Ezaya 65 - Amazwi Yakwe Leza 2013

Leza alakalipila yacisanguka

¹ Yawe nawe aasuka ati, “Nemo nali umuiteyanye ukuvwa ukupapata kwa antu, lelo yatapefile umucumi. Nali umwi uwalondesyanga ukuti yangandondela, lelo yene kutali nanti uwakwezya nanti panono. Antu amutundu yasindonda foo, nanti angala nemo nali umuiteyanye ukuyaasuka inti, ‘Apano ndi namamwazwa.’”

² Nemo lyonsi naya umwi umuiteyanye ukuzengela antu yaa, nanti yene yakaluvyanyizizya sile itolo, nu kuicitila vino aeneco yaitemilwe.

³ Yene yakansonsya umwenzo ku mufulo sile. Impolelwa zyao yene yakazituulila pa tuvuwa, twa antu yano yatamanya, tuno yakakuula mu vyalo vyao, ali muno yakafutumwila nu ubani.

⁴ Apa nsita ya usiku yene yakaya uku macele nu mu malindi. Ali muno yaya yapandwa amano ku mipasi ya afwe. Lyene alino yalya kapoli nu kumwelapo umusunyi wa nyama zikowele, zino yakatuula impolelwa.

⁵ Alino antu kwene yayo, ali yano yakanena auze yati, “Funtukini apipi naswe, pano sweswe yasangululwe.” Ali cino fwandi nemo ne Yawe tutange tuvwane na antu amusango uo. Icipyu cino nemo nayakwatila cikalunkuma wa moto uno utatala wazima.

⁶ “Nemo napanga mpiti ukuyafulula, nu mulandu wao walembwa mpiti. Nemo ntalasuula sile foo, lelo ndayapezya,

⁷ pa uyi wao na pa uyi wa vikolwe vyao kwene. Yene yakafutumwila ubani pa tuvuwa, tuno ainamasi yakapepelapo utuluwi twao mu myamba, nu kunsaalula ali cino yakansaalwila. Fwandi cati ciyana ukuti nemo njapase.”

⁸ “Ne Yawe inkuti kutaya umuntu wino akaonona iviseekwa ivisuma vya matingi foo, pano umukafuma mwenemo waini. Ali cino fwandi nani kwene avino ndacita. Ntalalovya antu yane yonsi foo. Lelo ndapususya mwenemo yano yakantumikila.

⁹ Ndapolelela aina Izlaeli amu mutundu wakwe Yuda. Ana yakwe ali yano yalaya aeneco ya mpanga ya myamba. Antu yane asololwe, ali muno yalaikala.

¹⁰ Yene yalampepa, yalacema imfwele zyao ni ng'ombe zyao umu nyika yaku Syaloni, yayela lwaku uwondaka alino nu mu cifoloma ca Akoli, lwaku ufumondaka.

¹¹ Lyene cilaiyela kuli mwemuno mwafutatila Yawe, mwemuno mukakana Zioni ukwi tolo sile, umwana wane uwamuzilo, mwemuno mukapepa Gadi na Meni, tuluwi twakumuletela isyuko nanti imipamba. Ala mwemo, mulacilola.

¹² Mwemo mwensi mulakomwa ku lupanga, nupya yalamufyula mwensi pyu, pamulandu wakuti mwakananga ukunjasuka lino nemo namwamanga. Mwakananga nu kunguvwa lino nemo namunenanga. Mwatemilwe sile ukumfutatila nu kucita iviipe.”

¹³ Icaleka Yawe Simwandalali akuti, “Aomvi yane yalalya vyakulya, lelo mwemo mulikala ni nzala. Aomvi yane yalamwa vyakumwa, lelo mwemo mulacula uku lusala. Mulaapita sile nsonyi nsonyi lino auzo yakupita ni nsansa.

¹⁴ Yene yalaimba inyimbo zya nsansa, lelo mwemo mulaalila sile impooma pamulandu ni myenzo ukuwaya.

¹⁵ Antu yane asololwe yalatoola izina linu, nu kulilumbula wa lutipu lwa kutipwila yauze. Nene kwene ne Yawe, anene ndamukoma. Yano yakantumikila ndayama izina ilipya.

¹⁶ Umuntu wensi muno nsi wino alalenga intembo, nene kwene ne Yawe muntafutuka ndamumila ulutembo. Wiyo wensi alalapa, wene alalapa mwi zina lyakwe Leza Muntafutuka, ivinkunka vyonsi vyampiti vilapita nu kuviilila ndaviilila.”

Iyulu lipya ni nsi ipya

¹⁷ Nupya Yawe avwanga ati, “Mwalola, nemo namaumba iyulu lipya ni nsi ipya. Ivyampiti vyonsi vilililika, yatalaviusya nupya.

¹⁸ Mwemo lyonsi mwasansamuka nu kuzanga apa vintu vino nemo namacita. Pano Yelusalemu mupya wino nemo namacita, mulaya sile insansa zituputupu, na antu kwene alaya mwenemo yalaya ansansa zituputupu.

¹⁹ Nani kwene kumwi, ndaya sile uwa nsansa zituputupu, pamulandu wakwe Yelusalemu na antu yakwe. Mutalaya uwakulukusya aminsozi, nanti sile uwakukuuta ati, ‘Tutulwe!’

²⁰ Mutalaya utunya tuno tulafwa lino tucili utunono, yonsi yalafwa ukuluta na pa myaka yakufwilapo, kumwi na ikolo kwene. Pano wino alafwa ni myaka umwanda, ala wafwa acili umwance. Nu kukanafika pa myaka umwanda, cilaya icilangililo ca lutipu.

²¹ Yalaakuula amang'anda ya kwikala mwenemo, yalaalima ni vyalo vya matingi nu kulya iviseekwa vya mwenemo.

²² Yatalakuulila umuntu muze kuti aikale mwenemo foo, nanti ukulimila yauze ayano yalye foo. Pano antu yane yalalengela pano nsi, wa miti, na asololwe yane yalasyukila vino yailimile aeneco.

²³ Yatalaicuzya sile ukuomba foo, yatalavyala ana yano yangayaletelela, apamulandu wakuti yene yalaya uluko lumwi ulupolelelwe kuli Leza kumwi na ana yao kwene.

²⁴ Ndayaasuka lino yatacili yangame, ndayuvwa na lino yatacili yamale ukuvwanga.

²⁵ Imimbulu nu mwana wa mfwele vilaalila pamwi, cisama nawe alaalya insaawa wa ng'ombe. Inzoka zitalakwata intazi uku muntu, zilaalya ulukungu. Apa mwamba wa Zioni, umwamba wane wamuzilo, patalacitika nanti cimwi iciipe, nanti caononyi.”