Ezaya 7 - Amazwi Yakwe Leza 2013

Ilamulo lyakwe Ezaya ku mwene Aazi

¹ Lino Aazi umwana umonsi wakwe Yotamu, umwana umonsi wakwe Uziya, wateesile impanga yaku Yuda, kwakatwike inkondo. Awe mukwai Lezini umwene waku Alamu pamwi na Peka umwana umonsi wakwe Lemaliya, umwene waku Izlaeli, iyaya ku kuzanza umusumba wa Yelusalemu, lelo yaposiwa ukuupoka.

² Walanga amazwi yafika ku mwene waku Yuda ukuti ivita vya ina Alamu vyativingila mu mpanga yamu Izlaeli, intete izimulema kumwi na antu yakwe yonsi icakuti iyapunganika sile wa miti yamu mutengo ikutenta uku muza.

³ Alino lyene umwene anena Ezaya ati, “Senda umwanako Syeali Yasyubu, mupite mukakomenkanye Aazi umu museo, papa pano yakapikula ya nsalu yakaombela, apa mpela ya mufolo wa manzi akapita ukufuma umu cilambe ca pa mulundu, apapela.

⁴ Uye ukamuceule, umunene ateke umwenzo, atuvwa intete nupya atasakamala. Pano icipyu ca mwene Lezini na antu yakwe aina Alamu, ni cipyu ca mwene Peka umwana wakwe Lemaliya vitange vicite umuntu nanti cimwi. Pano antu yayo yali sile wa cunsi icikufutumuka uku tusonsololo twili.

⁵ Umwene waku Alamu pamwi nu mwene waku Efulemu yatiyapingila Aazi. Yene yavwanga yati,

⁶ ‘Lekini tuye tukazanze impanga ya Yuda. Lekini tukapoke impanga yakwe, nu kulasika Tabeele apa cilimba ca wene.’

⁷ Lelo Yawe Simwandalali akuti, ‘Ivintu vii vitalacitika, nupya vitalayako.

⁸ Pasi pano impanga ya Alamu italuta Damasiko, umusumba wa mwenemo uku maka. Nanti sile umusumba wa Damasiko utaluta Lezini amaka, umwene wauko. Aina Izlaeli nayo apa myaka amakumi mutanda na isano ale yasansantika, umutundu wao utalalemana foo.

⁹ Impanga yakwe Efulemu yaluta Samaliya, nga Samaliya atalusile umwene Peka. Ndi mutakomile mu utailo winu, cumi mutalazizimizya.’”

Cimanyililo cakwe Imanueli

¹⁰ Nupya kwene Yawe avwanga kuli Aazi ati,

¹¹ “Lenga Yawe Leza wako kuti akupeele icimanyililo cimwi. Cico naco, ciye icakufuma pansi apazike, uku mpanga ya afwe, nanti icakufuma ukwiyulu ukutalitali.”

¹² Lelo Aazi wene pano ali papa, aasuka sile ati, “Awe icumi, nemo nakana. Intange ndenge icimanyililo. Nemo nsyakulonda ukwezya Yawe.”

¹³ Lyene Ezaya avwanga ati, “Uvwa kuno, we mwizikulu wakwe Davidi! Wemo wamanya mpiti ukuti ukucuzya antu icintu cimwi iciipe sana. Ale lyene icani fwandi cino wemo ukulonda ukucuzya nu Mwene Leza wane kwene?

¹⁴ Lyene Yawe umwisikulu amakulangizya icimanyililo conga. Akunoli umukazyana umwi, wiyo anyomelile. Aliwe alavyala umwana umonsi wino yalatemela izina lyakwe Imanueli.

¹⁵ Lino umwana wiyo alafika apa ciimo ca kuipingwila vino angacita, wene alaimwela iziya nu uci.

¹⁶ Nanti sile lino insita iyo itacili yafika, impanga ziili muno mukateeka yamwene yaili yano yakakoofya wewe we Aazi, zilasyala amatongwa.

¹⁷ “Yawe alamufisya uku manda akucululuka wakwe cimwi, mwemwe kumwi na akazi kako na antu yako. Amalanda yayo yano yatatala yamufikila ukutandikila sile lino uwene wa ina Izlaeli wapalukine nu wene waku Yuda. Wasya ace akupundilile umwene waku Asilya.

¹⁸ “Mu wanda ulya Yawe alakuwa umuluvi apa kwama aina Eguputo. Alino nayo yaliza wa nsazi ukufuma mu tunguzi twa patali utukaitila mu luzi lwa Nailo. Nupya alakuwa umuluvi uwakwama aina Asilya. Nayo yaliiza yakuumbe ungati inzimu ukufuma ku mpanga yao.

¹⁹ Yaliza yafume umu mikonko, nga nu mu macele. Yaliza yatuwilizye umu vipupa vyonsi ivya myunga nu kufupilizya monsi umwa kucemela iviteekwa.

²⁰ “Mu wanda ulya Yawe alaya uku mbalama ya luzi lwa Yufulate, uku kuyasenda umuntu umwi, umwene waku Asilya, wiyo wamanya ukupela inyele. Wiyo aliza amupele ku mutwe nga apele ni pipi ku makulu inu, kumwi ni vilezu vinu kwene.

²¹ “Mu wanda ulya umuntu nanti angala wateeka ing'ombe yonga indama, ni mfwele sile ziili,

²² iviteekwa vivyo vilamuletela iziya ilingi cakuti patalaya cino alaulizya. Umu cumi yonsi alasyala umu mpanga apa nsita ilya yalalya ulwambu lwi ziya nu uci.

²³ “Mu wanda ulya ivyalo vyonsi ivisuma umwayanga amatingi imiti izimbi lyonga, nupya umwafumanga icuma ukulingana na siluva izimbi lyonga muli cila calo, vyonsi vilasapilwa ni myunga na kuli yankololwe aalamela mwenemo.

²⁴ Antu yalautuka ukulyata mwenemo. Apa kwingila mwenemo suka yatiyaipangasya amalapwa ni nceto. Umu cumi, impanga yonsi ilalimba imyunga na yankololwe.

²⁵ Umu twamba tonsi umwamelanga ivyakulya mulamelelwa imyunga icakuti kutalaya alaya mwenemo. Mulasanguka sile umu macemelwa ya ng'ombe ni mfwele.”