa nkumba ya Luzi Kebali. Cila wenga wayanga uku nkolelo.