Ezaya 66 - Amazwi Yakwe Leza 2013

Yawe alapingwila imitundu yonsi

¹ Yawe wavwanga wati, “Iyulu ali cilimba cane, insi nayo ali cilyatilo ca ngazo zyane. Uzye ing'anda cii fwandi ino mungankuulila? Incende cii fwandi ino ningapuzilamo?

² Pano vyonsi vii, anene navicisile ni minwe yane! Vyonsi vivyo ivyakwane, lelo nemo nkaikisya amano yane ku muntu muicefye, nu wazenzuka mu mwenzo, wiyo akaoopa izina lyane, akantumikila, ali wino nemo nasumbako amano. Ivyalanda Yawe.

³ Yamwi yakatuula cipambasi wa mpolelwa, yamwi yakakoma nu muntu yatuula wa mpolelwa, yatuula umwana wa mfwele wa kunyonga simbwa insingo, pakumukoma pakoca impolelwa, yamwi nayo yakatuula usu nanti uwazi wakwe kapoli, yamwi yakaocela ubani wa ciusizyo nanti ukupolelela utuluwi. Ala antu yaa pasi pakutemwa imipepele yao iipisye.

⁴ Ali cino fwandi ndayasolwela amacuzi, nu kuyaletela vino yakaoopesya ukuluta. Pano lino nayamile kusi wino wanjaswike. Lino nalanda kusi wakuti auvwe. Yene yakacita iviipe mu manso yane nu kusansamukila muli vino nemo nasoka.”

⁵ Uvwini kuno mwemuno mukaoopa ne Yawe! Anyonko, yano yamupata, yano yamusuula pamulandu sile ni zwi lyakwe nene, yakamuwela ala yakuti, “Ale tumamulozyanga vino mumasansamukanga. Yawe kamulange tuvwe vino wacindama na vino angamupususya. Kwene antu yayo yalazewanilapo sile!

⁶ Uvwini kuno! Mu musumba muvwika impokoma. Yafuma mu ng'anda yane. Anene ne Yawe inkukavya apa nsita ino nkulyotola anisi yane!

⁷ Umusumba wane wamuzilo uli wa mwanaci wino watalela umwana umonsi, papo kwene ukwaula ukuti atale acule imipapile.

⁸ Uzye kwatala kwaloleka nanti ukuvwika icamusango ndi uo? Uzye kwatala kwaloleka umutundu umwi uwa antu uno waliko apa wanda sile onga? Ala Zioni wene alavyala umutundu wa antu, lilyo kwene lino watandika ukucuziwa sile ni ndilwa.

⁹ Uzye mwemo mwalola ukuti ningatazyela indilwa yane ukwaula ukuti iyelepe? Uzye nemuno nkalenga ukwelepa nene ningayala ikwata?

Yelusalemu mupya alacindama

¹⁰ Zanga we Yelusalemu! Sansamukini mwensi mwemuno mwamutemwa! Zangini, sansamukini apamulandu wakwe, mwensi mwemuno mukamulosya!

¹¹ Ali pakuti monke nu kwikuta ku maele yakwe. Monkesye wakwe cimwi nu luzango ku maele yakwe acindamisye.”

¹² Yawe akuti, “Nemo ndamuletela isyuko lya pee, ni vyuma vya mitundu yonsi vimaizanga kunomuli. Vimafumfumukanga wa manzi amu luzi ulukupita lyonsi. Mumaya wa kana kano kakusungwa na nyina, kano kasenzilwe pa minwe yakwe, nu kukasunsuntila.

¹³ Nemo ndamumyalalika mu Yelusalemu, ndi vino nacivyazi akamyalalika umwana wakwe.

¹⁴ Lino mwemo mwaca mumalola ivintu vii imyenzo inu ilasansamuka. Mulakwatisya amaka nu mutende. Alino lyene mulasininkizya ukuti fwandi mu cumi anene nkaazwa yano yamfukilila nupya nu kuti nkavunukila anisi yane.

¹⁵ Nemo ne Yawe ndizila umu moto, ndiza nkupitila muli nkungulupya, lino ndiza mukufulula yano nasokela.

¹⁶ Antu yonsi pano nsi yano ndazana nu mulandu, ndayafulula ku moto nu ku lupanga nu kufwa aingi yalafwa.”

¹⁷ “Yaya yano ndazana yaizifya, yaisangulula, apamulandu wakutantama imilongo nu kuya mu vyalo muno yateyanyizizya utuluwi nu kutupepa, awe yene ale yapusuka casililikila. Yano nkulanda ayaya yonsi yano yalya kapoli, yakuza na vyonsi vyawinyi ivikakulika pansi. Ivicitwa vyao nu kwelenganya kwao, vilasila vyonsi pyu iila lyonga kwene. Ivyalanda Yawe.

¹⁸ Apa mulandu wa vicitwa vyao vino manyile, nasya nize nkolonganike antu amitundu yonsi kwene. Alino lyene iliza iilolele yonga ucindami wane.

¹⁹ “Alino lyene yalasininkizya ukuti anene kwene nayafulula. Ndayapeela icimanyililo nu kutuma yamwi pali yano ndapususya, ku mitundu ni mpanga zya patali zino zitatala zyuvwa ukuzyansya kwane nanti ukulola ucindami na maka yane. Impanga zyonsi izili wakwe Tasyisyi, Libya na Lidya umwaya ya fundi ya makuule. Alino nu ku Tubali na Gilisi kuko ali kuno yalaalanda vya lulumbi lwane.

²⁰ Yalakolonganika anyonko yonsi, ukufuma ku mitundu yonsi, nu kwiza yatuula kuli Yawe. Yalizila pa mfwalasi, pa maceleta, mu macila, pa nyumbu, na pa ngamila, uku mwamba wane wamuzilo umu Yelusalemu. Yaliza wa ina Izlaeli yano yakuleta vya mawila uku ng'anda ipepo, yakwe Yawe umu viya visangululwe. Kuu kuli kulanda kwakwe Yawe.

²¹ “Muli yayo ali muno ndasolola yamwi nu kuyacita yasimapepo na ina Levi. Kuu kuli kulanda kwakwe Yawe.

²² “Pano vino iyulu lipya ni nsi ipya vilayelelela ku maka yane, ali vino umutundu winu kumwi ni zina linu vilayelelela pee.

²³ Ukufuma ku mwezi upya, ukufika nu ku mwezi upya uze, ukufuma kwi Sabata lyonga ukufika nu kwi Sabata lyuze, antu yonsi yalaiza ku kupepa kuno ku Yelusalemu. Kuu kuli kulanda kwakwe Yawe.

²⁴ Apa kufuma mu Zioni, yalasyala yailolele yonga ivyala vya antu yano yantalamila. Ingonyo zino zilayalya zitalatala zifwe foo, nu moto usyazimiwa. Antu yonsi apakuyalolekesya yalazunguka.”