Ezaya 61 - Amazwi Yakwe Leza 2013

Ilandwe lisuma lya ukuluzi

¹ Mupasi wakwe Leza wikala munondi, pano aliwe wampaka amafuta, wantuma ukukukosola ilandwe lisuma ku alanda, nu kupozya imyenzo itonte, ku kuuma imbila pa lwa kukululwa kwa azya, nu kusapulwa kwa anyepwe.

² Wantuma nene apakuti indande ukuti insita lyene yatifika ino Leza alapususya antu yakwe, ino alacimvizyako anisi yao. Wantuma na pakuti inamyalalikako yano yakulosya.

³ Wantuma na pakumyalalika yonsi yano yakulosya mu Zioni, na akuilizyanya ku kuyasansamusya. Apakuti umu nyimbo zyao zya malanda, impyanikizyepo inyimbo zya luzango. Umweneco Leza aliwe amayasunganga. Alino nayo lyene yamayenkemanga wa miti yalulembelya. Yonsi pyu yamayanga asuma, yamalumbanyanga na Leza pa miombele yakwe yamaka.

⁴ Yamakuululula cipya cipya ivitotela vya myaka ntanenwa nu kututulula apali ponsi pano pononike, kumwi ni misumba yonsi iyaongolwike, nga ni vitalang'anda vya myaka ni myaka.

⁵ Ainamasi ayano yaliza yayacemela amaufyo ya viteekwa vyao nu kuyalimila. Ukwika penepo nu kusunga imiti ya matingi yao.

⁶ Alino mwemo mulaamwa yasimapepo yakwe Yawe, mulaamwa yaomvi yakwe Leza witu. Mwemo mumailyokezyanga sile mwenga, apa vyuma vya mitundu yuze, ali muno mumaitakizyanga.

⁷ Insonyi zinu nu kusaaluka kwinu vyativisila, lyene mumaikalilanga mu cifulo cinu ni vyuma vinu vimasandulukanga. Fwandi mumasansamukanga pee.

⁸ Yawe wavwanga wati, “Nemo natemwa ulungami, lelo nasoka wakwe cimwi uwivi nu lufyengo. Nemo namalambula ningo sana antu yane nupya namapangana nayo upangano wa pee.

⁹ Yene yamalumbuka wakwe cimwi ku antu ya mitundu yuze. Yonsi yano yamayalolanga yamasininkizya ukuti mucumi ali antu yano napolelela.”

¹⁰ Iye mwe, Yelusalemu wane! Siangala nalukuzangila muli Yawe nu luzango. Umwenzo wane kawalu kuzangila muli Leza. Pano nemo watanzwika icakuzwala cakulanga ukuti nimpusuka. Watanzwika ilaya lyakulanga ukuti natincimvya. Eya, lyene nemo ndi wakwe nawinga wino azwite candaluwa!

¹¹ Pano ndi wakwe vikwene vino umusili ukamezya imbezu nu kukuzya ivyativimela, ali vino na Yawe kwene akapususya antu yakwe cakuti na antu amitundu yonsi iyamulumbanya.