Ezekelo 1 - Amazwi Yakwe Leza 2013

CILOLWA CAKUTANDIKA CAKWE EZEKELO CAPALI LEZA ( 1:1–7:27 ) Cilimba ca wene cakwe Leza

¹ Mu mwaka walenga amakumi yatatu, pa wanda walenga yasano wa mwezi wakwe cini, lino nali na azya pa nkumba ya Luzi lwa Kebali, iyulu liyulika nga ndola Leza mu cilolwa.

² Pa wanda walenga yasano wa mwezi, mu mwaka walenga isano uwa uzya wa mwene Yeoyakini,

³ izwi lyakwe Yawe lyafikile Ezekelo, umwana wakwe Buzi, mu mpanga ya ina Babiloni, pa nkumba ya Luzi Kebali. Kuku kwene ali kuno nuvwile amaka yakwe Yawe yiza kunondi.

⁴ Awe indolekesya nga ndola icipupu ukufuma ku katutu, caleta ikumbi likalamba ilizingulwikwe nu luswepo, nu moto umwafumanga kumyantula kwa mvula.

⁵ Nupya mukasi naweni icintu cimwi calolekanga wa viumbwa vini vyaumi. Mu kuloleka kwakwevyo vyakweti cata ca muntu.

⁶ Lelo cila ciumbwa cali ni vinso vini, na cila conga cakweti amaapa yani.

⁷ Amaulu yaviko yali aololoke nga ni nkamba zya viko zyali wakwe zizi zya mwana wa ng'ombe, iziyengese wa cela cikulumbilwe ca mukuwa.

⁸ Umwisika lya maapa mwalolekanga ivizanza vya muntu ni vinso vyakwevyo vyonsi vini vyasenukile ku ntunga zyonsi zini.

⁹ Amaapa yaviko yasuntikananga lyonga ku lyuze nupya vitasenukanga nanti kupiliuka pa kupita. Cila conga calungamanga sile ku nkolelo yakweco.

¹⁰ Icipazyo cakwevyo cali vii, cila conga cali ni cinso ca muntu. Vyonsi vini vyali ni cinso cakwe cisama ukwi kasa lilunji, vyonsi vini vyali ni cinso cakwe masaye ukwi kasa limani, vyonsi vini vyali ni cinso cakwe lyang'anda'anda uku nsizi.

¹¹ Vivyo ivyali vinso vyakwevyo. Vyene vyanzile amaapa umupela. Cila ciumbwa cali na maapa yaili, asuntinkane ni lyapa lya ciumbwa cuze, yauze yaili yakufile umwili.

¹² Nupya cila conga calungamanga kuno cilozizye icinso. Vyonsi vyalungamanga kuno umupasi wavitwala, nupya vitasenukanga apakupita.

¹³ Pakasi ka viumbwa viii vyaumi pali calolekanga wa munyeswa wa moto uno ukupya, uwali wa nkozyo zikwaka pakasi ka viumbwa vivi vyaumi. Nga nu moto ala ukwaka, mukufuma nu kumyansya kwa nkuwa.

¹⁴ Iviumbwa navyo vyapitanga nu kuwela wa kumyantula kwa mvula.

¹⁵ Nalolekesyanga viumbwa vyaumi vivi, nu mu mbali yakwe cila ciumbwa, vyonsi vini pali umupeto pansi.

¹⁶ Ni mipeto ii yalolekanga nu kuyengesa wa mawe ya belulo ayengese amutengo. Yonsi ini yalolekanga musango uli onga kwene, nupya kwati yapangilwa cila onga ku uze.

¹⁷ Yene yalungamanga ku ntunga zyonsi zini, nupya kwaula kusenuka pakupita.

¹⁸ Lino nalolekesya amalimu yakweyo yalolekanga akulu wakwe cimwi, na pa malimu yonsi yani palolekanga manso yatuputupu ukuzinguluka monsi.

¹⁹ Iviumbwa vyaumi ndi vyaya ku nkolelo, imipeto nayo iya mu mbali yakwevyo. Nupya iviumbwa vyaumi vivi ndi vyakatuka pansi, imipeto nayo kwene ikatuka pansi.

²⁰ Konsi kuno umupasi wavitwala, akuno imipeto isempukila kumwi, pamulandu wakuti umupasi wa viumbwa vivi vyaumi wali mu mipeto ilya.

²¹ Vyene ndi vyasyengana, nayo kwene isyengana, nupya ndi vimilila nayo kwene iimilila. Nalino vyakatuka pansi, ni mipeto nayo kwene ikatuka pansi, pamulandu wakuti umupasi wa viumbwa vivi vyaumi wali mu mipeto ilya.

²² Papela ya mitwe ya viumbwa vyaumi pali icintu cali wa cimpingizya, iciyengese wa cilola, icali papela ya mitwe yakwevyo.

²³ Umwisika ya cimpingizya cico amaapa ya viumbwa vivi vyaumi yakonzoloka nu kusuntinkana ilyuze ni lyuze. Cila conga cakweti amaapa yaili akuvimbilikizya umwili.

²⁴ Nga nuvwa ni congo ca maapa, lino vikupita, ala cili wa ciunda ca manzi amukuku aingi, kwati izwi lyakwe wiyo Wamaka yonsi, nupya lyali wa congo ca mpuka ya vita. Ndi vimilila iviponya amaapa.

²⁵ Nupya ikwiza izwi ukufuma ku cimpingizya papela ya mitwe yakwevyo lino viciimi ala vyativiponya na maapa yakwevyo.

²⁶ Papela ya cimpingizya pali cimwi calolekanga wa kaliwe kayengese kamutengo, akali wa cilimba ca wene. Alino papela yakwe cico, icikoline wa cilimba ca wene, apapela sile, pali uwalolekanga wa muntu ukuya papela.

²⁷ Nga naweni calolekanga wa musana wakwe ukuya papela, walolike wa cela ca mukuwa kwati umoto. Nupya ukufuma kuli cino calolekanga wa musana wakwe nu kuya pansi naweni icali wa moto nu luswepo ukucizinguluka.

²⁸ Pakulola uluswepo ulwazingulwike icali wa mulalamfuti mu makumbi mu nsita ya cisiku. Ni cintu cico calolike wa ucindami wakwe Yawe. Apakulola cico, impona pansi mfupime, nga nuvwa ni zwi lyakwe wiyo akulanda.