Ezaya 60 - Amazwi Yakwe Leza 2013

Ucindami wakwe Yelusalemu mupya

¹ Katuka yengesa, pano uluswepo lwako lwatilutandika, nga nu ucindami wakwe Yawe watiucatilizya pali wewe.

² Lola antu ya mitundu yuze yene imfinzi ilayavimbilikizya. Lelo wemo luswepo lwakwe Yawe lulakucatilikizya nu ucindami wakwe Yawe ulaloleka panuli!

³ Antu ya mitundu yuze yaliza kunuli na yamwene nayo kwene yalaileta ku luswepo lwako ululi wi lanzi ilikutunka!

⁴ Tumpula amanso, celecensya konsi konsi. Lola vino yonsi yakolongana kunuli. Ana yako aonsi yafuma ukutali. Ana yako anaci yatiyayasendela pa lutungu, apa lumani.

⁵ Wemo pakulolekesya vivyo pasi pakumwentula, nu mwenzo wako wakulukunta nu kulunkuma ni nsansa. Pano lyene ukankala wa mitundu yuze umalungamanga kunuli. Ivyuma vyao vimalambanga yemba apa kwiza kunuli.

⁶ Ingamila zimaizanga kunuli, iciufyo. Zimafumanga uku Midyani nu ku Efa. Zyonsi sile ni zyaku Syeba ziliza ala zyatizisenda zaabu nu ubani. Umu cumi antu yalalumbilizya vino Leza wacita.

⁷ Amaufyo ya mfwele aku Kedali nu ku Nebaoti yalayaleta kunuli apakuti uyatule impolelwa. Yalapokelelwa apa kavuwa kane, apa kuyemvya Ng'anda yane ikulu ya lulumbi.

⁸ Uzye ayaweni yaya yano yakuzyunda wa makumbi, yano yakwiza ungati ivipeele ivikupapukila ku cinsanzo?

⁹ Icumi kwene amawato yankolonganila ukufuma ku mpanga zya kutali, ala ivyombo vyaku Tasyisyi yali apankolelo, yakuleta antu yakwe Leza kuno kumwao, ala yasenzile siluva na zaabu, kuti yize yatuule kuli Yawe, Leza winu, Wamuzilo wilya wakwe Izlaeli, pano aliwe wamupeela ucindami.”

¹⁰ Yawe akunena umusumba wa Yelusalemu ati, “Ainamasi yalakuululula amalinga yako, na yamwene yao, yalakuombela. Nanti angala nemo nakukalipile ukali ukali, lelo pali ndakai namakuuvwilanga uluse, nupya namakutezelanga.

¹¹ Cila wanda, usiku nu musanya, impongolo zyako zimasyalanga mwanku. Ali pakuti yamwene ya antu amitundu yonsi yaingila apa kukuletela ivyuma vyao.

¹² Ali vino antu ya mitundu yuze yano yalakana ukukuombela yene cazipa yace yasyamilile, yalowelele.

¹³ “Imiti ya mbao zyaku Lebanoni izili wakwe sondwa, saninga ni mikulo, zizi kwene izicindamisye ali zino yalakuletela wewe apa kwiza kuulila ing'anda yane cipya cipya iyakumpepelamo, na pakwiza cindamika we musumba.

¹⁴ Ana ya antu yano yakakucuzya, yaliza yakufukamila apa kukucindika. Yonsi sile yano yakusuuzile mpiti yaliza yafukankila kunuli. Yalakwama nu kuti we musumba wakwe Yawe nupya ala yakuti ‘Zioni umusumba wakwe Leza Wamuzilo wakwe Izlaeli.’

¹⁵ “Lyene fwandi antu yatalatala yakutazyele, nanti ukukusuula ndi vino yakupasile nu kukufumyako amano. Nemo ndakucindamikila calimwi. Nupya umwako kwene ali muno yalasansamukila amanda yonsi.

¹⁶ Antu ya mitundu yuze pamwi na yamwene yao, yalakusunga ndi vino umukwasi akasunga umwana wa kuivyalila. Umucumi, ulasininkizya ukuti anene ne Yawe, nakupususya, nene ne musambazi wakwe Izlaeli nakukulula, Wamaka wilya wakwe Izlaeli.

¹⁷ “Apa cela ca mukuwa nemo ndapyanikizyapo zaabu. Apa ncende ya cela nemo ndapyanikizyapo siluva. Apa ncende ya mbao nemo ndapyanikizyapo umukuwa. Alino apa mawe napo ndapyanikizyapo ivyela. Yakateeka yako yatalakucuzya nupya foo. Nemo ndaleka ukuti yateeka mu ololoke nu mu longo.

¹⁸ Ivyongo vya mucuzya vitalaauvwika nupya foo, mu mpanga yako. Nemo ndakulinda nu ku kucingilila wi linga. Umucumi ulandumbanya apa kukupususya.

¹⁹ “Asi lanzi foo lino lilakukozezya uku macaca. Asi mwezi foo uno ulakukozezya amanda pe. Ala anene kwene ne Yawe, nene sile ndakukozezya pee na pee. Nene sile ne mucindami, anene ndaya uluswepo lwako.

²⁰ Amanda ya kuilizyanya yalasila. Nene kwene ne Yawe ndaya uluswepo lwako pee na pee, lulo luno lulayelelela pee ukuluta apa mwezi na kasanya.

²¹ Antu yako yonsi pyu yalaya asuma, yalasyukila ni mpanga pee. Umucumi anene nayasimpa, nene nayaumvile apakuti yanena antu yauze vino nemo nacindama.

²² Nanti sile aka lupwa kamwi akanono, akasilesile, kalasuka kaye umutundu umwi uwamaka! Ivintu vivyo nemo ndavicita zuwazuwa insita ilingane ndi yafikila. Umucumi anene kwene ne Yawe navwanga!”