Ezaya 58 - Amazwi Yakwe Leza 2013

Ukuleka ukulya kwampomvu kuno kukazanzya Leza

¹ Yawe wavwanga wati, “Pundisya utacilikizya izwi lyako! Uwangulisye wi penga! Kalipila antu yane apa kusanguka kwao, unenole na ang'anda yakwe Yakobo apa maifyo yao.

² Ukuya kwene yakampepa muno wacela, yakaitakizya na pakulondela amasunde yane, nga na pakucita ivilungame. Yakampapatila ukuti nayapolelela nu kuyapeela amasunde alinzile.”

³ Nga ala yakunguzya yati, “Uzye pacani cino tungatela ukulya icakulya vino Yawe atatusumvileko amano? Cino tungaculila icani swemuno asisakamala?” Nga ne Yawe ala nkuyasuka inti, “Lino mukata ukulya icakulya, mwemo mucumi mukalondela sile ivyakumusansamusya vitupu, nupya ali lino mukapelesya na aomvi inu imilimo yakuti yaomba.

⁴ Lino mwata ukulya kuya ukutintana nu lwete lyonsi. Ale lyene ukuta ukulya cakulya ukwamusango ndi uo, ali kuno mungati kungaleka inuvwe ukupapata kwinu?

⁵ Lino mukuta ukulya, mukaicuzya sile mwe eneco, mukakontamika imitwe inu kwati amusanze wino watakunga ulumi, nu kulala pa visakati nu mwitwi, uzye mwemo mukuti ali kuta ukulya? Uzye uli wanda uno Yawe angatemwa, vwile?

⁶ Nemo nkuti ukuta ukulya ukwa mpomvu kuno ningatemwa aeku: ukusapula yano yanyepa umu ng'anda yaminyololo pamulandu wa lufyengo. Ukutankola insinga zya makoli yao, ukuta yano yakafyengelekezya pakuti yaikalila aeneco.

⁷ Ukwankanya icakulya cinu kuli yano yatakweti, ukupokelela apina umu ng'anda inu, yano yatakweti ukwakwikala. Ukwazwilizya antu yano mukulola ukuti kwene yasizya. Mutafisa ukulanga antu inu uku mwinu.

⁸ “Ndi cakuti caya vivyo ale lyene uluzango lwane lulayengesa wa luswepo lwi lanzi lino likutunka, ni vilonda vinu vilapola sile zuwazuwa ukwaula nu kusumba kasita. Lyene nani kwene ale ndaya namwe lyonsi kwene apa kumupususya. Ndaya penepo apakuti namucingilila monsi monsi.

⁹ Lyene mulati ndi mwangama ndaasuka. Mulaapunda izina lyane nani ndaasuka inti, ‘Apano ndi.’ Ndi cakuti mwata ukutwika auzo ikoli, mwata nu kusontana iminwe, mwata nu kulanda ivintu viipe pali alio,

¹⁰ mwatandika nu kupeela yano yali ni nzala icakulya, lyene ale uluswepo lwane lulawala mu mfinzi, ni mfinzi iyo ilawala wi lanzi ilili pakasi ka mutwe.

¹¹ Lyene nene ndamutungulula lyonsi sile, nu kumwimula ivintu visuma. Ndaamukomelezya nu kumusunga ningo, mulaya wa calo cino yakakontelela usaka. Mulaya wa kafukoka ka manzi yano yasiipwa.

¹² Mulatutulula amatongwa yampiti, nu kukuula mu mifula yampiti. Yalaamwama ukuti mwemwe yakalungisya ya viumba ivyononeke, yakakuululula ya vitotela.”

Cilambu cakucindika wanda wi Sabata

¹³ Ndi cakuti umacindika wanda wi Sabata, wakana nu kucitamo vya uculuzi, watandika nu kuwaka wanda wi Sabata wa wanda umwi uwa nsansa, wacindika uwanda wamuzilo, wakwe Yawe, waucindika umu kukanaya ukutali, mwakana ukuomba penepo imilimo, nanti ukulanda ilyasi lya uwelewele,

¹⁴ alino lyene mulakwata insansa zino nemo nkapeela antu yano yakambombela. Ndaleka nu kuti antu yace yamucindika insi yonsi pano yapelela. Mulailyokezya ivyuma vyamu mpanga, ino napiile Yakobo icikolwe cinu. Avino ne Yawe navwanga.