Ezaya 64 - Amazwi Yakwe Leza 2013

¹ We Yawe, uzye pacani cino utangalepula amayulu nu kwika pano nsi? Uzye pacani imyamba ikaizakazila pakulola wewe,

² Yene ingatengana wa manzi yano yakutopota pa moto. Ndanga ulange anisi yako vino wemo waya na maka. Leka antu amitundu yonsi yazakaze kunuli!

³ Kuli insita imwi ino wemo wizile ku kucita vyakoofya antu, ino swemo tutenekile. Imyamba yakuweni itandika nu kuzakaza sile uku ntete.

⁴ Awe cumi, kutatala kwaya umuntu wino walola nanti ukuvwa Leza umwi uwaya na maka wakwe wewe. Wiyo angacitila antu yano yamutaila ivintu ivyaya wakwe vii.

⁵ Wemo ukatungulula yano yakacita vyaololoke nu kwiusya inzila zyako. Lelo kwene wasokanga lino twifyanga nu kukutalamila apa nsita ntali.

⁶ Swensi twali wa antu amifitalila, nu uloloke witu onsi wali wa nsalu iya vikwi. Swensi twali alokote wa mafwa. Amaifyo itu yatusenzile wa muza.

⁷ Kutali uwakuti alaizye izina lyako, nanti wakuti aimilile, ale aemelile kunuli. Pano wemo watufisile icinso cako. Watusuula nu kutusuula apamulandu wa maifyo itu.

⁸ Lelo kwene we Yawe, ala wewe uli Tata. Swemo twaya sile wa mbuulo, nawe wakwe nakamata. Umucumi awewe watuumba.

⁹ Ali cino fwandi, utaasoka vivyo nanti kwelenganyapo sana apa uyi witu. Swemo sweswe antu yako, wemo watuyelelako sile uluse.

¹⁰ Imisumba yako yamuzilo, lyene ili ntangali ntangali, amatongwa sile. Alino nu mu Yelusalemu kwene musile ivitotela vitupu.

¹¹ Ng'anda itu yakupepelamo, iyo iyaya yamuzilo nupya yalulumbi, ino ivikolwe vitu vyakulumbanyizyanga mwenemo, nayo kwene yayoca uku moto. Incende zyonsi zino twazanganzilanga mwenemo nazyo kwene zyononeka.

¹² Ale lyene we Yawe, wemo ukuti uli pali vivyo vyonsi? Uzye utange ucitepo cimwi? Uzye umatutazyela vikwene twalukucula apapela ukucula?