Ezaya 9 - Amazwi Yakwe Leza 2013

Kuno tuli umwana watatuvyalilwa

¹ Apa mpiti, impanga ya mutundu wa ina Zebuluni na wakwe Nafutali yali ipupane. Lelo ivilaloleka uku nkolelo vilacindamika impanga iyo. Ukutandikila sile kuli yemba waku Mediteleniani ukulungama ku ufumondaka mu mpanga iyayela ku mbalama ya luzi lwa Yodani, mpaka ukufika nu kucitungu caku Galile, umwikala ainamasi.

² Antu akapita umu mfinzi yatiyalola uluswepo ulukulu lwa ufyusi. Na pali yano akaikala mu wikalo wa cinzingwa ca mfwa, kunoyali kwiza luswepo kwati kumacaca.

³ Wayavuzizya isyuko nu kuyavuzizya uluzango. Yakasansamuka kunuli ndi vino yakasansamuka apa kuzombola na vino yakazanga apakwankana ivyuma visampwe.

⁴ Pano lyene watuputula umunyololo wao uwayacuzyanga. Watuvunola nu mukota uno wayanyambilanga apa viye. Watucimvya ndi vino wacimvizye aina Midyani.

⁵ Pano lyene ulusapato lonsi ulwa ulwi, nanti insalu zyonsi izikandane uku wazi, vimapya pyu uku moto.

⁶ Ala lyene umwana watatuvyalilwa, yatiyatupeela umwana umonsi wino yatiyatwika uwene apa viye vyakwe. Yatiyamutemela izina lyakwe yati, “A Ciinda Wakuzunguka”, “Leza Wamaka yonsi”, “Umukwasi wa pee”, “Mwanangwa wa Cituku”.

⁷ Uwene wakwe ulandalila konsi konsi. Ulasyukila ulongo ulutalasila. Wene alikala apa cifulo ca wene wakwe Davidi nga nu kuteeka uwene wakwe. Wene alausimpa nu kuukomya umu ulungami nu mu ololoke. Ukutandikila sile pali ndakai ukufika na pano insi ilasilila. Ee, cumicumi, avino Yawe Wamaka yonsi alafikilizya cico.

Yawe alavunuka aina Izlaeli

⁸ Yawe watatuma izwi lya kukalipila aina Izlaeli, amu mupanda wakwe Yakobo.

⁹ Aina Izlaeli yonsi, kuli kuti aina Efulemu kumwi na antu yonsi aikazi amu Samaliya, yalasininkizya ukuti avino wacisile. Ndakai yene yali ni cilumba nupya yakuituumika apakuvwanga yati,

¹⁰ “Nanti angala amang'anda ya njelwa yatiyawa, tulakuula amang'anda yauze a mawe. Yatiyatuputwila imikolongelo ya misamvu, lelo swemo tulapyanikizya iya miti imikelide.”

¹¹ Ali cino fwandi Yawe watakalaufya anisi yao apakuti yayazanze.

¹² Aina Alamu yayelile lwaku ufumondaka. Aina Filisti nayo yayelile lwaku uwondaka, ala yatiyacenzela calimwi apa kuciola aina Izlaeli. Icipyu cakwe Yawe cicili, pano acili azunzwile ikasa lyakwe apakuyazangola.

¹³ Aina Izlaeli yatacili yazenzuke, yatacili yaweluluke kuli Yawe Wamaka yonsi, nanti angala wene watazile ayapezya.

¹⁴ Ali cino fwandi kucili sile uwanda onga, lino Yawe alapezya intunguluzi zya ina Izlaeli kumwi na antu kwene. Alayaputola nu kucentola imitwe ni misinda.

¹⁵ Aikolo na yasimucindikwa ali mitwe. Yakasema akasambilizya ivya ntumpu ali misinda!

¹⁶ Intunguluzi zya mwata ndi uo zyaponga, zyafuma umu nzila. Na yano yakatungulula nayo kwene yakuponziwa kumwi.

¹⁷ Ali cino Yawe atalaleka nanti wenga apa alumendo yayo kuti apusuke. Wene atalatezela nanti ana asyale, yano yalasya kumwi na yamukamfwilwa. Pano umutundu onsi ukapontela Leza nu kwifya. Ukavwanga ni vya uwelewele. Ali cino fwandi muli vyonsi vivyo Yawe atalezya ukuta ukusoka nanti ukuzunzula ikasa lyakwe.

¹⁸ Ala umu cumi uyi ukapya wa lupya. Wene ukaoca imyunga na yankololwe. Ukawayola umutengo wa matesi ni cimbilimbili ca vyunsi icifutumukila nu mwiyulu.

¹⁹ Impanga yatipya uku ukali wakwe Yawe Wamaka yonsi cakuti antu yatiyapya. Cila muntu lyene akantunta ntwala.

²⁰ Yonsi pyu umu mpanga yakulombola sile utwakuti yangalya. Lelo icakuti inzala isile, awe cene foo! Lyene icisile yakulya nu twana twao!

²¹ Aina Efulemu na ina Manase yakulwisyanya. Alino nupya antu kwene yaa yakulwisya Ayuda. Ee, kwene umu cumi icipyu cakwe Yawe ciciliko, pano acili watazunzula ikasa lyakwe apa kuyavunuka.