Ezaya 8 - Amazwi Yakwe Leza 2013

Ukuvyalwa kwa mwana wakwe Ezaya

¹ Yawe wanenyile ne Ezaya ati, “Tola icakulembela penepo icikalamba, nga ulembe ni vilembelo ivikulu uti, ‘Maeli Syalali Hasyi Bazi.’ Kuli kuti ‘Kalauka ukuzanza, onona zuwazuwa.’

² Yanga kandondele antu yaili acisinka, simapepo Uliya na Zakaliya mwana monsi wakwe Yebelekiya.”

³ Lyene inja kuli kasema umwanaci, nga nawe asenda indilwa nga aca avyala mwana monsi. Yawe nawe ali pakunena ati, “Mutemele izina lyakwe ‘Maeli Syalali Hasyi Bazi.’

⁴ Pano alala mwana atacili wamanya ukwama ati, ‘Tata’ nanti ‘Mayo’, mwene waku Asilya ale wasenda mpiti ivyuma vyaku Damasiko ni visampwe vyonsi vyaku Samaliya.”

Umwene waku Asilya

⁵ Nupya Yawe wavwanzile nani ati,

⁶ “Apamulandu wakuti antu yaa yatiyakana amanzi amu kaluzi ka Syiloa, yayo akapita cimyamya, pamulandu sile wakoopa Lezini nga nu mwana monsi wakwe Lemaliya,

⁷ acino Mwene wasya ayaletele umwene waku Asilya ni vita vyakwe, yayo aliza wa mukuku wa manzi ya Luzi lwa Yufulate nu kwiza yapongwela.

⁸ Yaliza yapongwele impanga ya Yuda nu kuiunzya mpaka antu yamwele ukufika nu munsingo zyao. Mulamba wiyo alalimba impanga yako yonsi, Iye, we Imanueli!”

⁹ Ali cino fwandi mucimanye mwe mitundu ndi vino yalamusyunola. Muvwikisye mwe mitundu yakutali. Swapilini ivyanzo vinu! Lelo kwene ale mwatimucimanya!

¹⁰ Muiteyanye vino muli nu kucita. Lelo kwene pasi cino mulacita. Mutake vyonsi vino mungataka, lelo mukuicuzya sile. Pano swemo Leza waya naswe.

Yawe wapanda kasema Ezaya amano

¹¹ Alino nupya Yawe wanenyile apa maka, ansopa ukuti ntalondelela inzila zya antu yaa, ati,

¹² “Cisi cakwezya wemo ukulondela vino antu yayo yakucita nanti vino yene yakaoopa.

¹³ Uwaiusya ndi vino nemo ne Yawe Wamaka yonsi anene sile ndi wamuzilo. Anene sile nenga nemuno ulinzile kukwatila icoopo.

¹⁴ Apamulandu nu kucindama kwane ukwa cipezya amano, nemo naya wi we lino antu yakapumika kweneko. Naya wa lukose luno antu yakalemya mwenemo, yayo atekwa umu Yuda nu mu Yelusalemu. Icikalemwako nu ku ina Yelusalemu kwene.

¹⁵ Ali cino fwandi antu anyanya, yayo yano yamapumikanga kweneko, nu kupona yamaponanga. Yene yamaponanga nu kuvunika yamavunikanga. Yamaivyongelekezyanga nu kulemwa!”

Usoko kuli yayo akauzya ku mipasi

¹⁶ Alondezi yane yamasunganga imilandu ino Yawe wankonkomezya.

¹⁷ Yawe wafisama uku manso ya antu yakwe, amu mupanda wakwe Yakobo. Lelo nemo namutaila nu kulolela awino inkalolela.

¹⁸ Nemo indi pano, pali ponga na yayo yano Leza wampela. Yawe Wamaka yonsi, wino icilimba cakwe ca wene cayela apa mwamba wa Zioni, sweswe tuli yakambone yampomvu yano watuma ku kusinila aina Izlaeli.

¹⁹ Ndi cakuti antu yakumunena ukuti auzya imilandu kuli yakalola na yakasapoola, yakatotoza na yakatiitiisya. Ala yakuti, “Uzye antu yataya nu kulondelezya nanti ukuuzya imilandu kuli tuleza twao nanti ukuuzya ku antu yao afwe apamulandu wa nsyazi zyao kunzi?”

²⁰ Umu cumi vii ali vino yalalanda. Lelo mwemo muce mwayasuka muti, “Uvwini vino Yawe akumusunda!” Ala mwemo mutauvwa kuli yano yakumuuzizya imilandu uku mipasi. Vino yakumunena vitalamuombela icisuma nanti conga.

²¹ Antu yalalulumba sile umu nsi. Lelo ale yatiyasila. Ndi yuuvwa inzala, yalaya asoke wakwe cimwi. Yalatukola nu wayateka kwene ivitusi kumwi na Leza wao kwene. Yalati akula yalingamila mwiyulu,

²² limwi iyatumbwila sile amanso pansi. Awe cumi icauwelewele sile, iyazana imfinzi, nayo iyamalanda sile. Apa nsita iyo iya cimvulunganya, antu yatalalola apakufyonsezya.