Ezaya 6 - Amazwi Yakwe Leza 2013

Leza waama Ezaya kuti aye kasema

¹ Umu mwaka uno mwene Uziya wafwilile mwenemo, ne Ezaya naweni Umwene ala atenzi apa cilimba cakwe ica wene, icisanzuke. Ala ni cakuzwala cakwe cati cilimba Ng'anda yakwe ikulu.

² Apapela yakwe paimi yaselafimu, ala yakulunkuma sile uku cimbilimbili ca moto. Cila wenga wakweti amapa mutanda, mapa yaili ala yatiyavimba apa manso yao, nga na yaili ala yatiyavimba ingazo zyao, nga amapa asyala yaili ala akupapukila kweneko.

³ Ala yakulaizya yakuti, “Wamuzilo, wamuzilo, wamuzilo Yawe Wamaka yonsi, ucindami wakwe walimba insi yonsi.”

⁴ Icilulumo ca mazwi yao citensya maingwe nu mufula wa Ng'anda ikulu yakwe Leza, nu mu Ng'anda ikulu yakwe Leza imuzula ni cunsi tupu!

⁵ Nga alino nani ne Ezaya imvwanga inti, “Kalanda kunondi! Awe icumi ilelo lyene ali mpela yane! Pano kwene amazwi yonsi yano nkalanda yangaya aipe, nupya nikala na antu ya mazwi akanyengula umwenzo. Ilelo lyene casila nafwa, pano lyene nailolela na manso yane Yawe Wamaka yonsi.”

⁶ Alino selafi wenga apapukila panondi, aiza ni kala lya moto lino waliwapala nu lumano pa kavuwa.

⁷ Wiza walisintikizya apa milomo yane nga avwanga ati, “Walola, nakukumya cii apa milomo. Fwandi ukwifya kwako kwasila, ni viipe vyonsi vyafuma.”

⁸ Alino nuvwa Mwene uuzya ati, “Uzye aweni wino namatuma? Aweni amaya inkombe itu?” Nani imwasuka inti, “Mukwai namayako! Ntumini nene!”

⁹ Lyene nawe anena ati, “Pita ukanene antu yaa uti, ‘Nanti mungakutika uli, lelo mutangatezya. Ukulola mungalola, lelo mutangiluka.’”

¹⁰ Alino nupya anena ati, “Taa, leka antu yayo yaye muli sisi, yapulamike amakutwi, uyavimbe na pa manso, apakuti yatalola nu kuvwa yatuvwa, nupya yatailuka ni vintu. Pano limwi yangazenzuka nu kupola yapole.”

¹¹ Alino nani namuzya nati, “Ale lyene fwandi we Mwene, icintu cii cilapelela pi?” Nga nawe angasuka ati, “Ukufika sile na pano imisumba ilononeka isyale amatongwa. Ukufika sile na pano amang'anda yalononekela yasyale sile ivipompa. Alino nupya ukufika sile na pano impanga ilasyalila amapooli.

¹² Ndapuusya antu nu kuyazingila ukutali, ni mpanga yonsi ice iisyalile amapooli.

¹³ Nanti umu mpanga mwasyala umuntu wenga pa antu ikumi lyonga, nawe kwene ndamulovezya kumwi. Wene alasyala sile wa cisiki ca muoko cino yacentula.” (Cisiki cico cilaya wa cimanyililo cakutandikila cipya cipya uku antu yakwe Leza.)